ប្រជាពលរដ្ឋអះអាងថា ជនជាតិវៀតណាម ចូលមកទាក់សត្វដោយសេរីពុំមានអាជ្ញាធរណាអើពើទប់ស្កាត់សកម្មភាពរបស់ពួកគេឡើយ។ ប៉ុន្តែអាជ្ញាធរនៅក្រុងបាវិត បានបដិសេធចំពោះការលើកឡើងរបស់ប្រជាពលរដ្ឋនេះ។
ប្រជាពលរដ្ឋបានរៀបរាប់ឲ្យដឹងថា ជនជាតិវៀតណាម ជាច្រើននាក់ ធ្វើដំណើរដោយកង់ម៉ូតូជាច្រើនគ្រឿង បានចូលមកលុកលុយទាក់ចាប់យកសត្វទាំងតូចទាំងធំនៅក្រុងបាវិត យ៉ាងគគ្រឹកគគ្រេង ដោយមិនមានការក្រែងរអាពីអាជ្ញាធររបស់កម្ពុជាឡើយ។
ប្រជាពលរដ្ឋវ័យ ៥០ឆ្នាំប្លាយម្នាក់ រស់នៅភូមិត្រពាំងផ្លុង សង្កាត់បាទី នៃក្រុងបាវិត លោក មាន រិទ្ធី ថ្លែងបញ្ជាក់នៅថ្ងៃទី១៥ មករា ថា លោកសោកស្ដាយនៅពេលដែលឃើញជនជាតិវៀតណាម ទាំងក្រុមៗចូលមកទាក់សត្វក្បែរផ្ទះរបស់ខ្លួនយ៉ាងគគ្រឹកគគ្រេង ដោយពុំមានការហាមឃាត់ពីអាជ្ញាធរខ្មែរនោះទេ។ លោក មាន រិទ្ធី ថ្លែងបន្តដោយក្ដីព្រួយបារម្ភថា សត្វបក្សីទាំងតូចទាំងធំ វានឹងបាត់បង់ហិនហោចអស់ពីទឹកដីរបស់ខ្មែរ បើអាជ្ញាធរនៅតែបន្តឲ្យជនជាតិវៀតណាម ចូលមកធ្វើសកម្មភាពទាក់ចាប់សត្វ ដោយសេរីនៅលើទឹកដីខ្មែរទៀតនោះ។
លោក មាន រិទ្ធី៖ «...ឧបករណ៍ហ្នឹង គឺគេគ្មានប្រដាប់ឆក់ប្រដាប់ស្ទូចអីទេ តែគ្រាន់តែថា សភាពដែលខ្ញុំឃើញពិតគេហៅថាធ្នាក់ៗហ្នឹង គឺមានសត្វអ្វីមួយដែលគេដាក់នៅក្នុងទ្រុងអ៊ីចឹងទៅ ហើយគេបើកចំហបន្តិចទៅ ហើយគេមានអង្គប់សម្រាប់ចាំវៃអ៊ីចឹង ហើយគេមានដោតបង្ការគេមានដាក់ចំណីអ៊ីចឹងទៅ។ ហើយមានសត្វវាបោលអីអ៊ីចឹងទៅកាលណាធម្មតាសត្វដែលវាឃើញគ្នាវាបោលអ៊ីចឹង ទៅវាតែងមករកគ្នា។ តើវាច្រឡោតចុះច្រឡោតឡើងវាចោលអង្គុបគេ ហើយវាចូលអង្គប់គេអ៊ីចឹងគេដោះមួយអ៊ីចឹងទៅ គេទៅដាក់ទៀតទៅ។ គឺគេទាក់បានជាទ្រង់ទ្រាយធំយ៉ាងហូរហែ ហើយគេយកនៅស្រុកគេ»។
លោក មាន រិទ្ធី បញ្ជាក់បន្ថែមថា សកម្មភាពទាក់ចាប់សត្វរបស់ជនជាតិវៀតណាម នៅក្រុងបាវិត កើតមានជាហូរហែជិត ១០ឆ្នាំមកហើយ។ ប៉ុន្តែសកម្មភាពដែលពួកគេចូលមកទាក់ចាប់សត្វខ្លាំង គឺនៅអំឡុងឆ្នាំ១០១៣ និងឆ្នាំ២០១៤ នេះ។
តំបន់ដែលជនជាតិវៀតណាម ចូលមកទាក់ចាប់សត្វស្ថិតនៅក្នុងតំបន់ព្រៃនៅភូមិត្រពាំងផ្លុង នៃសង្កាត់បាទី ក្រុងបាវិត ខេត្តស្វាយរៀង ហើយសត្វដែលជនជាតិវៀតណាម និយមទាក់ចាប់យកទៅលក់ភាគច្រើនជាបក្សីប្រភេទ សត្វ តាវិចទេចៅ ពពេច ចាបពូក និងសត្វកាតតទាតា ជាដើម។
ទាក់ទងនឹងបញ្ហានេះ អភិបាលក្រុងបាវិត លោក ណេប សារ៉ុន មានប្រសាសន៍បញ្ជាក់ថា ពុំមានជនជាតិវៀតណាម ឯណាចូលមកទាក់ចាប់សត្វនៅតំបន់ក្រុងបាវិត ដូចការចោទប្រកាន់របស់ប្រជាពលរដ្ឋនោះឡើយ។ លោកថ្លែងបន្តថា អាជ្ញាធរបានយកចិត្តទុកដាក់រឹតបន្តឹង មិនឲ្យមានជនបរទេសណាចេញចូលនៅតំបន់ក្រុងបាវិត ដោយគ្មានច្បាប់ទម្លាប់នោះទេ។
លោក ណេប សារ៉ុន៖ «មិនថាយ៉ាងម៉េចទេ ប៉ុន្តែអាជ្ញាធរវាគ្មានទេ អាហ្នឹងវាគ្រាន់តែគាត់មើលឃើញតែមួយចំណែកណាទេ។ តែសម្រាប់ក្រុងបាវិតហ្នឹង គឺខ្ញុំអះអាងថា វាគ្មានតែម្ដង ព្រោះយើងវាអត់មានព្រៃ។ វាមានប្រជាជនវៀតណាម ណាមកដាក់ យើងសមត្ថកិច្ចយើងការចេញចូលហ្នឹង យើងមានច្បាប់ទម្លាប់របស់យើងត្រឹមត្រូវ»។
តែយ៉ាងណា ប្រជាពលរដ្ឋឲ្យដឹងថា ជនជាតិវៀតណាម ចូលមកទាក់សត្វនៅក្នុងទឹកដីប្រទេសកម្ពុជា រួចយកទៅលក់នៅប្រទេសខ្លួនក្នុងមួយក្បាលតម្លៃប្រមាណ ៥ដុល្លារអាមេរិក ចំពោះ ចាបពូក និងសត្វពពេច។ រីឯសត្វប្រភេទកម្រផ្សេងទៀត លក់តម្លៃប្រមាណ ៧០ដុល្លារអាមេរិក ក្នុងសត្វមួយក្បាល ហើយសត្វទាំងនោះជាប្រភេទសត្វពេញនិយម ដែលជនជាតិវៀតណាម ទិញយកទៅចិញ្ចឹម សម្រាប់តាំងលម្អតាមផ្ទះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