មន្ត្រីក្រសួងបរិស្ថានអះអាងថា ពលរដ្ឋអាចបរិភោគគ្រឿងសមុទ្រនៅខេត្តកែបបានវិញជាធម្មតា។
នាយកខុទ្ទកាល័យ និងជាមន្ត្រីនាំពាក្យនៃក្រសួងបរិស្ថាន លោក សៅ សុភាព ថ្លែងប្រាប់វិទ្យុអាស៊ីសេរី នៅថ្ងៃទី៨ មេសា ថា រហូតមកដល់ពេលនេះ ទឹកសមុទ្រខេត្តកែបបានវិលត្រឡប់មកស្ថានភាពដើមវិញ ហើយលែងបង្កផលប៉ះពាល់ដល់សុខភាពពលរដ្ឋទៀតដែរ៖ « ឥឡូវនេះស្ថានភាពប្រែមកធម្មតាវិញហើយ។ យើងសន្និដ្ឋានថា វាគ្មានបញ្ហាប៉ះពាល់ទេ ក៏ប៉ុន្តែក្រសួង និងមន្ត្រីជំនាញរបស់យើង ជាពិសេសមន្ទីរបរិស្ថានខេត្តកែប និងអាជ្ញាធរបន្តតាមដាននិងរាយការណ៍មកក្រសួង ក្នុងករណីមានហេតុការណ៍អីកើតឡើងខុសប្លែកពីធម្មតា យើងនឹងជូនដំណឹងដល់សាធារណជនជាបន្ទាន់ »។
លោក សៅ សុភាព បន្តថា លទ្ធផលវិភាគទឹកសមុទ្រនេះបង្ហាញថា បញ្ហាទឹកសមុទ្រប្រែពណ៌បៃតងនៅសមុទ្រខេត្តនេះ ដោយសារមានប្លង់តុងមួយប្រភេទ បានកើតឡើងពាសពេញទឹកសមុទ្រនៅតំបន់ទឹករាក់ពេលកើនកម្ដៅខ្លាំង ហើយលោកបញ្ជាក់ថា រដ្ឋាភិបាលនឹងរកគ្រប់លទ្ធភាពដើម្បីបញ្ចៀសការកើនកម្ដៅទឹកសមុទ្រ ដូចជារក្សាព្រៃលិចទឹក និងដាំដើមកោងកាងជាដើម។
កាលពីចុងខែមីនា ទឹកសមុទ្រខេត្តកែបបានប្រែពណ៌ជាបៃតង និងមានក្លិនស្អុយ រហូតដល់សត្វក្នុងសមុទ្រងាប់អណ្ដែតពេញផ្ទៃទឹក។ ភ្លាមៗក្រសួងបរិស្ថានបានយកសំណាកទឹកសមុទ្រដែលប្រែជាពណ៌បៃតងនោះ ទៅវិភាគ និងណែនាំពលរដ្ឋ និងទេសចរទៅលេងនៅខេត្តនេះ ឲ្យប្រុងប្រយ័ត្ន ដោយផ្អាកការចុះងូតទឹកសមុទ្រ និងបរិភោគគ្រឿងសមុទ្រក្នុងភូមិសាស្ត្រខេត្តនេះមួយរយៈផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។