ប្រជាពលរដ្ឋ សិស្សានុសិស្ស អាជ្ញាធរមូលដ្ឋាន មន្ត្រីអង្គការក្រៅរដ្ឋាភិបាលនៅឃុំកំពង់សំណាញ់ ស្រុកព្រៃឈរ ខេត្តកំពង់ចាម នាំគ្នាប្រារព្ធយុទ្ធនាការសំអាតភូមិឋាន នៅជាប់មាត់បឹងធំ។ សកម្មភាពនេះ ធ្វើឡើងដើម្បីជួយណែនាំពលរដ្ឋនៅតាមជនបទដាច់ស្រយាលឱ្យយល់កាន់តែច្បាស់ពីបញ្ហាអនាម័យ និងសុខភាពដើម្បីបណ្ដុះការអប់រំដល់ក្មេងៗជំនាន់ក្រោយឱ្យយល់ដឹងកាន់តែច្បាស់ពីតម្លៃបរិស្ថាន និងអនាម័យ។
យុទ្ធនាការសម្អាតបរិស្ថាន ភាគច្រើនគេតែងប្រទះឃើញធ្វើឡើងនៅតាមសាលា ឬតាមទីប្រជុំជននានា ប៉ុន្តែគេកម្រឃើញយុទ្ធនាការនេះធ្វើនៅតាមភូមិកររបស់ពលរដ្ឋណាស់។
ក្រោមការផ្ដួចផ្ដើមរបស់អង្គការក្រៅរដ្ឋាភិបាល មួយមានមូលដ្ឋាននៅឃុំមៀន ស្រុកព្រៃឈរ គឺអង្គការសាមគ្គី បានរៀបចំឱ្យមានការសម្អាតអនាម័យនៅតាមភូមិជាលើកដំបូងនៅភូមិកំពង់សំណាញ់ ដែលមានទីតាំងជាប់បឹងធំ ដើម្បីពន្យល់ពលរដ្ឋរស់នៅតាមតំបន់ដាច់ស្រយាលមួយនេះ ឱ្យចេះការពារសុខភាពរបស់ខ្លួន និងចេះរួមគ្នាការពារ ឬចេះធ្វើអនាម័យបរិស្ថាននៅក្នុងសហគមន៍របស់ពួកគេ។
មន្ត្រីសម្របសម្រួលអង្គការសាមគ្គី លោក ស៊ឹម ហុន មានប្រសាសន៍ថា ដោយសង្កេតឃើញពលរដ្ឋនៅតាមតំបន់ជនបទដាច់ស្រយាលនៅមិនទាន់មានការយល់ដឹងអំពីបញ្ហាអនាម័យឱ្យបានទូលំទូលាយ ទើបខាងអង្គការលោកសុំកិច្ចសហការពីអាជ្ញាធរមូលដ្ឋាន លោកគ្រូ អ្នកគ្រូ សិស្សានុសិស្ស និងប្រជាពលរដ្ឋនៅក្នុងភូមិដើម្បីរៀបចំកម្មវិធីនេះឡើង៖ «គឺមានគោលបំណងធ្វើយ៉ាងណាឱ្យប្រជាពលរដ្ឋនៅក្នុងភូមិហ្នឹង គាត់យល់ដឹងអំពីការសម្អាតបរិស្ថានឱ្យបានស្អាត ជាពិសេសនៅក្នុងភូមិរបស់ពួកគាត់ និងម្យ៉ាងទៀត ក៏ជាការបណ្ដុះគំនិតមួយដល់សិស្សសាលា និងគ្រូហ្នឹង គាត់យកចិត្តទុកដាក់ផងដែរ»។
យុទ្ធនាការសម្អាតភូមិឋាន នេះ ត្រូវបានធ្វើឡើងកាលពីថ្ងៃទី៩ ខែកក្កដា ដោយមានប្រជាពលរដ្ឋ សិស្សានុសិស្សជាង ២៦៦នាក់ ចូលរួម។ ក្នុងនោះមានជាការផ្ញើសារទាក់ទងការរស់នៅប្រកបដោយអនាម័យដល់អ្នកចូលរួម។ សារទាំងនោះ រួមមានសំអាតបរិស្ថាន ដើម្បីសោភ័ណភាពភូមិឋាន និងដើម្បីសុខភាព។ បរិស្ថានស្អាតនាំមកនូវសុខភាពល្អ សំអាតបរិស្ថាន គឺស្រលាញ់ជីវិត។ លើសពីនេះទៀត សំរាម ឬកាកសំណល់គ្រប់ប្រភេទធ្វើឱ្យបាត់បង់សោភ័ណភាពនៅក្នុងភូមិ និងជាប្រភពនាំឱ្យកង្វក់បរិស្ថានជាដើម។ ក្រៅពីនេះ សិស្សានុសិស្ស អាណាព្យាបាល និងលោកគ្រូ អ្នកគ្រូ នាំគ្នាដើរប្រមូលសំរាមនៅក្នុងភូមិកំពង់សំណាញ់ សំរាមតាមមាត់បឹង ដែលបង្កភាពកង្វក់ដល់ផ្ទៃបឹងផង។
