សមាជិកសហគមន៍ដីធ្លី និងប្រជាពលរដ្ឋនៅស្រុករមាសហែក ខេត្តស្វាយរៀង ប្រមាណ ៣០នាក់ នៅព្រឹកថ្ងៃទី៤ មីនា លើកគ្នាតវ៉ាប្រឆាំងនឹងរដ្ឋបាលព្រៃឈើ ដែលឈូសឆាយដីដាំកូនឈើលើដីសហគមន៍។ ពួកគេបញ្ជាក់ថា ការដាំកូនឈើលើដីសហគមន៍នេះ ធ្វើឲ្យប៉ះពាល់ដល់ផលប្រយោជន៍របស់ប្រជាពលរដ្ឋជាច្រើនគ្រួសារនៅតំបន់នោះ។
ប៉ុន្តែ មេឃុំអណ្ដូងត្របែក បញ្ជាក់ថា រដ្ឋបាលព្រៃឈើឈូសឆាយដីដាំកូនឈើនេះ ជាដីទំនេររបស់រដ្ឋដើម្បីបម្រើផលប្រយោជន៍រួម។
សហគមន៍ដីធ្លី និងប្រជាពលរដ្ឋ បានរួមគ្នាទៅរារាំងគ្រឿងចក្ររបស់រដ្ឋបាលព្រៃឈើ មិនឲ្យធ្វើសកម្មភាពឈូសឆាយដីដែលបម្រុងដាំកូនឈើនោះទេ។ ពួកគេអំពាវនាវសុំឲ្យទុកដីនោះសម្រាប់ជាប្រយោជន៍រួម របស់ប្រជាពលរដ្ឋរស់នៅតំបន់នោះបានអាស្រ័យផលលើដីនោះបន្តទៀត។
អនុប្រធានសហគមន៍ដីធ្លី ឃុំអណ្ដូងត្របែក លោក ឡូញ ថា មានប្រសាសន៍បញ្ជាក់នៅថ្ងៃទី៤ មីនា ថា ដីដែលរដ្ឋបាលព្រៃឈើយកគ្រឿងចក្រទៅឈូសឆាយបម្រុងដាំកូនឈើ មានក្រញូង បេង និងនាងនួន ជាដើម ជាដីរបស់សហគមន៍មានទំហំប្រមាណជាង ២០០ហិកតារ ស្ថិតនៅភូមិជីកដី ឃុំអណ្ដូងត្របែក ស្រុករមាសហែក។ ដីនេះសម្រាប់ជាផលប្រយោជន៍រួមរបស់ប្រជាពលរដ្ឋជាង ១ពាន់គ្រួសារ រស់នៅជាច្រើនភូមិ រួមមាន ភូមិទួល ជីកដី កម្រែង អណ្ដូង ទួលខ្លុង និងភូមិថ្មី ជាដើម។
លោក ឡូញ ថា បញ្ជាក់ថា ដីនេះជាដីទួលវាលស្មៅសម្រាប់គោក្របីផង និងជាដីព្រៃសម្រាប់អាស្រ័យផលរបស់អ្នកភូមិរស់នៅតំបន់នោះផង។ ដូចនេះ ប្រសិនបើអាជ្ញាធរដាំកូនឈើលើដីនោះ ធ្វើឲ្យប៉ះពាល់ដល់ផលប្រយោជន៍របស់អ្នកភូមិរស់នៅតំបន់នោះជាពុំខាន៖ «កន្លែងនេះជាកន្លែងទីទួលសុវត្ថិភាពរបស់ប្រជាពលរដ្ឋ ជម្លៀសពីទឹកលិចមកនៅផង ហើយបញ្ហាទី២ គឺវាលក្របីគោរបស់ប្រជាពលរដ្ឋ ព្រោះដីហ្នឹងជាដីសហគមន៍សម្រាប់ទុកឲ្យគោក្របីហ្នឹង លែងនៅកន្លែងហ្នឹង ទៅកាប់ឧសកាប់អីអ៊ីចឹងបង។ តាមខ្ញុំ វាអត់ទំនង ព្រោះកាលមុនរដ្ឋបាលព្រៃឈើថាអត់មានលូកដៃចូលទេបាទ! គាត់ថាចង់ប្រជាពលរដ្ឋធ្វើម៉េចបានធ្វើទៅ។ ប៉ុន្តែ បែរជាពលរដ្ឋធ្វើបាន បែរជាមកដាំកូនក្រញូងកូនអី ខ្ញុំក៏មិនទាន់ជឿថារដ្ឋបាលព្រៃឈើអ្នកដាំទេ ប្រហែលជាគម្រោងនៅក្រុមហ៊ុនដដែល»។
