អាជីវកម្មចិញ្ចឹមជ្រូកយកសាច់មួយកន្លែងនៅក្នុងឃុំស្នោ ស្រុកព្រៃកប្បាស ខេត្តតាកែវ មិនគោរពការសន្យាកាលពីឆ្នាំមុន ថានឹងគ្រប់គ្រងលាមកសត្វជ្រូកមិនបង្កក្លិនស្អុយ ប៉ះពាល់ការរស់នៅរបស់អ្នកជិតខាងទៀតទេ។ ប៉ុន្តែ មួយឆ្នាំកន្លងមកនេះ ក្លិនស្អុយនៅតែបន្តជះក្លិនមកលើអ្នកជិតខាង ទើបអាជ្ញាធរមូលដ្ឋានសន្យានឹងចាត់វិធានការតាមផ្លូវច្បាប់។
អាជ្ញាធរឃុំស្នោ ស្រុកព្រៃកប្បាស ខេត្តតាកែវ គ្រោងប្ដឹងកសិដ្ឋានចិញ្ចឹមជ្រូកមួយកន្លែង នៅតែបង្កក្លិនស្អុយមកលើបរិយាកាសអ្នករស់នៅជិតខាង។
គម្រោងប្ដឹងនេះ ធ្វើឡើងក្រោយពីកសិដ្ឋានចិញ្ចឹមជ្រូកនៅក្នុងភូមិទង្គែ ឃុំស្នោ ស្រុកព្រៃកប្បាស មិនគោរពកិច្ចសន្យារបស់ខ្លួន កាលពីខែមិថុនា ឆ្នាំ២០១៣ កន្លងទៅ ថានឹងស្តុកលាមកជ្រូកឲ្យល្អ មិនបង្កក្លិនស្អុយប៉ះពាល់ការរស់នៅរបស់អ្នកជិតខាងទេ។
អនុប្រធានភូមិទង្គែ ឃុំស្នោ លោក ច្រិច សុខ មានប្រសាសន៍នៅថ្ងៃទី១០ ខែមិថុនា ថា លោក គា វាសនា ជាម្ចាស់កសិដ្ឋានចិញ្ចឹមសត្វជ្រូកទ្រង់ទ្រាយធំ។ លោកថា ច្រើនឆ្នាំមកហើយដែលអ្នករស់នៅក្បែរកសិដ្ឋាននោះប្ដឹងមកឲ្យអាជ្ញាធរ និងមន្ត្រីបរិស្ថាន សុំដោះស្រាយអំពីបញ្ហាក្លិនស្អុយនៃលាមកជ្រូក ដែលម្ចាស់កសិដ្ឋានមិនបានទុកដាក់ល្អ។ លោកថា ម្ចាស់កសិដ្ឋានបានសន្យាសុំសាងសង់ឡស្តុកលាមកជ្រូកឲ្យបានចប់សព្វគ្រប់ នៅថ្ងៃទី៥ ខែមិថុនា ឆ្នាំ២០១៣។ ប៉ុន្តែកាកសំណល់នៅសល់តិចតួច នៅតែបន្តបាញ់ទឹកទម្លាក់មកលើផ្លូវលំ ដែលអ្នកភូមិដើរកាត់៖ «កាកសំណល់ធំៗនោះ គឺកើបចេញដែរ ប៉ុន្តែនៅតិចតួច គឺបាញ់បង្ហូរចូលកន្លែងហ្នឹង ដល់ពេលអ៊ីចឹង វាជះក្លិនហ្នឹងទៅ ហើយខាងបរិស្ថានគេមកធ្វើហើយ ប៉ុន្តែខាងនោះគេអត់ប្រព្រឹត្តកិច្ចសន្យា»។
អ្នកភូមិដែលនៅក្បែរកសិដ្ឋានចិញ្ចឹមជ្រូក លោក ហាន់ ហ៊ុត ថ្លែងថា ក្នុងរដូវក្តៅ និងលាយឡំអាកាសធាតុអួរអ័ព្វធ្លាក់ភ្លៀងម្តងម្កាល ក្លិនស្អុយនៃលាមកជ្រូកជះក្លិនពេញទំហឹងមកលើផ្ទះគាត់ ដែលនៅប្រមាណ ៥ម៉ែត្រពីទ្រុងជ្រូក។ លោកសុំឲ្យមន្ត្រីបរិស្ថាន និងអាជ្ញាធរឃុំ ជំរុញឲ្យម្ចាស់កសិដ្ឋាន គ្រប់គ្រងកាកសំណល់លាមកជ្រូកតាមការសន្យា កាលពីខែមិថុនា ឆ្នាំ២០១៣ ដែលបានសន្យាថា មិនបង្កក្លិនស្អុយប៉ះពាល់អ្នកជិតខាងទៀតទេ៖ «គេមានអាងរណ្ដៅស្តុកគេមួយ ក្នុងបរិវេណដីគេហ្នឹង អ៊ីចឹងអាស្តុកហ្នឹងវាស្អុយណាស់ ស្អុយពពុះស្កុលតែម្តង។ ពេលណាមានភ្លៀងរលឹមតិចៗមក គេបូមបង្ហូរតាមផ្លូវលំ ខែហ្នឹងខ្យល់វាបក់មកពីអាគ្នេយ៍ វាបក់មកមូលចំតែម្តង ខ្ញុំនៅខាងក្រោមខ្យល់»។
