ប៉ូលិសខេត្តសៀមរាបបិទការដ្ឋានជីករ៉ែទង់ដែងរបស់ក្រុមហ៊ុនចិននៅស្រុកជីក្រែង
2016.01.20
ក្រុមប៉ូលិសឈរថតនៅមុខរណ្ដៅដីដែលក្រុមហ៊ុនចិន ជីកយករ៉ែទង់ដែង នាឃុំខ្វាវ ស្រុកជីក្រែង ខេត្តសៀមរាប កាលពីថ្ងៃទី១៤ ខែមករា ឆ្នាំ២០១៦។
RFA/Hang Savyouth
ប៉ូលិសនៃការិយាល័យប្រឆាំងបទល្មើសសេដ្ឋកិច្ច កំពុងរង់ចាំបញ្ជាពីតុលាការខេត្តសៀមរាប ថាតើនឹងត្រូវតាមរកចាប់ខ្លួនថៅកែចិន នៃក្រុមហ៊ុន ម៉េង សេង ហុងហ្វា ដែលបានចូលទៅជីកយករ៉ែទង់ដែងដោយខុសច្បាប់ នៅក្នុងភូមិសាស្ត្រឃុំខ្វាវ ស្រុកជីក្រែង ចម្ងាយជាង ១០០គីឡូម៉ែត្រភាគឦសានពីទីរួមខេត្តសៀមរាប នោះឬក៏យ៉ាងណា។
កាលពីថ្ងៃទី១៤ ខែមករា កន្លងទៅ សមត្ថកិច្ចបានចុះទៅបង្ក្រាបកន្លែងជីកយករ៉ែទង់ដែងរបស់ក្រុមហ៊ុនចិន នៅលើផ្ទៃដីទំហំប្រមាណ ៣.៦០០ហិកតារ។
មន្ត្រីប៉ូលិសនៃការិយាល័យប្រឆាំងបទល្មើសសេដ្ឋកិច្ចខេត្តសៀមរាប ឲ្យដឹងថា គេបានធ្វើកំណត់ហេតុជាច្រើនច្បាប់ ដើម្បីបិទការដ្ឋានរបស់ក្រុមហ៊ុនចិន ឈ្មោះ ម៉េង សេង ហុងហ្វា មិនឲ្យធ្វើសកម្មភាពជីកយករ៉ែទង់ដែងពីក្រោមដី ក្នុងភូមិសាស្ត្រឃុំខ្វាវ ស្រុកជីក្រែង បានតទៅទៀតទេ។
ប្រធានការិយាល័យប៉ូលិសប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តសៀមរាប គឺលោក សឿង សេន។ លោកមានប្រសាសន៍កាលពីរសៀលថ្ងៃពុធ ទី២០ ខែមករា ថា រយៈពេលជាង ៣ឆ្នាំមកនេះ ក្រុមហ៊ុនចិន ឈ្មោះ ម៉េង សេង ហុងហ្វា បានចូលទៅជីកយករ៉ែទង់ដែងលើផ្ទៃដីទំហំ ៣.៦០០ហិកតារ ប៉ុន្តែក្រុមហ៊ុនចិន នោះ មិនមានអាជ្ញាប័ណ្ណ និងលក្ខណៈគ្រប់គ្រាន់តាមផ្លូវច្បាប់ទេ។ លោក សឿង សេន បញ្ជាក់ថា សមត្ថកិច្ចបានសម្រេចធ្វើកំណត់ហេតុបិទការដ្ឋានជីកយករ៉ែទង់ដែងនោះ មិនឲ្យធ្វើសកម្មភាពតទៅទៀតបានទេ៖ «ប៉ូលិសបានធ្វើកំណត់ហេតុបិទហើយ គឺហាមមិនឲ្យដំណើរការផលិតកម្ម សង្វាក់ផលិតកម្មតទៅទៀត នៅពេលដែលគ្មានអាជ្ញាប័ណ្ណបន្តពីក្រសួងឧស្សាហកម្ម រ៉ែ និងថាមពល»។
កាលពីថ្ងៃទី១៤ ខែមករា កន្លងទៅ សមត្ថកិច្ចបានចុះទៅបង្ក្រាបការដ្ឋានជីកយករ៉ែទង់ដែងនោះ ព្រមទាំងនាំខ្លួនជនជាតិចិន ២នាក់ ដែលជាមេការ និងជាអ្នកបើកឡានមកឲ្យតុលាការខេត្តសៀមរាប សាកសួរ។ ចំណែកឯថៅកែក្រុមហ៊ុនចិន នោះ គេដឹងថាបានចាកចេញទៅកាន់ប្រទេសវៀតណាម ទៅហើយ។
អភិបាលស្រុកជីក្រែង លោក ពៅ ប៊ុនធឿន មានប្រសាសន៍ថា បច្ចុប្បន្ន លោកបានចាត់កម្លាំងប៉ូលិសប៉ុស្តិ៍ខ្វាវ ឲ្យឃ្លាំមើលការដ្ឋានរ៉ែទង់ដែងនោះ ខ្លាចក្រែងមានអ្នកមកបើកធ្វើសកម្មភាពរុករករ៉ែតទៅទៀត៖ «ឥឡូវយើងកំពុងអនុវត្តតាមបញ្ជាព្រះរាជអាជ្ញា ដែលឲ្យអាជ្ញាធរមូលដ្ឋានស្រុកជីក្រែង នេះតាមឃ្លាំមើល»។
រយៈពេលជាង ៣ឆ្នាំមកហើយ ក្រុមហ៊ុនចិន ឈ្មោះ ម៉េង សេង ហុងហ្វា បានជីកយករ៉ែទង់ដែងនៅឃុំខ្វាវ ស្រុកជីក្រែង ជាច្រើនតោន ដឹកជញ្ជូនចេញទៅកាន់កន្លែងផ្សេងទៀត។
កាលពីអំឡុងខែកញ្ញា ឆ្នាំ២០១៥ កន្លងទៅ សមត្ថកិច្ចខេត្តកំពង់ធំ ធ្លាប់បានចាប់ឡានរបស់ក្រុមហ៊ុនចិន ម៉េង សេង ហុងហ្វា ចំនួន ២គ្រឿង ហើយរឹបអូសយកបានសារធាតុរ៉ែទង់ដែងពាក់កណ្ដាលសម្រេចចំនួនជាង ៤០តោន។
ក្រុមហ៊ុនចិន ឈ្មោះ ម៉េង សេង ហុងហ្វា គឺបានចូលទៅជីកយករ៉ែទង់ដែងនៅភូមិសាស្ត្រឃុំខ្វាវ ស្រុកជីក្រែង ខេត្តសៀមរាប ដោយទទួលអាជ្ញាប័ណ្ណបន្តពីក្រុមហ៊ុន ណឹប ម៉េងគ្រុប កាលពីអំឡុងឆ្នាំ២០១២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