ពលរដ្ឋ​ឃុំ​ស្រែគរ​និង​ក្បាលរមាស​នៅ​តែ​អះអាង​ថា​បន្ត​រស់នៅ​ភូមិ​ចាស់​ទោះ​ជា​កម្ពស់​ទឹក​កើន​ឡើង

ដោយ ម៉ែន សុធីរ
2017-07-17
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ពលរដ្ឋ​ដាក់​ស្លាក​ជាប់​នឹង​ដើមឈើ​នៅ​ឃុំ​ស្រែគរ ស្រុក​សេសាន ខេត្ត​ស្ទឹងត្រែង ថ្ងៃ​ទី​១៤ ខែ​កក្កដា ឆ្នាំ​២០១៧។
ពលរដ្ឋ​ដាក់​ស្លាក​ជាប់​នឹង​ដើមឈើ​នៅ​ឃុំ​ស្រែគរ ស្រុក​សេសាន ខេត្ត​ស្ទឹងត្រែង ថ្ងៃ​ទី​១៤ ខែ​កក្កដា ឆ្នាំ​២០១៧។
RFA/Men Sothyr

គិត​ត្រឹម​ថ្ងៃ​ទី​១៧ កក្កដា ជា​ថ្ងៃ​ទី​បី​ដែល​ក្រុមហ៊ុន​សាងសង់​ទំនប់​វារីអគ្គិសនី​សេសាន​ក្រោម​ពីរ នៅ​ខែត្រ​ស្ទឹងត្រែង បាន​បិទ​ទ្វារ​ទឹក​សាកល្បង ដើម្បី​អនុវត្ត​គម្រោង​បង្កើត​ថាមពល​អគ្គិសនី។ ចំណែក​ពលរដ្ឋ​រស់នៅ​ឃុំ​ស្រែគរ អះអាង​ថា បើ​ទោះ​ជា​កម្ពស់​ទឹក​កំពុង​កើន​ឡើង​ជា​បន្តបន្ទាប់​ក្តី អ្នក​ភូមិ​នៅ​តែ​បន្ត​រស់នៅ​ភូមិ​ចាស់​ដដែល។ ដោយឡែក​តំណាង​ក្រុមហ៊ុន​អះអាង​ថា កម្ពស់​ទឹក​នឹង​លិចលង់​ភូមិ​ស្រែគរ និង​ភូមិ​ក្បាលរមាស​ចាស់​នៅ​ពេល​ឆាប់ៗ​ខាង​មុខ។

ពលរដ្ឋ​ដែល​បដិសេធ​មិន​ព្រម​ចាកចេញ​ពី​ភូមិ​កំណើត​នៅ​ឃុំ​ស្រែគរ និង​ឃុំ​ក្បាលរមាស បាន​ត្រៀម​ជញ្ជូន​សម្ភារៈ​ចេញ​ពី​ភូមិ​ចាស់​រៀងៗ​ខ្លួន ហើយ​ពួក​គាត់​ក៏​មិន​ហ៊ាន​ទៅ​ណា​ឆ្ងាយ​ពី​លំនៅឋាន​ដែរ ដោយ​ខ្លាចក្រែង​ទឹក​លិច។

ពលរដ្ឋ​រស់នៅ​ឃុំ​ស្រែគរ លោក ដែង មួន ឲ្យ​ដឹង​នៅ​ថ្ងៃ​ទី​១៧ កក្កដា ថា លោក​បាន​ត្រៀម​ទីទួល​សុវត្ថិភាព​ដោយ​ខ្លួន​ឯង​នៅ​បណ្ដោះអាសន្ន បើ​ទឹក​លិចលង់​លំនៅឋាន ហើយ​ក៏​បាន​ត្រៀម​សម្ភារៈ និង​គ្រឿង​ហូប​ចុក​មួយ​ចំនួន។ លោក​ថា បច្ចុប្បន្ន​កម្ពស់​ទឹក​នៅ​មិន​ទាន់​ឡើង​ខ្ពស់​លិច​ផ្ទះ​ពលរដ្ឋ​នៅ​ឡើយ​ទេ។ យ៉ាង​ណា លោក​ថា​បើ​ទឹក​នៅ​បន្ត​កើន​ប្រហែល ២​ម៉ែត្រ​ទៀត នឹង​លិចលង់​ផ្ទះ​ពលរដ្ឋ​មួយ​ចំនួន​នៅ​ឃុំ​ស្រែគរ៖ «ពិបាក​ហ្នឹង​ហើយ ពី​មុន​វា​មិន​ធ្លាប់​ធ្វើ​ចឹង វា​ត្រូវ​តែ​ពិបាក​ហើយ។ ទឹក​ត្រឹម​ណា ពួក​ខ្ញុំ​ថយ​ត្រឹម​ហ្នឹង បើ​ថា​ទឹក​ដល់​ផ្លូវ​ធំ ពួក​ខ្ញុំ​ទៅ​នៅ​ផ្លូវ​ធំ។ បើ​ថា​លិច​នោះ​ទៀត មាន​តែ​ថា​ទៅ​នៅ​ភ្នំ​ក្រឡាពស់»

