តំណាងប្រជាពលរដ្ឋរងផលប៉ះពាល់ដោយការសាងសង់ទំនប់វារីអគ្គិសនីសេសានក្រោម២ ក្នុងខេត្តស្ទឹងត្រែង បាននាំគ្នាយកញត្តិឡើងមកតវ៉ានៅរាជធានីភ្នំពេញ នៅថ្ងៃទី១៣ កុម្ភៈ នេះ ដើម្បីទាមទារឲ្យស្ថាប័នពាក់ព័ន្ធដោះស្រាយសំណងចំពោះផលប៉ះពាល់ពីទំនប់វារីអគ្គិសនីក្នុងមូលដ្ឋានគាត់។
កញ្ញា ណែន សុគិត តំណាងប្រជាពលរដ្ឋរងផលប៉ះពាល់ ឲ្យដឹងថា ការទាមទារនោះ គឺសុំឲ្យរដ្ឋាភិបាល និងស្ថានទូតចិន រួមទាំងក្រុមហ៊ុនសាងសង់ទំនប់វារីអគ្គិសនីនេះ ជួយជំរុញឲ្យរដ្ឋាភិបាលបង្កើតវេទិកាសាធារណៈ ឲ្យប្រជាពលរដ្ឋចូលរួមពិភាក្សាស្ដីពីការផ្តល់សំណងផលប៉ះពាល់ឲ្យពួកគាត់ឲ្យបានត្រឹមត្រូវ។ កញ្ញា ណែន សុគិត បញ្ជាក់ថា រដ្ឋាភិបាល និងក្រុមហ៊ុនបានចេញគោលការណ៍កំណត់តម្លៃនៃសំណងនៃផលប៉ះពាល់ ដោយមិនបានផ្តល់ព័ត៌មានដល់ប្រជាពលរដ្ឋពុំមានកិច្ចពិគ្រោះយោបល់ ដើម្បីឲ្យមានការព្រមព្រៀងគ្នាជាមុននោះទេ។
កញ្ញាបន្តថា ការអនុវត្តនេះធ្វើឡើងផ្ទុយពីនីតិវិធី ឬយន្តការដោះស្រាយផលប៉ះពាល់ដែលអាជ្ញាធររដ្ឋាភិបាលបានផ្សព្វផ្សាយកន្លងមក៖ «នៅក្នុងយន្តការដោះស្រាយផលប៉ះពាល់ គេរៀបចំតាំងពីចុះសម្ភាសប្រជាជន ចុះស្រង់ដំណាំស្រង់អីរបស់ប្រជាជន ប៉ុន្តែដល់ពេលជាក់ស្តែង គេអត់មានធ្វើអ៊ីចឹងផង ស្រាប់តែចេញគោលនយោបាយដោះស្រាយតែម្តង»។
ក្រុមអ្នកតវ៉ាឲ្យដឹងថា គោលនយោបាយផ្តល់សំណងថ្លៃផលប៉ះពាល់នោះ ចេញកាលពីថ្ងៃទី១៧ ខែមករា ដោយកំណត់សងលើដំណាំហូបផ្លែមួយដើមចាប់ពី ២០ ទៅ ៣០ដុល្លារ ផ្ទះប្រភេទលេខមួយ មួយម៉ែត្រការ៉េ ៧០ដុល្លារ ប្រភេទលេខពីរ ៥០ ផ្តល់ដី ៥ហិកតារក្នុងមួយគ្រួសារ តែពុំទាន់បញ្ជាក់ទីតាំងច្បាស់លាស់នោះទេ។ ប្រជាពលរដ្ឋបញ្ជាក់ថា សំណងទាំងនេះ គឺផ្ទុយពីឆន្ទៈរបស់ប្រជាពលរដ្ឋ និងទាមទារឲ្យមានការពិភាក្សាផ្ទាល់ជាមួយប្រជាពលរដ្ឋឡើងវិញ។
វិទ្យុអាស៊ីសេរី ពុំទាន់អាចសុំការឆ្លើយតបពីរដ្ឋមន្ត្រីក្រសួងរ៉ែ និងថាមពល និងប្រធានក្រុមហ៊ុន រ៉ូយ៉ាល់ គ្រុប ដែលជាភាគីមួយនៃគម្រោងនេះ ដោយលោកឆ្លើយថាជាប់រវល់។
តំណាងប្រជាពលរដ្ឋទាំងនោះបានដាក់ញត្តិតាមក្រសួងពាក់ព័ន្ធមួយចំនួន ដូចជា ក្រសួងសេដ្ឋកិច្ច និងហិរញ្ញវត្ថុ ក្រសួងបរិស្ថាន ក្រសួងរ៉ែ និងថាមពល ព្រឹទ្ធសភា រដ្ឋសភា រួមទាំងដាក់ញត្តិនោះនៅស្ថានទូតចិន ទៀត ព្រោះក្រុមហ៊ុនវិនិយោគវារីអគ្គិសនីជាក្រុមហ៊ុនមកពីប្រទេសចិន។
មន្ត្រីសម្របសម្រួលទន្លេបី លោក មៀច មាន ឲ្យដឹងថា មកទល់ពេលនេះ ប្រជាពលរដ្ឋ ១២គ្រួសារហើយដែលត្រូវជម្លៀសចេញពីភូមិ តែមិនបានទទួលសំណងត្រឹមត្រូវទេ នៅពេលក្រុមហ៊ុនបានចាប់ផ្ដើមសាងសង់ទំនប់នោះ។ លោកបន្តថា នេះមិនមែនលើកទី១ទេដែលតំណាងប្រជាពលរដ្ឋឡើងមកតវ៉ានៅភ្នំពេញ គឺពួកគាត់បានឡើងមកតវ៉ាច្រើនដងហើយ តែមិនមានដំណោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។