ភ្ញៀវទេសចរជាតិអន្តរជាតិ បានរិះគន់ថ្នាក់ដឹកនាំខេត្តព្រះសីហនុ និងមន្ត្រីនៅតាមមន្ទីរ ឬស្ថាប័នពាក់ព័ន្ធខេត្តនេះ ដែលគ្មានសមត្ថភាពទប់ស្កាត់ ឬគ្រប់គ្រងការបង្ហូរទឹកស្អុយ និងកាកសំណល់កខ្វក់ចូលទៅក្នុងទឹកសមុទ្រ នាំឲ្យទឹកសមុទ្រគ្មានអនាម័យ និងបាត់បង់សោភ័ណភាពឆ្នេរ។
ឆ្លើយតបបញ្ហានេះ អភិបាលខេត្តព្រះសីហនុ លោក ឈិត សុខុន អះអាងថា នឹងពិនិត្យ និងមានវិធានការចំពោះសកម្មភាពបង្ហូរទឹកស្អុយចូលសមុទ្រឲ្យបានប្រសើរនាថ្ងៃអនាគត។
ភ្ញៀវទេសចរក្នុងស្រុក និងបរទេស ខ្ពើមរអើមចំពោះក្លិនស្អុយអសោចដែលភាយចេញពីលូបង្ហូរទឹកស្អុយ និងកាកសំណល់សំរាមចូលទៅក្នុងទឹកសមុទ្រ នាខេត្តព្រះសីហនុ។ ភ្ញៀវទេសចរបរទេសមកពីសហរដ្ឋអាមេរិក និងបារាំង ដែលចូលទៅកម្សាន្តម្តងម្កាលនៅតាមឆ្នេរមួយចំនួន នាខេត្តព្រះសីហនុ ក៏បានរិះគន់អនាម័យឆ្នេរនៃខេត្តទេសចរណ៍មួយនេះ ថាគ្មានអនាម័យ។ ជាងនេះទៀត មានភ្ញៀវទេសចរខ្លះ បានក្អួតចង្អោរកាលបើចុះងូតទឹកសមុទ្រ ហើយឃើញទឹកសមុទ្រពោរពេញទៅដោយកាកសំណល់សំរាម ឬថង់ប្លាស្ទិក និងមានក្លិនស្អុយដូចលាមកអណ្ដែតនៅលើទឹកសមុទ្រតាមឆ្នេរខេត្តព្រះសីហនុ។
កាលពីថ្ងៃទី២៧ ខែតុលា ភ្ញៀវទេសចរជាតិ និងអន្តរជាតិមួយក្រុមមានគ្នាជិត ២០នាក់ ដែលបានជួលទូកទេសចរណ៍ជិះកម្សាន្ត និងចុះងូតទឹកតាមឆ្នេរជ័យជម្នះ ឆ្នេរហាវ៉ៃ និងឆ្នេរអូរឈើទាល បាននិយាយប្រាប់អ្នកយកព័ត៌មានវិទ្យុអាស៊ីសេរី ថា អាជ្ញាធរពាក់ព័ន្ធខេត្តព្រះសីហនុ គ្រប់គ្រងកាកសំណល់ និងការបង្ហូរទឹកស្អុយចូលសមុទ្រមិនទាន់បានត្រឹមត្រូវទេ។
តាមរយៈវិទ្យុអាស៊ីសេរី ភ្ញៀវទេសចរទាំងនោះបានស្នើដល់លោកអភិបាលខេត្តព្រះសីហនុ និងមន្ត្រីនៅតាមមន្ទីរពាក់ព័ន្ធនានា មានមន្ត្រីមន្ទីរទេសចរណ៍ ឬមន្ទីរបរិស្ថានជាដើម គួរចុះត្រួតពិនិត្យតាមឆ្នេរ និងមានវិធានការចំពោះការបង្ហូរទឹកស្អុយ ឬកាកសំណល់ចូលសមុទ្រឲ្យត្រឹមត្រូវ។
ភ្ញៀវទេសចរទាំងជាតិ និងបរទេសភាគច្រើន ដែលចូលមកទស្សនាតាមឆ្នេរខេត្តព្រះសីហនុ បង្ហាញអារម្មណ៍ខកចិត្តកាលបើចុះងូតទឹកសមុទ្រ ហើយឃើញទឹកសមុទ្រពោរពេញទៅដោយសំណល់ថង់ប្លាស្ទិក ឬសំរាមផ្សេងៗ និងទឹកមានក្លិនស្អុយអសោច បានរសាត់ប៉ះរាងកាយ និងអារម្មណ៍ពួកគេ។