លោក ដែង មួន បារម្ភ​ថា កុមារ និង​យុវជន​រស់នៅ​ភូមិ​ចាស់​ភាគច្រើន​បោះបង់​ការ​សិក្សា ដោយសារ​តំបន់​ពួក​គាត់​រស់នៅ សាលា​ពុំ​មាន​គ្រូបង្រៀន ហើយ​អ្នក​ភូមិ​ភាគច្រើន​ខកខាន​មិន​អាច​ធ្វើ​កសិកម្ម​ដោយ​ខ្លាចក្រែង​ទឹក​លិចលង់។

លិខិត​ចុះ​ថ្ងៃ​ទី​៥ ខែ​មិថុនា ឆ្នាំ​២០១៧ របស់​ក្រុមហ៊ុន​ទំនប់​វារីអគ្គិសនី​សេសាន​ក្រោម​ពីរ ឲ្យ​ដឹង​ថា បើ​ក្រុមហ៊ុន​បិទ​ទ្វារ​ទឹក​សាកល្បង​នៅ​ពាក់​កណ្ដាល​ខែ​កក្កដា ឆ្នាំ​២០១៧ កម្រិត​ទឹក​នឹង​ឡើង​ដល់ ៧២​ម៉ែត្រ បណ្ដាល​ឲ្យ​លិចលង់​ភូមិ​ក្បាលរមាស និង​ភូមិ​ស្រែគរ​ចាស់។ ក្រុមហ៊ុន​ចាត់​ទុក​ការ​បិទ​ទ្វារ​ទឹក​សាកល្បង គឺ​ជា​ទិសដៅ​នៃ​ការ​អនុវត្ត​គម្រោង ហេតុ​នេះ​ដើម្បី​បញ្ចៀស​ចលាចល​ណា​មួយ ទាមទារ​ឲ្យ​ពលរដ្ឋ​ចាកចេញ​ពី​ភូមិ។

ទំនប់​វារីអគ្គិសនី​សេសាន​ក្រោម​ពីរ ២០១៧ ១៤៤០
ទំនប់​វារីអគ្គិសនី​សេសាន​ក្រោម​ពីរ ស្ថិត​ក្នុង​ស្រុក​សេសាន ខេត្ត​ស្ទឹងត្រែង។ រូបថត​ថ្ងៃ​ទី​១៤ ខែ​កក្កដា ឆ្នាំ​២០១៧។ RFA/Rann Samnang

តំណាង​ក្រុមហ៊ុន​ទំនប់​វារីអគ្គិសនី​សេសាន​ក្រោម​ពីរ លោក អ៊ុំ រ៉េត ឲ្យ​ដឹង​ថា ក្រុមហ៊ុន​មាន​គោល​នយោបាយ​ដោះដូរ​សំណង​រួច​ហើយ ក៏ប៉ុន្តែ​ពលរដ្ឋ​មួយ​ចំនួន​នៅ​តែ​មិន​យល់ព្រម​ទទួល​សំណង ហើយ​ក្រុមហ៊ុន​បាន​ត្រៀម​ផ្ទះ​សម្រាប់​អ្នក​ភូមិ ព្រម​ទាំង​រក​មធ្យោបាយ​មួយ​ចំនួន​ត្រៀម​សង្គ្រោះ​ពួក​គាត់។ លោក​ពន្យល់​ថា ការ​បិទ​ទ្វារ​ទឹក​សាកល្បង​ក្នុង​មួយ​ថ្ងៃ កម្ពស់​ទឹក​នឹង​ឡើង​កម្ពស់​មួយ​ម៉ែត្រ ហើយ​រហូត​មក​ទល់​ពេល​នេះ កម្ពស់​ទឹក​បាន​កើន​ឡើង ៦០​ម៉ែត្រ​ធៀប​កម្ពស់​នីវ៉ូ​ទឹក​សមុទ្រ។

លោក​បន្ត​ថា ក្រុមហ៊ុន​នៅ​បន្ត​បិទ​រហូត​ដល់​កម្ពស់ ៦៨​ម៉ែត្រ និង​ផ្អាក​ជា​បណ្ដោះអាសន្ន​សិន រង់ចាំ​មន្ត្រី​បច្ចេកទេស​ត្រួត​ពិនិត្យ​បញ្ហា​នានា​សិន មុន​សម្រេច​បិទ​ទ្វារ​ទឹក​រហូត​ដល់ ៧២​ម៉ែត្រ។ លោក​អះអាង​ថា បើ​ក្រុមហ៊ុន​បិទ​ទ្វារ​ទឹក​រហូត​ដល់ ៧២​ម៉ែត្រ នឹង​បង្ក​ឲ្យ​លិចលង់​ភូមិ​ស្រែគរ និង​ភូមិ​ក្បាលរមាស​ចាស់៖ «ខាង​អាំងស៊ីញ័រ (វិស្វករ) គេ​មើល​បច្ចេកទេស​ផ្សេងៗ តើ​វា​មាន​លិច​ត្រង់​ណា​អត់​ចឹង ហើយ​នឹង​បន្ត​ការ​បិទ​រហូត​ដល់ ៧២​ម៉ែត្រ បន្ទាប់​មក​នឹង​មើល​មួយ​សា​ទៀត បន្ទាប់​មក​បាន​យើង​មើល​ពលរដ្ឋ​ដែល​នៅ​សេសសល់​ហ្នឹង​ដែរ»