វិទ្យុអាស៊ីសេរី មិនអាចទាក់ទង លោក គា វាសនា ដែលជាម្ចាស់កសិដ្ឋានចិញ្ចឹមជ្រូកក្នុងភូមិទង្គែ សុំការបំភ្លឺតបការលើកឡើងនេះបានភ្លាមៗទេ នៅថ្ងៃទី១០ ខែមិថុនា។
មេឃុំស្នោ លោក ខៀម ឡេង ថ្លែងថា ការសន្យារបស់ម្ចាស់កសិដ្ឋានចិញ្ចឹមជ្រូកកាលពីមុន ថាមិនបង្កក្លិនស្អុយ និងធ្វើឲ្យកខ្វក់បរិស្ថានដល់អ្នកជិតខាងទេ។ បើសិនគាត់នៅតែមិនអាចគ្រប់គ្រងលាមកជ្រូករបស់ខ្លួនបានល្អទេ អាជ្ញាធរនឹងប្ដឹងបញ្ហានេះទៅមន្ត្រីបរិស្ថាន ឲ្យចុះផាកពិន័យកសិដ្ឋានចិញ្ចឹមជ្រូកនៅភូមិទង្គែ ទៅតាមច្បាប់៖ «ឯកសារដែលគាត់ធ្វើលក្ខខណ្ឌកន្លងមក បើកាលណាគាត់មិនគោរពទៅតាមលក្ខខណ្ឌ នោះយើងមានតែធ្វើទៅតាមផ្លូវច្បាប់ បើស្អីដែលគាត់បានព្រមព្រៀងហើយ រឿងអីគាត់មិនព្រមធ្វើតាម»។
មន្ត្រីបរិស្ថានស្រុកព្រៃកប្បាស លោក ណយ ឡី ថ្លែងថា លោកបានចុះអង្កេតកសិដ្ឋានចិញ្ចឹមជ្រូក និងបានឲ្យគេធ្វើកិច្ចសន្យាគ្រប់គ្រងកាកសំណល់ កាលពីឆ្នាំមុន។ លោកក៏បានចុះទៅពិនិត្យអាងស្តុកលាមកសត្វ និងបានណែនាំឲ្យចេះគ្រប់គ្រងកាកសំណល់ឲ្យបានត្រឹមត្រូវដែរ។ លោកថានឹងចុះទៅពិនិត្យជាថ្មីទៀត បើសិនមានបណ្ដឹងបញ្ជូនពីអាជ្ញាធរឃុំ។ លោកបន្តថា បើមានកិច្ចសហការពីអាជ្ញាធរមូលដ្ឋាន ទើបការអនុវត្តច្បាប់បានលឿន៖ «អាងហ្នឹងខ្ញុំឲ្យមានដាក់គម្របដៃអីត្រឹមត្រូវ។ ហើយដល់ពេលអាងពេញ ខ្ញុំឲ្យបូមទឹកចេញ។ ប៉ុន្តែកាលពីឆ្នាំទៅ ខ្ញុំបានចុះទៅមើលកាលនោះ គេកំពុងតែធ្វើហើយ។ ដល់ខ្ញុំរវល់ការងារច្រើន ខ្ញុំអត់បានទៅតាមដាន ហើយម្យ៉ាងអ្នកជុំវិញហ្នឹងគាត់អត់បានឲ្យដំណឹងដល់ខ្ញុំ។ ដល់អ៊ីចឹង ការងារផលប៉ះពាល់ថ្ងៃក្រោយ ខ្ញុំអត់ទាន់ដឹងដែរ»។
អាជ្ញាធរភូមិទង្គែ ឲ្យដឹងថា ក្នុងភូមិនោះអ្នកចិញ្ចឹមជ្រូកទ្រង់ទ្រាយធំចាប់ពី ៤០ក្បាល ទៅ ៥០ក្បាល មាន ៣ ទៅ ៤គ្រួសារ។ ប៉ុន្តែអ្នកចិញ្ចឹមជ្រូកដទៃទៀត គេចេះគ្រប់គ្រងសំណល់លាមកសត្វបានល្អ ហើយទ្រុងចិញ្ចឹមជ្រូកគេសង់នៅឆ្ងាយពីផ្ទះអ្នកដទៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។