អាជ្ញាធរខែត្រស្ទឹងត្រែង ចាត់វិធានការជួយសង្គ្រោះពលរដ្ឋដែលកំពុងមានវិបត្តិគ្រោះរាំងស្ងួត បន្ទាប់ពីអាកាសធាតុក្ដៅនៅតែបន្តអូសបន្លាយពេល។ វិធានការទាំងនោះមានដូចជា ការដឹកជញ្ជូនទឹកដោយរថយន្ត ជីកអណ្ដូងទឹកជូនពលរដ្ឋបន្ថែម បញ្ជូនមន្ត្រីជំនាញចុះស្រាវជ្រាវគោក្របីអ្នកភូមិដែលងាប់ និងអប់រំពលរដ្ឋឲ្យចេះប្រើប្រាស់ទឹកសន្សំសំចៃ។ មន្ត្រីសង្គមស៊ីវិលចង់ឃើញគណបក្សដែលជាប់ឆ្នោតទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ លើកជារបៀបវារៈចាប់ដៃគ្នាដោះស្រាយវិបត្តិគ្រោះរាំងស្ងួតជាបន្ទាន់ ដែលកំពុងគំរាមកំហែងធ្ងន់ធ្ងរដល់ពលរដ្ឋនៅមូលដ្ឋាន។
អាជ្ញាធរខែត្រស្ទឹងត្រែង ឲ្យដឹងថា អាជ្ញាធរខែត្រកំពុងរកមធ្យោបាយជួយសម្រាលការលំបាកពលរដ្ឋដែលកំពុងមានវិបត្តិគ្រោះរាំងស្ងួត បន្ទាប់ពីក្រសួងធនធានទឹកបានព្យាករពីអាកាសធាតុក្តៅខ្លាំងនៅរដូវប្រាំងមានរយៈពេលវែង។
ទន្ទឹមនឹងនេះ អាជ្ញាធរខែត្របានចាត់ឲ្យអាជ្ញាធរមូលដ្ឋានស្រង់ទិន្នន័យផលប៉ះពាល់ពលរដ្ឋដែលខ្វះខាត់ទឹកប្រើប្រាស់ និងគោក្របីងាប់ ដើម្បីអន្តរាគមន៍សង្គ្រោះបន្ទាន់ និងត្រៀមសង្គ្រោះ ប្រសិនបើគ្រោះរាំងស្ងួតនៅតែអូសបន្លាយពេល។
អ្នកនាំពាក្យសាលាខែត្រស្ទឹងត្រែង លោក ម៉ែន គុង មានប្រសាសន៍ថា អាជ្ញាធរខែត្រកំពុងដោះស្រាយបញ្ហាគ្រោះរាំងស្ងួត ដោយដឹកជញ្ជូនទឹកតាមរថយន្តផ្ដល់ជូនពលរដ្ឋនៅមូលដ្ឋាន សាងសង់អណ្ដូងទឹកស្អាតជាបន្ទាន់ និងអប់រំពលរដ្ឋឲ្យសន្សំសំចៃទឹកប្រើប្រាស់ប្រចាំថ្ងៃ។ លោកថា អាជ្ញាធរខែត្របានសង្គ្រោះពលរដ្ឋជាជំហានដំបូងចំនួន ៣ស្រុក មានស្រុកសៀមបូក ស្រុកថាឡាបរិវ៉ា់ត់ និងស្រុកសៀមប៉ាង។
លើសពីនេះ អាជ្ញាធរខែត្រក៏បានចាត់ឲ្យមន្ត្រីជំនាញកសិកម្មចុះស្រាវជ្រាវពីការងាប់គោក្របីអ្នកស្រុកសៀមប៉ាង ជាច្រើនក្បាល ដើម្បីចាត់វិធានការបង្ការ និងសង្គ្រោះ៖ «យើងបានត្រៀមហើយ ហើយយើងនឹងប្រជុំបន្ទាន់នៅថ្ងៃទី២៨ ពេលរសៀល ដើម្បីរកវិធានការដោះស្រាយផ្គត់ផ្គង់ទឹកជូនពលរដ្ឋ រួមទាំងការងារជំនាញរបស់កសិកម្មបសុពេទ្យហ្នឹងចុះពិនិត្យមើលស្ថានភាពងាប់គោក្របី និងសត្វចិញ្ចឹមរបស់ពលរដ្ឋនៅក្នុងមូលដ្ឋាន»។
