ប្រធានការិយាល័យនគរបាលបង្ការ និងពន្លត់អគ្គិភ័យនៃស្នងការដ្ឋាននគរបាលរាជធានីភ្នំពេញ លោកវរសេនីយ៍ នេត វន្ថា មានប្រសាសន៍ថា ផ្ទះដែលរងការខូចខាតជាប្រភេទផ្ទះលក់ទំនិញ និងប្រកបអាជីវកម្មផ្សេងៗ។ ហើយបើតាមការប៉ាន់ស្មានអគ្គិភ័យនេះ បានធ្វើអោយខាតទ្រព្យសម្បត្តិពលរដ្ឋសរុបប្រមាណ ២០ម៉ឺនដុល្លារ។
លោក នេត វន្ថា បន្តថា តាមការសន្និដ្ឋានជំហានដំបូង មូលហេតុដែលនាំអោយមានអគ្គិភ័យអាចបណ្ដាលពីការធ្វេសប្រហែស ឬការឆ្លងចរន្តអគ្គិសនីនៅក្នុងហាងកាហ្វេមួយ ដែលជាដើមហេតុអោយមានការឆាបឆេះ។
លោក នេត វន្ថា៖ «ឥឡូវ យើងកំពុងស្រាវជ្រាវជាមួយនគរបាលប៉ុស្តិ៍ខណ្ឌ និងអញ្ជើញផ្ទះដែលពាក់ព័ន្ធទាំងអស់ ដើម្បីបំភ្លឺជុំវិញការបង្កអោយមានអគ្គិភ័យ។ យើងអត់ទាន់បានព័ត៌មានច្បាស់លាស់ទេ គ្រាន់តែចេញពីផ្ទះហាងកាហ្វេ។ សម្រាប់ជំនាញ យើងខ្ញុំដែលជាបឋមអាចសន្និដ្ឋានថា ថ្ងៃនេះថ្ងៃសីល អាចពាក់ព័ន្ធនឹងការប្រើប្រាស់ឧបករណ៍សែនផ្សេងៗ ហើយទី២ យើងអាចថាផ្ទះឈើ ឃើញថាការតបណ្ដាញចរន្តអគ្គិសនី ក៏មានភាពមិនប្រក្រតីច្រើន ហ្នឹងជាចំណុចពីរដែលខ្ញុំមានការសង្ស័យ»។
ក្រុមសមត្ថកិច្ចពន្លត់អគ្គិភ័យ បានប្រើប្រាស់ឡានទឹក ១៨គ្រឿង ក្នុងនោះ ៣គ្រឿងជាឡានទឹករបស់មជ្ឈមណ្ឌលពិព័រណ៍កោះពេជ្រ។
ប្រធានការិយាល័យនគរបាលបង្ការ និងពន្លត់អគ្គិភ័យនៃស្នងការដ្ឋាននគរបាលរាជធានីភ្នំពេញ លោកវរសេនីយ៍ នេត វន្ថា ក៏បានអំពាវនាវដល់ប្រជាពលរដ្ឋទូទៅ ត្រូវបង្កើនការប្រុងប្រយ័ត្ន ដើម្បីបញ្ចៀសអគ្គិភ័យនៅពេលដែលរដូវក្ដៅបានចូលមកដល់ និងត្រូវត្រៀមសម្ភារៈចាំបាច់សម្រាប់ពន្លត់អគ្គិភ័យនៅគ្រប់ទីតាំងដែលងាយនឹងមានការឆាបឆេះ ជាពិសេសតាមទីកន្លែងធ្វើអាជីវកម្ម និងសិប្បកម្មនានា។
នៅក្នុងរាជធានីភ្នំពេញ តាមការប៉ាន់ស្មាន គឺមានប្រជាពលរដ្ឋប្រហែលពី ៣០ ទៅ ៤០% បានយល់ដឹងពីរបៀបទប់ស្កាត់ និងប្រើប្រាស់សម្ភារៈពន្លត់អគ្គិភ័យបឋម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។