ងាកមកប្រជាពលរដ្ឋ និងមន្ត្រីរាជការថ្នាក់ក្រោមមួយចំនួនរស់នៅខេត្តព្រះសីហនុ ក៏បានអះអាងថា ពិតជាមានករណីបង្ហូរទឹកស្អុយតាមលូ និងកាកសំណល់ចូលសមុទ្រពិតមែន ពិសេសឆ្នេរអូរឈើទាល គឺមានលូបង្ហូរទឹកស្អុយដ៏ធំមួយចូលទៅក្នុងសមុទ្រ ដោយមិនបានឆ្លងកាត់អាងចម្រោះទឹកស្អាតទេ។ ក្រៅពីនេះ ក៏មានករណីម្ចាស់ផ្ទះសំណាក់ សណ្ឋាគារ និងភោជនីយដ្ឋានខ្លះទៀតដែលមានទីតាំងនៅជាប់ឆ្នេរសមុទ្រ បានស្ថាបនាលូបង្កប់ក្រោមដីដើម្បីបង្ហូរកាកសំណល់ និងទឹកកខ្វក់ចូលទៅក្នុងសមុទ្រ ដើម្បីបំភ័ន្តភ្នែកអាជ្ញាធរថែមទៀត៖ «ទឹកស្អុយទឹកបង្ហូរចេញពីតាមផ្ទះសំណាក់សណ្ឋាគារ។ បង្ហូរហ្នឹងយូរហើយ ២ឆ្នាំមកហើយ។ តំបន់នេះគេហៅតាចុងអូរឈើទាល។ បង្ហូរចុះពីជិតដើមដូងហ្នឹងចូលមកក្នុងសមុទ្រវិញ។ ចឹងហើយទឹកស្អុយមាំណាស់ពេលដែលអត់មានភ្លៀង គឺធុំក្លិនដូចលាមកសុទ្ធ។ សំណួរ៖ ទឹកហ្នឹងហូរមកពីណាខ្លះ? ទឹកហ្នឹងនិយាយឲ្យចំហូរពីផ្ទះសំណាក់ពីលើតាមប្រព័ន្ធលូចាក់មកហ្នឹងតែម្តង។ ដីបើមើលទៅដីចំហុងមក។ ទឹកនេះ គឺហូរចេញពីផ្ទះ ផ្ទះសំណាក់ និងសណ្ឋាគារ ជាដើម។ ខ្ញុំស្នើដល់ថ្នាក់ដឹកនាំបង្ហូរទឹកស្អុយហ្នឹងទៅកន្លែងផ្សេង កុំបង្ហូរចូលសមុទ្រ ព្រោះមិនល្អទេ គ្មានអនាម័យ និងមានក្លិនស្អុយណាស់។ ត្រូវបង្ហូរចូលទៅក្នុងអាងចម្រោះ ឬទៅកាន់កន្លែងផ្សេងៗ»។
ខេត្តព្រះសីហនុ ដែលមានសក្ដានុពលទេសចរណ៍ និងមានឆ្នេរសមុទ្រដ៏ស្រស់ស្អាត ត្រូវបានប្រសិទ្ធិនាមថាជា តារារះនាទិសនិរតី។
ទាក់ទិនបញ្ហានេះ លោក នូ សុផល ប្រធានមន្ទីរទេសចរណ៍ខេត្តព្រះសីហនុ បានបញ្ជាក់ក្នុងរបាយការណ៍ទិសដៅអនុវត្តន៍សកម្មភាពការងារ និងទិសដៅអភិវឌ្ឍន៍ទេសចរណ៍ ខេត្តព្រះសីហនុ ឆ្នាំ២០១៤-២០១៥ ថា ខេត្តនេះមានបញ្ហាប្រឈមមួយចំនួនក្នុងការអភិវឌ្ឍវិស័យទេសចរណ៍ មានដូចជា ម្ចាស់អាជីវកម្មសេវាកម្មទេសចរណ៍ខ្លះមិនបានចូលរួមអនុវត្តច្បាប់ស្ដីពីទេសចរណ៍ តាមការណែនាំរបស់មន្ទីរនានាទេ។ បញ្ហាភ្ញៀវទេសចរ ប្រតិបត្តិករទេសចរណ៍ និងប្រជាពលរដ្ឋ មិនទាន់ចូលរួមក្នុងការថែរក្សាបរិស្ថាន ឬការទុកដាក់សំរាមក្នុងធុងសំរាម និងការបូមទឹកកខ្វក់ចូលទៅក្នុងសមុទ្រ បានធ្វើឲ្យបាត់បង់សោភ័ណភាព និងគ្មានសណ្ដាប់ធ្នាប់នៅតាមឆ្នេរខេត្តព្រះសីហនុ។