រីឯប្រជាពលរដ្ឋម្នាក់ទៀតរស់នៅភូមិជីកដី ឃុំអណ្ដូងត្របែក លោក យឹម ពឹម ថ្លែងបញ្ជាក់ដោយចាត់ទុកការឈូសឆាយដីដាំកូនឈើរបស់មន្ត្រីរដ្ឋបាលព្រៃឈើនេះថា ជាសកម្មភាពមួយមិនត្រឹមត្រូវឡើយ ព្រោះសកម្មភាពនេះបើចេញជារូបរាង អាចនឹងក្លាយទៅជាដីកម្មសិទ្ធិឯកជននៅថ្ងៃណាមួយជាពុំខាន។ លោក យឹម ពឹម បន្តថា អ្នកភូមិនឹងការពារមិនឲ្យអាជ្ញាធរដាំកូនឈើនៅលើដីដែលជាអត្ថប្រយោជន៍របស់ប្រជាពលរដ្ឋនោះជាដាច់ខាត៖ «ខ្ញុំសង្ស័យរដ្ឋបាលព្រៃឈើគ្រាន់តែយករដ្ឋបាលព្រៃឈើបាំងមុខទេ ព្រោះពួកអាដែងឃើញជិះឡានដឹកសាំងដឹកអីទៅ អាអ្នកពួកក្រុមហ៊ុនមុនដដែលធ្វើហ្នឹង។ ខ្ញុំពិនិត្យប្រជាពលរដ្ឋហ្នឹង ធ្វើហ្នឹងធ្វើដើម្បីឈ្មួញតែហ្មង អត់មានធ្វើដើម្បីប្រជាពលរដ្ឋផង! គោលជំហររបស់ប្រជាពលរដ្ឋមានអីទៀត មានតវ៉ាមិនឲ្យដាច់ខាតមិនឲ្យតែម្ដងដីហ្នឹង»។
វិទ្យុអាស៊ីសេរី ពុំអាចទាក់ទងមន្ត្រីរដ្ឋបាលព្រៃឈើស្រុករមាសហែក ដើម្បីសុំការពន្យល់ពីបញ្ហានេះបានទេ នៅថ្ងៃទី៤ មីនា ដោយទទួលទូរស័ព្ទហើយ តែត្រូវបានបិទទៅវិញ។
ប៉ុន្តែ មេឃុំអណ្ដូងត្របែក លោក គង់ វិត មានប្រសាសន៍បញ្ជាក់ថា ពុំមានសហគមន៍ស្របច្បាប់នៅឃុំអណ្ដូងត្របែក នោះទេ។ ដូចនេះ ប្រជាពលរដ្ឋរារាំងគ្រឿងចក្ររដ្ឋបាលព្រៃឈើមិនឲ្យឈូសឆាយដីដាំកូនឈើ គឺជារឿងមិនត្រឹមត្រូវឡើយ ព្រោះដីដែលឈូសឆាយនោះ គឺជាដីទំនេររបស់រដ្ឋយូរឆ្នាំមកហើយ។ ម្យ៉ាងវិញទៀត ការដាំកូនឈើនេះធ្វើឡើងជាផលប្រយោជន៍រួម ពុំមែនជាប្រយោជន៍របស់ឯកជនទេ៖ «អត់ដឹងថាម៉េចទេអាហ្នឹង ចាំអ្នកដែលដាំសិន ព្រោះដាំជាផ្នែករដ្ឋទេ មិនមែនជាឯកជនណាមួយទេណា។ បាទ! ដីហ្នឹងក៏ថាដីរដ្ឋ ហើយអ៊ីចឹងវានៅទំនេរយូរពេកទៅ គេដាំឈើឡើងវិញដាំធ្នង់ទៀតណោះ។ ប៉ុន្តែ ចំណោទពីគាត់មកគាត់ដាក់ស្មានមកដែរទេ គាត់ថារដ្ឋបាលព្រៃឈើ ហើយនិងមេឃុំអណ្ដូងត្របែក ទាំងអស់ហ្នឹង សុទ្ធតែស៊ីលុយថៅកែណា! គាត់ចោទហ្នឹងៗដោយស្មាន ហើយអាហ្នឹងដូចតែអាក្រក់ដែរ ដូចអត់ដែលមានសូម្បីតែមួយកាក់មួយសេនណាអត់មានផង»។
តែយ៉ាងណា ប្រជាពលរដ្ឋឲ្យដឹងថា ដីដែលមានទំនាស់នេះកាលពីឆ្នាំ២០១១ កន្លងទៅ អ្នកភូមិបាននាំគ្នាតវ៉ាយកពីឈ្មួញទិញដី ហើយបានឈ្នះក្ដីលើដីនោះ ទុកជាប្រយោជន៍របស់ប្រជាពលរដ្ឋរហូតមក។ អ្នកភូមិបញ្ជាក់ថា ការទាមទាររបស់ពួកគេកន្លងមក ក៏ពុំមានអាជ្ញាធរណាជួយដោះស្រាយឲ្យប្រជាពលរដ្ឋដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។