អណ្ដូងលូរបស់ពលរដ្ឋជាង ២០គ្រួសារ នៅចំណុចកំប៉ូតស្បូវ នៃឃុំអញ្ចាញរូង ស្រុកបរិបូរណ៍ ខេត្តកំពង់ឆ្នាំង មានទឹកចេញអាចប្រើប្រាស់បានខ្លះហើយ ប៉ុន្តែពួកគេនៅតែប្រើប្រាស់សន្សំសំចៃខ្លាំង ព្រោះកម្រិតទឹកអណ្ដូងដែលចាប់ផ្ដើមចេញឡើងវិញកាលពីថ្ងៃទី៣ ខែឧសភា មកនោះយឺតពេក។ អាជ្ញាធរអះអាងថា ពលរដ្ឋនៅតំបន់នោះមានទឹកប្រើប្រាស់គ្រប់គ្រាន់។
អ្នកយកព័ត៌មានរបស់វិទ្យុអាស៊ីសេរី បានចុះទៅតំបន់កំប៉ូតស្បូវ នៃភូមិអញ្ចាញរូង ជាថ្មីទៀតនៅថ្ងៃទី៥ ខែឧសភា បន្ទាប់ពីអ្នកនាំពាក្យសាលាខេត្តកំពង់ឆ្នាំង ចេញលិខិតបំភ្លឺមួយច្បាប់ ដោយចោទថា វិទ្យុអាស៊ីសេរី ផ្សាយព័ត៌មានមិនពិតទាក់ទងនឹងពលរដ្ឋនៅតំបន់នោះខ្វះខាតទឹកប្រើប្រាស់។ នៅក្នុងលិខិតបំភ្លឺរបស់សាលាខេត្តចុះថ្ងៃទី៤ ខែឧសភា ឆ្នាំ២០១៦ បញ្ជាក់ថា ពលរដ្ឋមានទឹកប្រើគ្រប់គ្រាន់ បន្ទាប់ពីមានភ្លៀងធ្លាក់ពីរមេជាប់ៗគ្នាកាលពីថ្ងៃទី៣០ ខែមេសា និងថ្ងៃទី១ ខែឧសភា ឆ្នាំ២០១៦។
អណ្ដូងរបស់អ្នកភូមិជាង២០ ហើយធ្លាប់ចេញតែពីរអណ្ដូងនោះ បច្ចុប្បន្នចេញទឹកស្ទើរគ្រប់អណ្ដូងវិញហើយ ប៉ុន្តែពលរដ្ឋខ្លះខកចិត្តនឹងការអះអាងរបស់អាជ្ញាធរ ដែលថា គាត់មានទឹកប្រើគ្រប់គ្រាន់។
អ្នកភូមិថា ពួកគាត់មិនអាចទៅដងទឹកមិនស្អាតដែលដក់តាមប្រឡាយមកប្រើនោះទេ ដោយគាត់សុខចិត្តសម្រេងទឹកពីក្នុងអណ្ដូងដែលចេញកាន់តែច្រើនឡើងៗ ក្រោយភ្លៀងធ្លាក់នោះមកប្រើ។
ពលរដ្ឋរស់នៅចំណុចកំប៉ូតស្បូវម្នាក់ គឺលោក ហុង សើ មានប្រសាសន៍ថា បានគុណបុណ្យភ្លៀងធ្លាក់ពីរមេ ទើបបានទឹកជ្រាបចូលក្នុងដីធ្វើឲ្យទឹកអណ្ដូងខ្លះចេញទឹកឡើងវិញ។ ប៉ុន្តែពលរដ្ឋអាចនឹងខ្វះខាតទឹកជាថ្មីទៀត បើគ្មានភ្លៀងធ្លាក់បន្ថែមទៀតនោះទេ។