លោក អ៊ុំ រ៉េត បាន​បដិសេធ​ចំពោះ​ព័ត៌មាន​ដែល​ផ្សាយ​ថា ក្រុមហ៊ុន និង​អាជ្ញាធរ ឲ្យ​អ្នក​ភូមិ​ចាកចេញ​ពី​ភូមិ​កំណើត​ដោយ​បង្ខំ និង​ហិង្សា។ លោក​ចាត់​ទុក​ការ​លើក​ឡើង​នេះ ថា​ជា​ការ​មួលបង្កាច់​គ្មាន​ការពិត។ លោក​ថា ក្រុមហ៊ុន​បាន​បន្ទន់​ឥរិយាបថ​ដោយ​សហការ​ជាមួយ​អាជ្ញាធរ​ពាក់ព័ន្ធ ផ្សព្វផ្សាយ​គោល​នយោបាយ​ផ្តល់​សំណង​ដល់​ពលរដ្ឋ​នៅ​តំបន់​នោះ៖ «ព្រោះ​រាល់​ថ្ងៃ​នេះ យើង​ធ្វើ​ការ​ថ្នម​ពលរដ្ឋ​ទៅ​ទៀត ដោយសារ​យើង​មិន​ចង់​ឲ្យ​មាន​ពាក្យ​ចចាមអារ៉ាម​ចឹង»

អ្នក​នាំ​ពាក្យ​សាលា​ខែត្រ​ស្ទឹងត្រែង លោក ម៉ែន គុង លើក​ឡើង​ថា អាជ្ញាធរ​ខែត្រ​មាន​ផែនការ​អន្តរាគមន៍​ជួយ​ពលរដ្ឋ និង​បាន​ចាត់​ឲ្យ​សមត្ថកិច្ច​ប្រចាំ​ការ​ឈរ​ជើង​តាម​គោលដៅ​នីមួយៗ ដើម្បី​ត្រៀម​លក្ខណៈ​ជួយ​សង្គ្រោះ​ពលរដ្ឋ និង​ដឹក​ជញ្ជូន​សម្ភារៈ។ លើស​ពី​នេះ អាជ្ញាធរ​ខែត្រ​បាន​ជំរុញ​ឲ្យ​ក្រុមហ៊ុន​រៀបចំ​លំនៅឋាន​ត្រៀម​សម្រាប់​ពលរដ្ឋ​ដែល​មិន​ទាន់​យល់ព្រម​ទទួល​យក​សំណង​ជាង ១០០​គ្រួសារ ហើយ​ក្នុង​ករណី​ពលរដ្ឋ​បំបែក​គ្រួសារ អាជ្ញាធរ​ខែត្រ​បាន​រៀបចំ​គោល​នយោបាយ​ផ្តល់​សំណង​រួច​ហើយ៖ «ពាក្យ​ថា​ផែនការ​អន្តរាគមន៍ គេ​និយាយ​គ្រប់​វិស័យ​ទាំងអស់ ដើម្បី​ឆ្លើយតប​ករណី​ដោះស្រាយ​បន្ទាន់​ហ្នឹង»

រហូត​មក​ទល់​ពេល​នេះ ទំនប់​វារីអគ្គិសនី​សេសាន​ក្រោម​ពីរ ត្រូវ​បាន​ក្រុមហ៊ុន​សាងសង់​ជិត​រួច​រាល់​ហើយ នឹង​បើក​ឲ្យ​ដំណើរការ​តួប៊ីន​ទី​១ នៅ​ពេល​ឆាប់ៗ​នេះ ក៏ប៉ុន្តែ​ពលរដ្ឋ​រស់នៅ​ឃុំ​ស្រែគរ ១២៤​គ្រួសារ និង​ឃុំ​ក្បាលរមាស ៥៨​គ្រួសារ មិន​ទាន់​យល់ព្រម​ទទួល​សំណង និង​មិន​ទាន់​ចាកចេញ​ពី​ភូមិ​ចាស់​ទៅ​តាំង​ទីលំនៅ​ថ្មី​នៅ​ឡើយ​ទេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
  • បោះពុម្ព
  • ចែករំលែក
  • អ៊ីម៉ែល
គេហទំព័រ​ទាំងមូល