ជាងនេះ លោក នូ សុផល បានសង្កត់ធ្ងន់ថា បញ្ហាចោលសំណល់រឹងរាវ និងថង់ប្លាស្ទិកចូលទៅក្នុងសមុទ្រនៅតែជាកង្វល់សម្រាប់ការអភិវឌ្ឍវិស័យទេសចរណ៍ និងបរិស្ថាននាខេត្តព្រះសីហនុ។
យ៉ាងណាក៏ដោយ លោក ឈិត សុខុន អភិបាលខេត្តព្រះសីហនុ ថ្លែងអះអាងថា នឹងជំរុញឲ្យមន្ត្រីនៅតាមស្ថាប័នពាក់ព័ន្ធខេត្តព្រះសីហនុ ចុះពិនិត្យការបង្ហូរទឹកស្អុយ និងកាកសំណល់ផ្សេងៗចូលទៅក្នុងសមុទ្រ ដើម្បីរក្សាអនាម័យ និងសោភ័ណភាពឆ្នេរសមុទ្រខេត្តព្រះសីហនុ ឲ្យបានឆាប់បំផុត។ លោកថា ករណីបង្ហូរទឹកស្អុយនេះ លោកធ្លាប់បានបង្កើតឲ្យមានអាងសម្រាប់ស្តុកទឹកកខ្វក់មួយកន្លែង សម្រាប់បូមទឹកស្អុយចេញពីតំបន់នានាចូលទៅក្នុងអាងចម្រោះទឹកស្អាត មុននឹងបង្ហូរចូលទៅក្នុងសមុទ្រ។ ប៉ុន្តែលោកថា នឹងចាត់ឲ្យមន្ត្រីពាក់ព័ន្ធ ចុះអនុវត្ត ឬមានវិធានការចំពោះបញ្ហាបង្ហូរទឹកកខ្វក់នេះឲ្យបានត្រឹមត្រូវនាថ្ងៃអនាគត៖ «អាហ្នឹងហូរចេញពីកន្លែងណា ឬចេញប្រភពណា យើងរកមើលផ្ទះណាហ្នឹង យើងឲ្យគាត់បូមទៅចាក់នៅក្នុងអាងចម្រោះ។ ហូរនៅកន្លែងណាចាំមើលខ្ញុំឲ្យបរិស្ថានទៅមើលថែមទៀតមើល។ ព្រោះកាលពីនៅពេលសែនបុណ្យភ្ជុំកន្លងទៅ យើងបានឲ្យផ្ទះសំណាក់ទាំងអស់ហ្នឹងនាំគ្នាបូម ហើយឥឡូវហ្នឹងបើសិនជាអាងហ្នឹងមានបញ្ហាយ៉ាងម៉េចអីម៉េច ចាំឲ្យខាងបរិស្ថានពិនិត្យមើល»។
បញ្ហានេះដែរ លោក ថោង ខុន រដ្ឋមន្ត្រីក្រសួងទេសចរណ៍ បានដឹកនាំមន្ត្រីពាក់ព័ន្ធខេត្តព្រះសីហនុ បើកយុទ្ធនាការបំផុសឲ្យប្រជាពលរដ្ឋ និងអាជីវករ ចូលរួមរក្សាអនាម័យឆ្នេរឲ្យបានគ្រប់គ្នា ដើម្បីទាក់ទាញភ្ញៀវទេសចរចូលទស្សនាកាន់តែច្រើននាថ្ងៃអនាគត។ យុទ្ធនាការនេះ ធ្វើឡើងនៅលើកោះរ៉ុង កាលពីថ្ងៃទី១៤ ខែតុលា ឆ្នាំ២០១៤។
ឆ្នេរសមុទ្រប្រទេសកម្ពុជា សរុបមានប្រវែង ៤៤០គីឡូម៉ែត្រ។ ខេត្តមានមូលដ្ឋានជាប់ឆ្នេរសមុទ្ររួមមាន ខេត្តកោះកុង ខេត្តព្រះសីហនុ ខេត្តកំពត និងខេត្តកែប។ ខេត្តទាំង ៤នេះ ត្រូវបានបញ្ចូលជាសមាជិកពេញសិទ្ធិរបស់ក្លឹបឆ្នេរសមុទ្រស្អាតបំផុតលើសកលលោក កាលពីថ្ងៃទី២៦ ខែឧសភា ឆ្នាំ២០១១ នៅប្រទេសសេណេហ្គាល់ (Senegal)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។