សេចក្ដីប្រកាសព័ត៌មានរបស់ក្រសួងធនធានទឹកចុះផ្សាយកាលពីថ្ងៃទី២៣ ខែមេសា សរសេរថា ចាប់ពីថ្ងៃទី២៨ ដល់ថ្ងៃទី៣ ខែឧសភា នៅតំបន់ខ្ពង់រាប មានសីតុណ្ហភាព ៣៦អង្សាសេ ដល់ ៤២អង្សាសេ។ ក្រសួងក៏បានប្រកាសឲ្យពលរដ្ឋប្រុងប្រយ័ត្ននូវបាតុភូតគ្រោះធម្មជាតិមានជាអាទិ៍ ភ្លៀងលាយឡំផ្គរ រន្ទះ ខ្យល់កន្ទ្រាក់។
ទាក់ទងករណីនេះ គ្រូបង្រៀននៃសាលាបឋមសិក្សាខិះក្រោម នៃឃុំព្រែកមាស ស្រុកសៀមប៉ាង លោក ជា ផានិត ឲ្យដឹងថា គ្រោះរាំងស្ងួតឆ្នាំនេះ បង្កការលំបាកធ្ងន់ធ្ងរដល់ពលរដ្ឋ ជាពិសេសសត្វចិញ្ចឹមអ្នកភូមិងាប់អស់ជាច្រើនក្បាលក្នុងព្រៃ។ លោកថា អ្នកភូមិភាគច្រើនពុំសូវទទួលព័ត៌មានអំពីករណីគ្រោះរាំងស្ងួតពីអាជ្ញាធរ បណ្ដាលឲ្យពួកគេពុំសូវយកចិត្តទុកដាក់ថែទាំសត្វចិញ្ចឹមរបស់ខ្លួនដែលមានទម្លាប់ប្រលែងចូលព្រៃដូចសព្វមួយដង បណ្ដាលឲ្យសត្វចិញ្ចឹមអ្នកភូមិងាប់ក្នុងព្រៃ។
លើសពីនេះលោកថា កុមារក្នុងភូមិភាគច្រើនមិនបានចូលសាលារៀនដោយពួកគេចូលព្រៃជ្រៅជាមួយគ្រួសារស្វែងរកស្លឹកឈើដែលជាចំណីគោក្របីឆ្ងាយពីភូមិ បន្ទាប់ពីស្មៅស្វិតងាប់អស់៖ «ក្របីគាត់លែងចោលក្នុងព្រៃ អត់មានអីស៊ី ជួនកាលវាដើរៗដួលងាប់ខ្លួនវា អត់មានពីណាដឹង។ ទម្រាំតែរកឃើញស្អុយបាត់»។
លោកថា ពលរដ្ឋភាគច្រើនកំពុងមានវិបត្តិខ្វះចំណីអាហារគោក្របី និងខ្វះទឹកប្រើប្រាស់។ លោកបន្ថែមទៀតថា ពលរដ្ឋឃុំព្រែកមាស ឃុំស្រែសំបូរ និងឃុំសេកុង ស្ទើរតែគ្រប់ក្រុមគ្រួសារបានស្វែងរកចំណីឲ្យគោក្របីជារៀងរាល់ថ្ងៃនៅឆ្ងាយៗ ដោយធ្វើដំណើរតាមគោយន្ត និងម៉ូតូ ខ្លះដើរ៖ «គាត់ទៅរកស្លឹកឈើតាមព្រៃជ្រៅ ឆ្ងាយៗ បើកគោយន្តទៅរកហើយយកមកពីរបីការុង ឲ្យក្របីស៊ីតែ ១ ទៅ ២ដងអស់បាត់ទៀតហើយទៅរកទៀត។ សូម្បីតែកូនសិស្សឈប់ចង់អស់ហើយ វាសុំច្បាប់ទៅរកចំណីឲ្យក្របីស៊ី»។
