ក្រសួងធនធានទឹក និងឧតុនិយម បានអំពាវនាវឲ្យប្រជាពលរដ្ឋ និងអាជ្ញាធរដែនដីនៅគ្រប់ខេត្តក្រុងក្នុងប្រទេសកម្ពុជា ត្រូវមានការប្រុងប្រយ័ត្នចំពោះគ្រោះធម្មជាតិ ដែលនឹងកើតមាននៅក្នុងខែឧសភារហូតដល់ខែមិថុនាឆ្នាំ ២០១៤។ នៅចន្លោះពេលនេះ អាកាសធាតុមានភាពអាប់អួខ្លាំង ដែលអាចបង្កជាភ្លៀងផ្គរ និងខ្យល់កន្ត្រាក់។ ជាក់ស្ដែងគ្រោះធម្មជាតិដែលមានមេឃភ្លៀងខ្យល់កន្ត្រាក់នេះ បានកើតមាននៅក្នុងខែមេសា ដែលបណ្ដាលឲ្យខូចខាតទ្រព្យសម្បត្តិផ្ទះសម្បែង និងបង្កគ្រោះថ្នាក់ស្លាប់អាយុជីវិតមនុស្ស និងសត្វ ពាហនៈ។
គ្រោះធម្មជាតិ មេឃភ្លៀងលាយឡំជាមួយនិងខ្យល់កន្ត្រាក់ បានកើតមានឡើងជាច្រើនកន្លែងនៅខេត្តភាគពាយ័ព្យនៃប្រទេសកម្ពុជា កាលខែមេសាឆ្នាំ២០១៤។ មេឃភ្លៀងមានខ្យល់កន្ត្រាក់ផ្គររន្ទះនេះ បានបង្កឲ្យខូចខាតលំនៅឋាន អគារសិក្សាដួលរលំ ប៉ើងដំបូលជាច្រើនខ្នង និង បង្កឲ្យមានគ្រោះថ្នាក់បាត់បង់អាយុជីវិតមនុស្សជាច្រើននាក់ និងងាប់សត្វពាហនៈជាច្រើនក្បាល។
ខេត្តដែលរងគ្រោះទាំងបីនោះមានខេត្តបាត់ដំបង ខេត្តប៉ៃលិន និងខេត្តបន្ទាយមានជ័យ។ អភិបាលខេត្តបន្ទាយមានជ័យ លោក គោ ស៊ុំសារឿតបញ្ជាក់ កាលពីថ្ងៃទី១ ខែឧសភា ថាព័ត៌មានបឋមដែលអាជ្ញាធរខេត្តទទួលបានគឺ មានលំនៅឋានប្រជាពលរដ្ឋនៅតាមស្រុកមួយចំនួនរងការខូចខាតជិត២០០ខ្នង។ ក្នុងនោះលំនៅឋានដែលខូចខាតទាំងស្រុងប្រហែល៥០ខ្នង។ ក្រៅពីខូចខាតលំនៅឋាន គ្រោះធម្មជាតិនេះ បានសម្លាប់សត្វពាហនៈចំនួន៤ក្បាល និងបង្កឲ្យមនុស្សរងរបួសមួយចំនួនទៀត៖ «ស្រុកមួយចំនួននៅយឺតហើយនៅមានថ្មីបន្តទៀត។ កាលពីថ្ងៃទី ២៧ និង ២៨ហ្នឹងស្រុកថ្មពួកនៅតែមានបញ្ហាដូចនៅស្រុកមង្គលបូរីលើកទម្លាក់ពីលើជើងសសររុញដួលមានរបួសមនុស្សមានស្លាប់គោក្របីដោយសាររលំបាក់ដើមឈើលើ។ នៅស្រុកថ្មពួកមានងាប់គោអស់៤ក្បាលម៉ូតូប្រជាពលរដ្ឋអស់ចំនួនពីរគ្រឿង»។
ទន្ទឹមគ្នានេះ អាជ្ញាធរខេត្តបានប្រាប់ឲ្យអាជ្ញាធរមូលដ្ឋាននៅតាមក្រុងស្រុកទាំងអស់ ត្រូវក្រើនរំលឹកដល់ប្រជាពលរដ្ឋ អោយមានការប្រុងប្រយ័ត្នដើម្បីត្រៀមលក្ខណៈការពារ ព្រោះថាគ្រោះធម្មជាតិមេឃភ្លៀងលាយឡំផ្គររន្ទះ និងខ្យល់កន្ត្រាក់នេះអាចនឹងកើតមានជាបន្តទៀត។ លោក អភិបាលខេត្តបន្តថា លំនៅឋាននិងផ្ទះសម្បែងរបស់ប្រជាពលរដ្ឋមួយចំនួន ដែលសាងសង់ពីឈើខ្ពស់ផុតពីដី គួរយកខ្សែកាបចងការពារឲ្យបានគ្រប់ជ្រុង ដែលអាចជួយការពារបាន។
