ប្រជាពលរដ្ឋរងគ្រោះដោយខ្យល់កន្ត្រាក់ជាង ២០គ្រួសារនៅស្រុកសំឡូត ខេត្តបាត់ដំបង អំពាវនាវឲ្យអាជ្ញាធរពាក់ព័ន្ធ ជាពិសេសមន្ត្រីកាកបាទក្រហមកម្ពុជាខេត្ត ចុះជួយ និងផ្ដល់ជាសម្ភារៈផ្សេងៗសម្រាប់សង់ទីស្នាក់អាស្រ័យជូនពួកគាត់ឲ្យបានឆាប់រហ័ស។ ការអំពាវនាវនេះ ធ្វើឡើងបន្ទាប់ពីអ្នកភូមិត្រូវខ្យល់កន្ត្រាក់ប៉ើងដំបូលផ្ទះ ហើយមិនមានអាជ្ញាធរណាចុះទៅជួយពួកគាត់នៅឡើយ។
ប្រជាពលរដ្ឋដែលរងគ្រោះដោយសារខ្យល់កន្ត្រាក់នៅស្រុកសំឡូត កំពុងទន្ទឹងរង់ចាំជំនួយពីសំណាក់អាជ្ញាធរពាក់ព័ន្ធ ដើម្បីយកទៅសង់ផ្ទះស្នាក់នៅរបស់ពួកគាត់។
ជនជាតិដើមភាគតិចព័រ នៅស្រុកសំឡូត លោកស្រី សុខ រ៉េ ឲ្យដឹងនៅថ្ងៃទី២០ មិថុនា ថា កាលពីរសៀលថ្ងៃទី១៩ មិថុនា ខ្យល់កន្ត្រាក់បានបក់ប៉ើងដំបូលផ្ទះរបស់លោកស្រីអស់ស័ង្កសីជាង ១០សន្លឹក និងខូចខាតទ្រព្យសម្បត្តិនៅក្នុងផ្ទះមួយចំនួនទៀត។ លោកស្រីអះអាងថា ពុំទាន់មានអាជ្ញាធរចុះទៅជួយគ្រួសារលោកស្រីនៅឡើយទេ។ លោកស្រីកំពុងព្រួយបារម្ភក្រែងមានភ្លៀងធ្លាក់គ្មានទីជម្រក ដោយសារពុំមានថវិកាសម្រាប់ជួសជុលផ្ទះស្នាក់នៅ៖ « កន្ត្រាក់នេះធ្វើឲ្យបីនាក់ឪពុក និងកូន ដេកឱបគ្នាញ័រដូចកូនសត្វ។ រាល់ថ្ងៃ ខ្ញុំសម្រាកនៅផ្ទះម្ដាយក្មេកខ្ញុំ ព្រោះផ្ទះខ្ញុំសម្រាកអត់កើតទេ »។
ទាក់ទងនឹងបញ្ហានេះ ជំទប់ទី២ ឃុំតាតោក លោក អឹម មៀត មានប្រសាសន៍ថា លោកបានចុះស្រង់ឈ្មោះផ្ទះប្រជាពលរដ្ឋនៅក្នុងឃុំដែលរងគ្រោះដោយខ្យល់កន្ត្រាក់ធ្ងន់ធ្ងរមានចំនួន ១៥ខ្នង និងបាក់ដើមឈើសង្កត់ផ្លូវ ហើយខូចខាតផលដំណាំរបស់អ្នកស្រុកមួយចំនួនទៀត។ លោកអះអាងថា ខ្យល់កន្ត្រាក់លើកនេះមានកម្លាំងខ្លាំងក្លាជាងពេលណាៗទាំងអស់៖ « គ្រាន់តែងងឹតភ្លាម ស្រាប់តែខ្យល់បក់វឹបយកតែម្ដង ធ្វើឲ្យប្រជាពលរដ្ឋខ្លះភ័យខ្លាចក៏នាំគ្នារត់ទៅរកទីសុវត្ថិភាពរៀងខ្លួន។ ប៉ុន្តែខ្យល់កន្ត្រាក់មានរយៈខ្លីប្រមាណកន្លះម៉ោង ស្ងប់ស្ងាត់វិញ »។
រីឯអភិបាលស្រុកសំឡូត លោក ឥន សៅរិទ្ធ មានប្រសាសន៍ថា ប្រជាពលរដ្ឋរងគ្រោះដោយខ្យល់កន្ត្រាក់ សរុបទាំងអស់ចំនួន ២១ខ្នង ស្ថិតនៅឃុំចំនួន២ រួមមាន ឃុំកំពង់ល្ពៅ និងឃុំតាតោក ក្នុងនោះឃុំតាតោក ច្រើនជាងគេ។ ទោះបីជាយ៉ាងណា លោកអះអាងថា ចំនួនផ្ទះពលរដ្ឋរងគ្រោះអាចនឹងកើនឡើងទៀត ពីព្រោះអាជ្ញាធរមូលដ្ឋានកំពុងចុះស្រាវជ្រាវមិនទាន់ចប់នៅឡើយ។ លោកបញ្ជាក់ថា ក្រោយពីអាជ្ញាធរស្រង់តួលេខផ្ទះពលរដ្ឋរងគ្រោះរួចរាល់ហើយ និងបញ្ជូនទៅសាខាកាកបាទក្រហមខេត្តបាត់ដំបង ដើម្បីចុះជួយប្រជាពលរដ្ឋក្នុងពេលឆាប់ៗ៖ « ខ្ញុំកំពុងតែរៀបចំបញ្ជូនឈ្មោះទៅកាកបាទក្រហមខេត្ត ប្រហែលជាថ្ងៃទី២១ មិថុនា ព្រោះភ្លាមៗយើងធ្វើមិនទាន់ ដោយសារផ្ទះប្រជាពលរដ្ឋមួយចំនួននៅឆ្ងាយពីគ្នា »។
នៅក្នុងចំណោមផ្ទះពលរដ្ឋរងគ្រោះដោយខ្យល់កន្ត្រាក់ មានផ្ទះរបស់ជនជាតិភាគតិចព័រ ខូចខាតចំនួន ៦ខ្នងដែរ។ ទោះបីជាយ៉ាងណា អាជ្ញាធរស្រុកឲ្យដឹងថា ខ្យល់កន្ត្រាក់នេះពុំបណ្ដាលឲ្យប្រជាពលរដ្ឋណាម្នាក់គ្រោះថ្នាក់ដល់អាយុជីវិតនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។