ពលរដ្ឋភូមិដីក្រហមដែលចូលរួម អ្នកស្រី អឿន សារុន មានប្រសាសន៍ថា ការចូលរួមសកម្មភាពសំអាតបរិស្ថាននៅក្នុងភូមិ គឺជារឿងល្អមួយ ដើម្បីការពារកូនចៅឱ្យជៀសផុតពីជំងឺដង្កាត់នានា ពោលគឺរស់នៅប្រកបដោយសុខុមាលភាព៖ «ដើម្បីឱ្យឪពុកម្ដាយគេហ្នឹង មើលឃើញថា ថ្ងៃមុខថ្ងៃក្រោយពួកគេមិនចោលសំរាមពាសវាលពាសកាលអ៊ីចឹងទៀតទេ ព្រោះមានសិស្សខ្ញុំអីជាជនបង្គោលមកចូលរួមជាមួយដើម្បីធ្វើឱ្យស្អាតបរិស្ថាន»។
អ្នកស្រីស្នើឱ្យពលរដ្ឋទូទៅមិនសម្រាប់តែពលរដ្ឋនៅភូមិកំពង់សំណាញ់ នោះទេ គប្បីចូលរួមសំអាតបរិស្ថាន នៅក្នុងភូមិដោយខ្លួនឯង ជៀសវាងបោះចោលថង់ប្លាស្ទិក ឬសំបកកំប៉ុងពាសវាលពាសកាល នាំឱ្យក្លាយជាជម្រកសត្វមូសជាដើម។
កន្លងទៅខាងក្រសួងសុខាភិបាល ក៏តែងណែនាំប្រជាពលរដ្ឋគ្រប់មជ្ឈដ្ឋាន ទាំងនៅទីក្រុង និងជនបទ តាមរយៈការផ្សព្វផ្សាយជាវីដេអូខ្លីអប់រំតាមកញ្ចក់ទូរទស្សន៍ និងផ្សព្វផ្សាយតាមវិទ្យុ ធ្វើយ៉ាងណាចេះសំអាតទីធ្លាលំនៅឋានរបស់ខ្លួន និងនៅក្នុងសហគមន៍ទាំងមូលឱ្យបានប្រសើរ ដូចជាមិនត្រូវបោះចោលសំរាមពាសវាលពាសកាល ឬបោះចូលទៅក្នុងប្រភពទឹកប្រើប្រាស់ ឬក៏បន្ទោបង់ដោយមិនមានបង្គន់អនាម័យត្រឹមត្រូវជាដើម។ លើសពីនេះទៀត ណែនាំឱ្យពលរដ្ឋចេះបែងចែកប្រភេទសំរាមស្ងួត និងសើម ហើយពន្យល់ពលរដ្ឋឱ្យចេះកែច្នៃប្រភេទសំរាមមួយចំនួន។
គ្រូបង្រៀននៅសាលាបឋមសិក្សាកំពង់សំណាញ់ ម្នាក់លោក ជា សុវ៉ាន់ឌី មានប្រសាសន៍ថា បញ្ហាសំរាមនៅក្នុងភូមិ ហាក់មានច្រើន ព្រោះប្រជាពលរដ្ឋចេះតែនាំគ្នាបោះចោលពាសវាលពាសកាល។ លោកបន្តថា បញ្ហាកង្វះអនាម័យនៅក្នុងភូមិ គឺបណ្ដាលឱ្យប៉ះពាល់ដល់សុខភាពប្រជាពលរដ្ឋគ្រប់គ្នា៖ «ធ្វើយ៉ាងនេះដើម្បីឱ្យនៅក្នុងស្រុកភូមិមានអនាម័យគ្រប់គ្រាន់ គ្មានជំងឺតម្កាត់ ព្រោះបរិស្ថានមិនស្អាត គឺនាំមកនូវសុខភាពមិនល្អដែរ»។
បន្ថែមលើសនេះ សិស្សថ្នាក់ទី១០ នៅវិទ្យាល័យ នរោត្តម រណឬទ្ធិ គន្ធបុប្ផា យុវត្តី ឈាន សុម៉ាលី សម្តែងអារម្មណ៍រីករាយនៅពេលបានចួលរួមសកម្មភាពដែលជាប្រយោជន៍ដល់សង្គមមួយនេះ ព្រោះបរិស្ថានស្អាត គឺជាចំណែកមួយជួយឱ្យពលរដ្ឋគ្រប់រូបមានសុខភាពល្អ៖ «ការសម្អាតបរិស្ថាននាំឱ្យមានអនាម័យ បរិស្ថានស្អាតសុខភាពល្អ សូមប្រជាពលរដ្ឋជួយថែទាំ និងសម្អាតបរិស្ថានទាំងអស់គ្នា»។
យុទ្ធនាការសំអាតភូមិឋាន ហាក់ទទួលបានការគាំទ្រពីប្រជាពលរដ្ឋនៅក្នុងភូមិច្រើន ជាពិសេសសកម្មភាពពលរដ្ឋចូលរួម គឺបង្ហាញពីការយកចិត្តទុកដាក់ និងយល់ដឹងអំពីតម្លៃបរិស្ថាន ស្អាតបានប្រសើរជាងមុន។
មន្ត្រីសម្របសម្រួលអង្គការសាមគ្គីដដែល លោក ស៊ឹម ហុន ឱ្យដឹងទៀតថា ខាងលោកគ្រោងនឹងធ្វើសកម្មភាពសំអាតបរិស្ថាននៅតាមភូមិនៅតំបន់ផ្សេងៗទៀត គឺធ្វើយ៉ាងណាអប់រំពលរដ្ឋតាមមូលដ្ឋានឱ្យកាន់តែយល់ដឹងពីបញ្ហាសុខភាព បញ្ហាអនាម័យ ដែលបានមកពីការចូលរួមសម្អាតបរិស្ថាននៅក្នុងសហគមន៍របស់ពួកគាត់ទាំងអស់គ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។