ក្រៅពីខេត្តបន្ទាយមានជ័យ នៅខេត្តប៉ៃលិន ដែលជាខេត្តខ្ពង់រាបសំបូរទៅដោយភ្នំ ក៏ទទួលរងគ្រោះថ្នាក់ដូចគ្នាដែរ។ប្រធានមន្ទីរព័ត៌មានខេត្តប៉ៃលិន លោក គង់ ដួង បញ្ជាក់ថា របាយការណ៍គ្រោះធម្មជាតិដោយសារខ្យល់ព្យុះ កាលពីអំឡុងខែមេសាឆ្នាំ ២០១៤ ដូចគ្នា គឺមានលំនៅឋានប្រជាពលរដ្ឋចំនួន៨៧ខ្នងរងការខូចខាត។ ក្នុងនោះលំនៅឋានដែលរងការខូចខាតធ្ងន់ធ្ងរ មានចំនួនជាង១០ខ្នង។ ទោះយ៉ាងណាគ្រោះធម្មជាតិមេឃភ្លៀងលាយឡំខ្យល់ព្យុះនៅខេត្តប៉ៃលិននេះពុំបណ្ដាលឲ្យមានមនុស្សស្លាប់នោះទេ។
ដោយឡែកនៅខេត្តបាត់ដំបង ក៏ជួបគ្រោះធម្មជាតិ មេឃភ្លៀងខ្យល់កន្ត្រាក់ដូចគ្នា។ ប្រធានសាខាកាកបាទក្រហមខេត្តបាត់ដំបង លោក កង ប៊ន បញ្ជាក់ថា ចាប់តាំងពីថ្ងៃទី ២៤ ខែ មេសា ឆ្នាំ ២០១៤ គ្រោះធម្មជាតិនេះបានសម្លាប់មនុស្សអស់ចំនួន៦នាក់។ ៤នាក់ស្លាប់ដោយសាររន្ទះបាញ់ ២នាក់ស្លាប់ដោយសារដើមឈើបាក់សង្កត់លើ។ ក្រៅពីនេះនៅមានអ្នករបួសចំនួន៥នាក់ និងលំនៅឋានប្រជាពលរដ្ឋចំនួនជាង ១៦០ខ្នង ទទួលរងការខូចខាត៖ «ចាប់តាំងពីថ្ងៃទី ២៤ មានខ្យល់កន្ត្រាក់ រហូតដល់ថ្ងៃទី ២៥ ២៦ និងទល់ថ្ងៃទី ១ ខែឧសភា តាមរបាយការណ៍ផ្ទះរបស់បងប្អូនប្រជាពលរដ្ឋមាន១៦៣ខ្នងក្នុងនោះរលំធ្លាក់ពីលើជើងតាង អស់ចំនួន១១៨ខ្នង ផ្ទះដែលរងផលប៉ះពាល់ស្រាលរបើកស័ង្កសីបីបួនសន្លឹកមាន៤៥ខ្នង អ្នកដែលស្លាប់ចំនួន៦នាក់។ ស្លាប់ដោយរន្ទះបាញ់៤នាក់ ដើមឈើរលំសង្កត់លើចំនួន ២នាក់ អ្នករបួសទាំងអស់ចំនួន៥នាក់បាក់ភ្លៅ ២នាក់របួសធ្ងន់ ៣នាក់»។
ចំពោះអ្នករងគ្រោះ និងអ្នករងរបួស អាជ្ញាធរខេត្ត និងសាខាកាកបាទក្រហមបានចុះផ្ដល់ជំនួយមនុស្សធម៌ ហើយក្រុមការងារនេះកំពុងពិនិត្យក្នុងការសាងសង់លំនៅឋានរបស់ប្រជាពលរដ្ឋ ដែលរងការខូចខាតនោះជាបណ្ដើរៗថែមទៀត។ ទោះយ៉ាងណាគេនៅពុំទាន់ទទួលបានរបាយការណ៍ សរុប ដែលបង្កឡើងដោយគ្រោះធម្មជាតិមេឃភ្លៀង មានខ្យល់កន្ត្រាក់ នៅគ្រប់ខេត្តក្រុងក្នុងប្រទេសកម្ពុជានោះឡើយ។
ទេសរដ្ឋមន្ត្រី និងជាប្រធានគណៈកម្មាធិការគ្រោះមហន្តរាយថ្នាក់ជាតិ លោក ញឹម វណ្ណដា មានប្រសាសន៍ថា រហូតមកដល់ថ្ងៃទី ១ ខែ ឧសភា ឆ្នាំ២០១៤នេះ ក្រុមការងារគណៈកម្មាធិការគ្រោះមហន្តរាយថ្នាក់ជាតិ កំពុងប្រមូលព័ត៌មានបូកសរុបជុំវិញហេតុការណ៍គ្រោះធម្មជាតិនេះនៅឡើយ។
