ក្រុមសមត្ថកិច្ចអាជ្ញាធរខេត្តមណ្ឌលគិរី មានកងនគរបាល និងកងអាវុធហត្ថប្រមាណ ២០នាក់ ប្រដាប់ដោយអាវុធ បានប្រឈមមុខដាក់គ្នាជាមួយប្រជាពលរដ្ឋជាង ១៥០គ្រួសារ អស់រយៈពេលប្រមាណ ៥ម៉ោង នៅព្រឹកថ្ងៃពុធ ទី១៥ ខែឧសភា ឆ្នាំ២០១៣ ក្នុងការទប់ស្កាត់សកម្មភាពប្រជាពលរដ្ឋដែលបាននាំគ្នាកាប់ឆ្ការព្រៃ ហើយសង់ជារោងស្នាក់នៅក្នុងតំបន់ព្រៃអភិរក្ស។
ហេតុការណ៍នេះ កើតមានឡើងនៅភូមិពូតាង ឃុំពូជ្រៃ ស្រុកពេជ្រាដា ប៉ុន្តែមិនមានអំពើហិង្សាអ្វីកើតឡើងនោះទេ ពីព្រោះក្រុមសមត្ថកិច្ចបានព្យាយាមសម្របសម្រួលឲ្យប្រជាពលរដ្ឋផ្អាកសកម្មភាពកាប់រានព្រៃ ហើយនាំគ្នាទៅសាលាឃុំដើម្បីស្វែងរកដំណោះស្រាយដោយសន្តិវិធី។
ប្រជាពលរដ្ឋមួយរូបឈ្មោះ ជា ហយ មានប្រសាសន៍បញ្ជាក់ថា អ្នកភូមិភាគច្រើនជាជនចំណាកស្រុក បានមករស់នៅតំបន់នេះជាបន្តបន្ទាប់គ្នានាប៉ុន្មានឆ្នាំកន្លងទៅ ដោយសារតែពួកគាត់គ្មានដីសង់លំនៅឋាន និងដីធ្វើស្រែចម្ការ។ គាត់បន្តថា អ្នកភូមិបានស្នើសុំដីសម្បទានសង្គមកិច្ចតាមរយៈអាជ្ញាធរភូមិឃុំ ទៅអាជ្ញាធរស្រុកខេត្ត ឲ្យផ្តល់ដីសម្រាប់អ្នកភូមិរស់នៅប្រកបរបរចិញ្ចឹមជីវិត តាំងពីខែមិថុនា ឆ្នាំ២០១២ ប៉ុន្តែមិនឃើញមានដំណោះស្រាយ៖ «កាប់បោះតង់នៅ កំពុងកាប់។ ឥឡូវមានបីបួនស្ថាប័នគេមកព័ទ្ធ។ គ្នាវាអត់មែន ខ្លះទៅជួលដីគេ ខ្លះទៅសុំដីគេនៅ។ ឥឡូវដល់កំណត់ឆ្នាំគេដេញ»។
កាលពីសប្ដាហ៍មុននេះ ប្រជាពលរដ្ឋចំណាកស្រុកទាំងនោះបានព្យាយាមកាប់ឆ្ការព្រៃនេះមួយលើករួចហើយ ប៉ុន្តែបាននាំគ្នាផ្អាកវិញ បន្ទាប់ពីអាជ្ញាធរឃុំបានអញ្ជើញប្រជាពលរដ្ឋមកពិភាក្សាស្វែងរកដំណោះស្រាយ ប៉ុន្តែមិនបានលទ្ធផល ទើបអ្នកភូមិនាំគ្នាទៅកាប់រានព្រៃជាថ្មីទៀត។
មេឃុំពូជ្រៃ លោក កើញ រដ្ឋា មានប្រសាសន៍បញ្ជាក់ថា អាជ្ញាធរឃុំ និងស្រុក បានចុះហត្ថលេខារួចហើយលើលិខិតស្នើសុំដីនៅតំបន់នោះជូនអាជ្ញាធរខេត្តដោះស្រាយ ប៉ុន្តែថ្នាក់ខេត្តមិនទាន់ឆ្លើយតប៖ «ខ្ញុំរង់ចាំតែខេត្តស្រុកដែរហ្នឹង ឃុំខ្ញុំមិនដឹងធ្វើម៉េច ខ្ញុំអត់មានសិទ្ធិដែរ។ សូម្បីបងអភិបាលស្រុកក៏អត់សិទ្ធិចែកចាយដែរ»។
វិទ្យុអាស៊ីសេរី មិនអាចទាក់ទងអភិបាលស្រុកពេជ្រាដា លោក នួន សារ៉ន ដែលដឹកនាំកងកម្លាំងទប់ស្កាត់ករណីនេះបានទេ នៅថ្ងៃពុធ ទី១៥ ខែឧសភា។
យ៉ាងនេះក្តី នាយខណ្ឌរដ្ឋបាលព្រៃឈើខេត្តមណ្ឌលគិរី លោក កែប តក់ មានប្រសាសន៍បញ្ជាក់ថា ព្រៃដែលអ្នកភូមិចូលទៅកាប់រាន គឺជាព្រៃអភិរក្សមិនអនុញ្ញាតឲ្យប្រជាពលរដ្ឋចូលទៅរស់នៅតាំងទីលំនៅបានឡើយ៖ «ឥឡូវយើងកំពុងចាត់វិធានការឲ្យគាត់រើចេញពីហ្នឹង បើអ្នកណាខ្វះដីពិតប្រាកដ គេមានដីសម្បទានសង្គមកិច្ចចែកជូនពួកគាត់ឲ្យគាត់ទៅចុះឈ្មោះតាមអាជ្ញាធរមូលដ្ឋានភូមិឃុំគាត់ទៅ»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តមណ្ឌលគិរី លោក សុក រដ្ឋា ផ្តល់យោបល់ថា អាជ្ញាធរពាក់ព័ន្ធគួរស្វែងរកដំណោះស្រាយផ្តល់ទីតាំងបណ្ដោះអាសន្ន ឬផ្តល់ដីសម្បទានសង្គមកិច្ចជូនប្រជាពលរដ្ឋដែលខ្វះដីរស់នៅជាក់ស្តែង។ លោកបន្តថា នេះជារដូវធ្លាក់ភ្លៀង ដូច្នេះប្រជាពលរដ្ឋត្រូវការទីតាំងស្នាក់នៅសម្រាប់ក្រុមគ្រួសារការពារផលប៉ះពាល់ផ្នែកសុខភាព៖ «គាត់អាចស្រាវជ្រាវថា អ្នកណាអត់ដីពិតប្រាកដ ឬផ្តល់ដីកន្លែងណាឲ្យគាត់រស់នៅបណ្ដោះអាសន្ន ឬរដ្ឋឲ្យគាត់ទៅនៅកន្លែងណាផ្សេង។ អាជ្ញាធរខ្ញុំគិតថា គាត់មានតួនាទីចំណុចហ្នឹងដែរ»។
ប្រជាពលរដ្ឋអះអាងថា ការជួបពិភាក្សារវាងអាជ្ញាធរស្រុក និងប្រជាពលរដ្ឋនៅរសៀលថ្ងៃដដែលនេះ មិនបានលទ្ធផលអ្វីទេ ហេតុនេះពួកគាត់អះអាងថានឹងធ្វើញត្តិដាក់ជូនលោកនាយករដ្ឋមន្ត្រីជួយដោះស្រាយបញ្ហានេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។