លោកថា អាកាសធាតុក្ដៅខ្លាំង និងគ្រោះរាំងស្ងួតនៅឆ្នាំនេះ បានបង្កទុកលំបាកយ៉ាងខ្លាំងដល់ពលរដ្ឋ ហើយលោកខ្លាចរឿងបែបនេះកើតឡើងនៅឆ្នាំក្រោយៗទៀត៖ «ទឹកវាមានតិចតួច បានភ្លៀង អ៊ីចឹងមានខ្លះដូចខ្ញុំនិយាយអ៊ីចឹង ខាងណោះគេបានទៅ ខាងណេះអត់។ មុនហ្នឹងអត់បណ្ដោយ! កាយទៅអត់ទឹក បងមិនដើរមើលបើខ្ញុំថាភូត សុទ្ធតែអាចម៍ដីគ្រប់ផ្ទះ នេះផ្ទះបងនេះក៏អ៊ីចឹងដែរ អត់មានទឹកឯណា ទើបបានភ្លៀងនេះទេ»។
លិខិតបំភ្លឺរបស់អ្នកនាំពាក្យសាលាខេត្តកំពង់ឆ្នាំង លោក ម៉ម ឈឿម ឲ្យដឹងថា ក្រោយពីទទួលព័ត៌មាននៅព្រឹកថ្ងៃទី៤ ខែឧសភា អភិបាលខេត្តកំពង់ឆ្នាំង បានចាត់ឲ្យលោកដឹកនាំក្រុមការងារចម្រុះចុះពិនិត្យស្ថានភាពជាក់ស្ដែងនៅចំណុចកំប៉ូតស្បូវ នៃភូមិអញ្ចាញរូង។ ជាលទ្ធផលលោកអះអាងថា ការផ្សាយរបស់គេហទំព័រវិទ្យុអាស៊ីសេរី មិនពិត ព្រោះពលរដ្ឋនៅតំបន់កំប៉ូតស្បូវ ប្រាប់ថា ចាប់តាំងពីថ្ងៃទី៣០ ខែមេសា មកពលរដ្ឋមានទឹកប្រើប្រាស់គ្រប់គ្រាន់ បន្ទាប់ពីមានភ្លៀងធ្លាក់ នាថ្ងៃនោះ ហើយនៅថ្ងៃទី១ ខែឧសភា ឆ្នាំ២០១៦ មានទឹកដក់នៅក្នុងប្រឡាយ នៃតំបន់នោះទៀតផង។
ការបញ្ជាក់របស់ពលរដ្ឋ និងចុះពិនិត្យមើលស្ថានភាពជាក់ស្ដែងនៅថ្ងៃទី៤ ខែឧសភា នោះ គឺស្របពេលដែលទឹកអណ្ដូងរបស់អ្នកភូមិចាប់ផ្ដើមចេញ និងអាចដងយកទឹកមកប្រើប្រាស់បានខ្លះហើយ។ ប៉ុន្តែភ្លាមៗក្រោយភ្លៀងធ្លាក់ គឺនៅថ្ងៃទី២ ខែឧសភា អ្នកយកព័ត៌មានវិទ្យុអាស៊ីសេរី ទៅដល់ទីតាំងនោះ ឃើញអណ្ដូងទឹកភាគច្រើនក្នុងចំណោម ២០អណ្ដូង មានសភាពរីងរាក់ឃើញបាតដី និងមានទឹកដក់ខ្លះនៅតាមប្រឡាយអមសងខាងផ្លូវចូលទៅចំណុចដែលពលរដ្ឋរស់នៅនោះ។ ប្រជាពលរដ្ឋប្រមាណ ១០នាក់ដែលវិទ្យុអាស៊ីសេរី បានជួបសម្ភាសន៍ និងផ្សព្វផ្សាយនៅថ្ងៃទី៣ ខែឧសភា សុទ្ធតែត្អូញត្អែរពីបញ្ហាខ្វះខាតទឹកប្រើប្រាស់ ហើយស្នើឲ្យអាជ្ញាធរជួយស្ដារអណ្ដូង ឬជីកស្រះក្បែរភូមិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។