ថ្មីៗនេះក្រសួងធនធានទឹកនិងឧតុនិយម បានចេញសេចក្ដីជូនដំណឹងទាក់ទិនស្ថានភាពរដូវវស្សាដែលនឹងឈានចូលមកដល់នៅសប្ដាហ៍ទី៣ នៃខែឧសភាឆ្នាំ ២០១៤ នឹងប៉ះទៅលើ តំបន់មាត់សមុទ្រ និងតំបន់ទំនាបកណ្ដាល ដោយឡែកសម្រាប់តំបន់ខ្ពង់រាបរដូវវស្សានឹងឈានចូលមកនៅសប្ដាហ៍ទី ៤ ខែ ឧសភា។ មន្ត្រីនាំពាក្យក្រសួងធនធានទឹកនិងឧតុនិយម លោក ចាន់ យុត្ថា មានប្រសាសន៍ថា ពាក់ព័ន្ធ និងស្ថានភាពអាកាសធាតុនេះ គឺកម្ពុជា ឋិតក្នុងដំណាក់កាលអន្តរកាលនៃរដូវប្រាំងនិងរដូវវស្សា៖ «នេះជាស្ថានភាពទី១ ទី២យើងឋិតនៅចន្លោះបាតុភូត២ បើយើងពិនិត្យលើផ្អែកអាកាសធាតុគឺនៅផ្នែកខាងជើងប្រទេសថៃ ម្ដុំខេត្តឈាងរ៉ៃ ឈាងម៉ៃ កំពុងទទួលរងឥទ្ធិពលសម្ពាធទាប ចំណែកមួយទៀតនៅខាងត្បូងប្រទេសចិនកំពុងទទួលរងឥទ្ធិពលសម្ពាធខ្ពស់ អញ្ចឹងសម្រាប់ព្រះរាជាណាចក្រកម្ពុជាយើង គឺឋិតនៅចន្លោះបាតុភូតទាំង២នេះ ធ្វើឲ្យផ្ទៃមេឃរបស់កម្ពុជាហ្នឹងងាយទទួលរងនូវពពក Sunder Storm ដែលធ្វើឲ្យមានភ្លៀងផ្គររន្ទះជាមួយនិងខ្យល់កន្ត្រាក់»។
ទន្ទឹមគ្នានេះក្រសួងធនធានទឹក បានជម្រាបជូនអាជ្ញាធរដែនដី និងប្រជាពលរដ្ឋឲ្យបង្កើនការប្រុងប្រយ័ត្នចំពោះគ្រោះធម្មជាតិនេះ ជាពិសេសនៅតំបន់ដែលពពក Sunder Storm កើតមានឡើង។ លោក ចាន់ យុត្ថាបញ្ជាក់ថា ពពកSunder Storm នេះ មានរូបរាងដូចផ្សិត ជើងតូចក្បាលធំ នៅពេលព្រឹករហូតដល់ពេលថ្ងៃត្រង់ពពកនេះ មានសភាពជាធម្មតាទេប៉ុន្តែនៅពេលរសៀលពពកនេះ ប្រែទៅជាពណ៌ខ្មៅ ហើយនៅពេលមេឃកលរកភ្លៀង ស្ថានភាពខ្យល់កន្ត្រាក់ផ្គររន្ទះ នឹងកើតមានលាយឡំជាមួយគ្នាតែម្ដង៖ «អញ្ចឹងទេបើសិននៅក្នុងតំបន់ណាដែលកកើតនូវពពករបៀបនេះសូមបង្កើនការប្រុងប្រយ័ត្នសម្រាប់បងប្អូនប្រជាពលរដ្ឋគឺថា រកកន្លែងដែលមានសុវត្ថិភាពទន្ទឹមគ្នានេះការប្រើប្រាស់ប្រព័ន្ធអេឡិចត្រូនិកដូចជាទូរទស្សន៍វិទ្យុទូរស័ព្ទដៃជាដើមគួរតែបិទ»។
មន្ត្រីនាំពាក្យក្រសួងធនធានទឹកនិងឧតុនិយម លោក ចាន់ យុត្ថាបន្តថា ស្ថានភាពរដូវវស្សានៅឆ្នាំ២០១៤នេះ ប្រហាក់ប្រហែលគ្នាទៅនឹងឆ្នាំ២០១៣ ប៉ុន្តែចំពោះរបាយទឹកភ្លៀង ក្រសួងបានព្យាករណ៍ និងពិនិត្យឃើញថា នៅដើមឆ្នាំ២០១៤ មេឃមានភ្លៀងក្នុងកម្រិតពីតិចទៅមធ្យម ប៉ុន្តែចាប់ពីពាក់កណ្ដាលរដូវវស្សារហូតដល់ចុងរដូវវស្សាគឺ ទឹកភ្លៀងមាននិន្នាការកើនឡើង ប្រហាក់ប្រហែលគ្នាទៅនិងការធ្លាក់ភ្លៀង កាលពីឆ្នាំ ២០១១កន្លងទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។