អភិបាលស្រុកសៀមប៉ាង លោក ស៊ី សួន និយាយថា លោកបានទទួលរបាយការណ៍ស្តីពីផលប៉ះពាល់គ្រោះរាំងស្ងួត បណ្ដាលឲ្យងាប់គោក្របីចំនួនបីឃុំ គឺឃុំស្រែសំបូរ ឃុំព្រែកមាស និងឃុំសេកុង។ លោកថា អាជ្ញាធរស្រុកបានជំរុញឲ្យពលរដ្ឋស្វែងរកគោក្របីពីព្រៃមកចងមើលថែនៅផ្ទះវិញ។ លោកបន្តថា អាជ្ញាធរស្រុកបានដឹកជញ្ជូនទឹកចែកជូនពលរដ្ឋនៅភូមិខិះក្រោម បានចំនួន ៦ពាន់លីត្រ កាលពីថ្ងៃទី២៥ ខែមេសា ដើម្បីសម្រាលទុកលំបាកពួកគេ៖ «អណ្ដូងកន្លងទៅគេបានផ្ដល់ហើយ តាមរយៈកាកបាទក្រហម។ ជារៀងរាល់ឆ្នាំអណ្ដូងទឹកវាមាន ប៉ុន្តែឆ្នាំនេះវាខ្វះ ដោយសាររាំងស្ងួត យើងវារាំងស្ងួតខ្លាំង»។
នៅខេត្តស្ទឹងត្រែង ស្រុកដែលកើតមានគ្រោះរាំងស្ងួតធ្ងន់ធ្ងរ គឺស្រុកថាឡាបរិវ៉ាត់ និងស្រុកសៀមប៉ាង។ ស្រុកសៀមប៉ាង មានឃុំចំនួន៣ គឺឃុំព្រែកមាស ឃុំសេកុង និងឃុំស្រែសំបូរ រងគ្រោះដោយសារគោក្របីងាប់រាប់រយក្បាល។ ដោយឡែកស្រុកថាឡាបរិវ៉ាត់ ពលរដ្ឋខ្វះខាត់ទឹកប្រើប្រាស់មានឃុំចំនួន ៥ គឺឃុំអន្លង់ភេ ឃុំស្រែឫស្សី ឃុំចម្ការលើ ឃុំអន្លង់ជ្រៃ និងឃុំថាឡាបរិវ៉ាត់។
ប្រធានមន្ទីរកសិកម្មខែត្រស្ទឹងត្រែង លោក ទូច ធា ដែលចុះមូលដ្ឋានផ្ទាល់រកឃើញថា លោកបានប្រទះឃើញក្របីងាប់ជាក់ស្ដែងចំនួន ១៥ក្បាល នៅថ្ងៃទី២៦ ខែមេសា ឋិតនៅភូមិកែងញ៉ៃ ឃុំសេកុង ស្រុកសៀមប៉ាង។ លោកសន្និដ្ឋានជាបឋមថា ករណីនេះបណ្ដាលមកពីអាកាសធាតុក្ដៅខ្លាំង សត្វខ្វះចំណី និងខ្វះទឹក។
លោក ទូច ធា មិនទាន់ស្រង់ទិន្នន័យពីការងាប់គោក្របីនៅស្រុកសៀមប៉ាង បានចំនួនប៉ុន្មានជាក់លាក់នោះទេ បើក្រៅពីអាជ្ញាធរឃុំសេកុង បញ្ជាក់ថា ពលរដ្ឋងាប់គោក្របីអំឡុងខែមេសា ចំនួន ១៨៥ក្បាល៖ «ខ្ញុំជិះគោយន្តបីម៉ោងចូលទៅក្នុងព្រៃកន្លុកកន្លៀតទាំងអស់។ ឃើញមានងាប់ ១៥ក្បាល គឺខ្ញុំទៅឃើញតែម្ដង តាមរបាយការណ៍រាប់រយក្បាល»។
