គិតត្រឹមថ្ងៃទី២៤ កក្កដា ក្រុមហ៊ុនទំនប់វារីអគ្គិសនីសេសានក្រោមពីរនៅខែត្រស្ទឹងត្រែង បានបិទទ្វារទឹកសាកល្បង ១០ថ្ងៃហើយ ដើម្បីអនុវត្តគម្រោងផលិតថាមពលអគ្គិសនី។ មកទល់ពេលនេះ កម្ពស់ទឹកបានកើនឡើង ១ម៉ែត្រនៅឃុំស្រែគរ និងកើនឡើងប្រហែល ២តឹកនៅឃុំក្បាលរមាស បើធៀបកម្ពស់ទឹកទន្លេកាលពីថ្ងៃទី២០ កក្កដា។
តំណាងក្រុមហ៊ុនទំនប់វារីអគ្គិសនីសេសានក្រោមពីរ លោក អ៊ុំ រ៉េត ឲ្យដឹងនៅថ្ងៃទី២៤ កក្កដា ថា បច្ចុប្បន្ន ក្រុមហ៊ុនកំពុងប្រតិបត្តិការបិទទ្វារទឹកសាកល្បងបាន ៨ទ្វារទឹក ហើយកម្ពស់ទឹកបានកើនឡើង ៦៦ម៉ែត្រនៅតំបន់ទំនប់វារីអគ្គិសនី និងកើនឡើង ៦៧ម៉ែត្រនៅឃុំស្រែគរ ធៀបកម្ពស់នីវ៉ូទឹកសមុទ្រ។ លោកថា មកទល់ពេលនេះ ទឹកបានលិចស្ពានស្រែពក ហើយ និងកំពុងបន្តកើនឡើងលិចផ្លូវមួយចំនួននៅឃុំក្បាលរមាស ហើយអាចនឹងពន្លិចភូមិស្រែគរ និងឃុំក្បាលរមាសចាស់ ប្រសិនបើក្រុមហ៊ុនបិទទ្វារទាំងស្រុង។
លោកបញ្ជាក់ថា កត្តាអាកាសធាតុក៏ជាផ្នែកមួយនាំឲ្យកម្ពស់ទឹកកើនឡើងដែរ៖ « ឥឡូវមានព្យុះ និងភ្លៀងពីខ្សែទឹកខាងលើទៀត ហើយទន្លេទាំងពីរនៅខាងលើហ្នឹង ចឹងទឹកអាចកើនឡើងលើសការប៉ាន់ស្មាន។ ដូចជាស្ពានស្រែពក អី តាមពិតអត់ត្រូវលិចទេ តែមកដល់ថ្ងៃនេះលិចហើយ »។
ប្រជាពលរដ្ឋរស់នៅភូមិស្រែគរចាស់ លោក ហ្វុត ឃឿន បញ្ជាក់ថា កម្ពស់ទឹកទន្លេនៅមិនទាន់មានសញ្ញាគួរឲ្យព្រួយបារម្ភទេ ហើយអ្នកភូមិនៅតែបន្តរស់នៅក្នុងភូមិចាស់នៅឡើយ។ តែយ៉ាងណា លោកកត់សម្គាល់ថា សមត្ថកិច្ចចម្រុះកំពុងឈរជើងយាមតឹងរ៉ឹងនៅតំបន់មួយចំនួននៃភូមិស្រែគរ និងឃុំក្បាលរមាស និងបានរារាំងភ្ញៀវមួយចំនួនមិនឲ្យមកឃុំក្បាលរមាស និងឃុំស្រែគរ៕
សូមទស្សនាវីដេអូបន្ថែមទៀត
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។