កម្លាំងសមត្ថកិច្ចចម្រុះខេត្តកំពង់ឆ្នាំង ជាង ១០០នាក់ កំពុងសង្គ្រោះពលរដ្ឋជិត ២០០គ្រួសារដែលរងគ្រោះដោយសារខ្យល់ព្យុះកន្ទ្រាក់លាយភ្លៀងកាលពីរសៀលថ្ងៃទី១៩ ខែមិថុនា។ គ្រោះធម្មជាតិនេះ បានបង្កឲ្យផ្ទះពលរដ្ឋនៅស្រុកពីរនៃខេត្តកំពង់ឆ្នាំង សរុប ១៩៣ខ្នង ត្រូវខូចខាត និងមនុស្សពីរនាក់របួស ក្នុងនោះម្នាក់របួសធ្ងន់កំពុងសម្រាកព្យាបាលនៅមន្ទីរពេទ្យ។
របាយការណ៍កាកបាទក្រហមកម្ពុជា សាខាខេត្តកំពង់ឆ្នាំង ចេញផ្សាយនៅថ្ងៃទី២០ ខែមិថុនា បង្ហាញថា ឃុំច្រេស និងឃុំលង្វែក នៃស្រុកកំពង់ត្រឡាច និងឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង បានរងគ្រោះដោយខ្យល់ព្យុះកន្ទ្រាក់។ មន្ត្រីកាកបាទក្រហមកម្ពុជា ថាកម្លាំងយោធា ប៉ូលិស និងប៉េអិមដែលចុះអន្តរាគមន៍រុះរើ ឬជួសជុលផ្ទះស្នាក់នៅបណ្ដោះអាសន្ន អាចបន្តការងារដល់ថ្ងៃទី២១ ខែមិថុនា។
ប្រធានកាកបាទក្រហមកម្ពុជា សាខាខេត្តកំពង់ឆ្នាំង លោក ប្រាក់ សោភ័ណ្ឌ មានប្រសាសន៍ថា លោកបានបញ្ជូនរបាយការណ៍នេះទៅទីស្នាក់ការកណ្ដាលរបស់កាកបាទក្រហមកម្ពុជា រួចហើយ ប៉ុន្តែនៅចំពោះមុខ កម្លាំងសមត្ថកិច្ចចម្រុះជួយសង្គ្រោះពលរដ្ឋបឋមសិន ទើបកំណត់ថ្ងៃចែកស្បៀង ឬសម្ភារៈផ្សេងៗដល់ប្រជាពលរដ្ឋរងគ្រោះទាំង ១៩៣គ្រួសារនោះ៖ «ស្បៀងអាហារយើងនឹងជួយបន្ទាប់នេះ ហើយខ្ញុំកំពុងបញ្ជូនតួលេខទៅទីស្នាក់ការកណ្ដាលរបស់កាកបាទក្រហមកម្ពុជា។ ខ្ញុំរាយការណ៍ជូនទៅសម្ដេចគតិព្រឹទ្ធបណ្ឌិត ដើម្បីឲ្យលោកបានជ្រាប ហើយយើងនឹងជូនដំណឹងពេលក្រោយថា យើងនឹងចែកជូនពួកគាត់នៅថ្ងៃណា ?»។
លោកបញ្ជាក់ថា នៅឃុំច្រេស និងឃុំលង្វែក ស្រុកកំពង់ត្រឡាច មានផ្ទះដួលរលំ ២៩ខ្នង និងខូចខាតមធ្យម ៨០ខ្នង។ ចំណែកនៅឃុំស្វាយ ស្រុកសាមគ្គីមានជ័យ ដួលរលំ ៥ខ្នង និងខូចខាតមធ្យម ៨០ខ្នង។
ចំណែកស្នងការរង និងជាអ្នកនាំពាក្យស្នងការដ្ឋាននគរបាលខេត្តកំពង់ឆ្នាំង លោក លី វីរៈ ថ្លែងថា កម្លាំងសមត្ថកិច្ចគ្រាន់តែជួយរុះរើផ្ទះដែលដួលរលំ ឬរបើករបាញទាំងនោះឲ្យបានរៀបរយសិន។ ចំពោះការជួសជុល ឬធ្វើផ្ទះឡើងវិញ អាស្រ័យលើម្ចាស់ផ្ទះ ឬអាចមានជំនួយពីខាងណាមួយ ដើម្បីទិញសម្ភារៈមកសាងសង់ឡើងវិញ ប៉ុន្តែកម្លាំងសមត្ថកិច្ច នឹងជួយបន្ថែមទៀតលើរឿងនេះ៖ «កន្លែងខ្លះយើងគ្រាន់តែជួយរុះរើឲ្យបានរៀបរយឲ្យគាត់ទៅណា ហើយបន្តិចទៀតគាត់នឹងមានការប្រក់ទៅ។ យើងជួយដល់គាត់បន្ថែមទៀត។ ដល់ឥឡូវហ្នឹងអត់ទាន់បានធ្វើទេ ដូចនៅស្រុកសាមគ្គីមានជ័យ អ៊ីចឹង អត់ទាន់បានធ្វើទេ គ្រាន់តែជួយរៀបចំកុំឲ្យច្រងេងច្រងាង»។
វិទ្យុអាស៊ីសេរី មិនអាចរកប្រភពទាក់ទងជនរងគ្រោះពីរនាក់ ដែលផ្ទះរលំលើនៅភូមិពោធិ៍រិទ្ធិក្រៃ នៃឃុំស្វាយ នោះដោយផ្ទាល់បានទេ នៅថ្ងៃទី២០ ខែមិថុនា។ ប៉ុន្តែអធិការស្រុកសាមគ្គីមានជ័យ និងនាយប៉ុស្តិ៍នគរបាលឃុំស្វាយ ឲ្យដឹងថា ជនរងគ្រោះទី១ ឈ្មោះ អ៊ីន ស្រីណែត អាយុ ៦ឆ្នាំ និងម្នាក់ទៀតជាស្ត្រីវ័យ ៣៥ឆ្នាំឈ្មោះ ភី នួន កំពុងសម្រាកព្យាបាលនៅមន្ទីរពេទ្យ បច្ចុប្បន្នបានធូរស្រាលហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។