ប្រធានសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ មើលឃើញថា គ្រោះរាំងស្ងួតនៅឆ្នាំនេះ គឺជាគ្រោះរាំងស្ងួតខ្លាំងដែលអូសបន្លាយពេលវែង ដូច្នេះរដ្ឋាភិបាលត្រូវប្រកាសអាសន្ន និងចាត់វិធានការបម្រុងជាច្រើន ដើម្បីអន្តរាគមន៍សង្គ្រោះពលរដ្ឋរងគ្រោះរាំងស្ងួតមានជាអាទិ៍ ការប្រើប្រាស់ធនធានរបស់រដ្ឋដើម្បីដោះស្រាយបញ្ហាបន្ទាន់ និងបំផុសគំនិតពលរដ្ឋឲ្យទុកទឹកប្រើប្រាស់ប្រចាំថ្ងៃ តាមរយៈជីកស្រះផ្សេងៗជាដើម។ លោកថា អាជ្ញាធរមូលដ្ឋានត្រូវផ្ដល់ព័ត៌មានពីបាតុភូតការប្រែប្រួលអាកាសធាតុផ្សេងៗដែលអាចនឹងកើតមានដើម្បីឲ្យពលរដ្ឋត្រៀមលក្ខណៈបង្ការ។
លោកកត់សម្គាល់ថា ការទទួលបានព័ត៌មានគ្រោះរាំងស្ងួត និងការប្រែប្រួលអាកាសធាតុរបស់ពលរដ្ឋនៅមូលដ្ឋានហាក់មានលក្ខណៈយឺតយ៉ាវ និងមិនគ្រប់ជ្រុងជ្រោយ ដែលជាដើមចមបណ្ដាលឲ្យពួកគាត់ងាយរងគ្រោះទៀតសោតបាតុភូតកើតឡើង ទើបពលរដ្ឋប្រុងប្រយ័ត្នជាក្រោយ។
លោក សន ជ័យ ចាត់ទុកការបាត់បង់ព្រៃឈើ គឺជាធាតុផ្សំចម្បងដែលងាយកើតមានការប្រែប្រួលអាកាសធាតុ៖ «បម្រុងនូវជំនួយសង្គ្រោះបន្ទាន់ជួយដល់ពលរដ្ឋ គឺជាបញ្ហាដែលមិនអាចខ្វះបាន ហើយនិងការរកមធ្យោបាយដើម្បីដោះស្រាយរយៈពេលវែង ដូចជាជីកប្រឡាយ ឬធ្វើឲ្យសហគមន៍អាចជីកអណ្ដូងទឹកស្តុកទឹកទុកសម្រាប់ប្រើប្រាស់ដែលជាការប្រើប្រាស់រយៈពេលវែង»។
អាជ្ញាធរស្រុកសៀមប៉ាង នៅមិនទាន់បញ្ជាក់ពីទិន្នន័យជាក់ស្ដីពីពលរដ្ឋរស់នៅស្រុកនេះ ប៉ុន្មានគ្រួសារដែលខ្វះទឹកប្រើប្រាស់នោះទេ។ ចំណែកឯសត្វពាហនៈអ្នកស្រុកងាប់ក៏មិនទាន់មានន័យបានច្បាស់លាស់នៅឡើយដែរ បើក្រៅពីសេចក្ដីរាយការណ៍ជាបឋមពីអាជ្ញាធរមូលដ្ឋានឲ្យដឹងថា ពលរដ្ឋរស់នៅឃុំចំនួនបី ងាប់គោក្របីរាប់រយក្បាល គឺឃុំសេកុង ឃុំស្រែសំបូរ និងឃុំព្រែកមាស។
អាជ្ញាធរខែត្រស្ទឹងត្រែង ឲ្យដឹងទៀតថា អាជ្ញាធរខែត្រកំពុងសិក្សាពិនិត្យលទ្ធភាពត្រៀមលក្ខណៈបង្ការគ្រោះរាំងស្ងួតរយៈពេលវែងដោយជីកប្រឡាយទឹក និងអណ្ដូងទឹកស្អាតនៅតំបន់ដែលងាយរងគ្រោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។