វត្តអារាមជិត ១០០វត្ត នៅខេត្តចំនួន ៣ ត្រូវបានរងគ្រោះដោយសារទឹកជំនន់នៅក្នុងឆ្នាំនេះ។ មន្ត្រីជាន់ខ្ពស់នៃក្រសួងធម្មការនិងសាសនាបញ្ជាក់ថា វត្តនៅខេត្តក្រចេះ និងខេត្តកំពង់ធំ រងគ្រោះធ្ងន់ធ្ងរជាងគេរហូតធ្វើឲ្យព្រះសង្ឃខ្លះត្រូវបង្ខំព្រះទ័យនិមន្តចេញពីវត្តមកគង់នៅទីទួលមានសុវត្ថិភាពបណ្ដោះអាសន្ន។
តាមរបាយការណ៍ផ្លូវការពីក្រសួងធម្មការបង្ហាញថា ខេត្តបន្ទាយមានជ័យ មាន ៨វត្ត ត្រូវបានរងគ្រោះដោយសារទឹកជំនន់ ហើយខេត្តស្ទឹងត្រែង មាន ១៣វត្ត បានជន់លិចដែរ។ ប៉ុន្តែទំហំធ្ងន់ធ្ងរប៉ុណ្ណោះ មិនបានលម្អិតក្នុងរបាយការណ៍នោះទេ។
ប្រធាននាយកដ្ឋានកិច្ចការធម្មការនៃក្រសួងធម្មការ លោក ង៉ែត ច័ន្ទបូ មានប្រសាសន៍នៅថ្ងៃទី២ ខែតុលា ថា ខេត្តក្រចេះជាខេត្តដែលមានវត្តអារាមរងគ្រោះដោយសារទឹកជំនន់ច្រើនជាងគេ គឺមានរហូត ៤១វត្ត បន្ទាប់មកគឺខេត្តកំពង់ធំ៖ «តាមព័ត៌មានមកគឺពុទ្ធបរិស័ទពិបាកធ្វើដំណើរទៅប្រគេនចង្ហាន់លោក។ ធ្វើដំណើរតាមទូកទៅ ខ្លះដើរកាត់ទឹក និយាយរួមមធ្យោបាយហ្នឹងតាមទូកទៅ ប៉ុន្តែមិនដល់ថ្នាក់ដាច់ចង្ហាន់ទេ»។
លោក ង៉ែត ច័ន្ទបូ បញ្ជាក់ថា ទឹកជំនន់នៅឆ្នាំនេះធំជាងរាល់ឆ្នាំ ហើយធ្វើឲ្យវត្តមួយចំនួនជន់លិចខ្លាំង រហូតឲ្យពុទ្ធបរិស័ទធ្វើដំណើរដោយទូកដើម្បីយកចង្ហាន់ទៅប្រគេនព្រះសង្ឃក្នុងពិធីបុណ្យកាន់បិណ្ឌ និងភ្ជុំបិណ្ឌ។ លោកបន្តថា ព្រះសង្ឃខ្លះត្រូវបង្ខំព្រះទ័យនិមន្តចេញពីវត្តបណ្ដោះអាសន្ននៅទីទួលមានសុវត្ថិភាព ដោយសារវត្តខ្លះជន់លិចខ្លាំងពេក។
ប្រធានការិយាល័យព័ត៌មាននៃមន្ទីរព័ត៌មានខេត្តក្រចេះ លោក សើន រ័ត្ន មានប្រសាសន៍វត្តមួយចំនួននៅក្នុងខេត្តនេះ ពិតជាបានជន់លិចដោយសារទឹកជំនន់ពិតមែន។ យ៉ាងណាពុទ្ធបរិស័ទមិនបានបោះបង់ព្រះសង្ឃរងចាំព្រះវស្សាទេ គឺតែងតែធ្វើចង្ហាន់ទៅប្រគេនព្រះសង្ឃតាមវេនរៀងៗខ្លួនក្នុងពិធីបុណ្យកាន់បិណ្ឌ។
លោកបន្តថា ពុទ្ធបរិស័ទភាគច្រើនបានធ្វើដំណើរដោយទូកដើម្បីយកចង្ហាន់ទៅវត្តត្បិតទឹកជំនន់ដែលជន់លិចយ៉ាងគំហុកនោះ បានថយចុះជាបណ្តើរៗ៖ «ព្រះសង្ឃមិនបាននិមន្តចេញពីវត្តដែលបានជន់លិចទេ ពុទ្ធបរិស័ទធ្វើចង្ហាន់ទៅប្រគេនលោកធម្មតា ប៉ុន្តែប្រជាពលរដ្ឋជាពុទ្ធបរិស័ទពិបាកត្រង់ថា នាំយកចង្ហាន់សព្វបែបសព្វយ៉ាងទៅប្រគេនព្រះសង្ឃ ដោយសារតែគាត់ពិបាកក្នុងការធ្វើដំណើរដោយសារឆ្លងទឹក»។
រដ្ឋមន្ត្រីក្រសួងអប់រំយុវជននិងកីឡា លោក ហង់ ជួនណារ៉ុន មានប្រសាសន៍កាលពីថ្ងៃទី១ ខែតុលា ថា មានសាលារៀនចំនួន ៣៣៦ទូទាំងប្រទេស ត្រូវបានបិទទ្វារបណ្ដោះអាសន្ន មិនអាចបើកបវេសនកាលសម្រាប់ឆ្នាំសិក្សាថ្មី២០១៣-២០១៤ បាន ដោយសារតែរងគ្រោះដោយសារទឹកជំនន់ ទឹកភ្លៀងយ៉ាងជោកជាំ។
មន្ត្រីជាន់ខ្ពស់នៃគណៈកម្មាធិការជាតិគ្រប់គ្រងគ្រោះមហន្តរាយឲ្យដឹងថា តួលេខបឋម ទឹកជំនន់នៅទូទាំងប្រទេសបានសម្លាប់មនុស្សជាង ៣០នាក់ និងបង្ខំពលរដ្ឋរាប់ពាន់គ្រួសារផ្សេងទៀតឲ្យជម្លៀសចេញពីផ្ទះសំបែង។ ទឹកជំនន់ទន្លេមេគង្គលើនៅខេត្តក្រចេះ ស្ទឹងត្រែង កំពង់ចាម ចាប់ផ្ដើមស្រកក៏ពិតមែន ប៉ុន្តែតាមការព្យាករកម្ពស់ទឹកអាចនឹងហក់ឡើងវិញ បើសិនជាមានភ្លៀងធ្លាក់ខ្លាំង។ សន្ទូងនិងដំណាំផ្សេងៗរាប់ពាន់ហិកតារ ត្រូវបានជន់លិចយូរ បណ្ដាលឲ្យរលួយនិងខូចខាតស្ទើរទាំងស្រុង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។