ពិធីបុណ្យចូលឆ្នាំប្រពៃណីជាតិខ្មែរ ថ្ងៃទីមួយបានចូលមកដល់ ដោយពលរដ្ឋតាមផ្ទះនាំគ្នារៀបចំគ្រឿងរណ្ដាប់ដើម្បីទទួលទេវតាឆ្នាំថ្មី។ សកម្មភាពពលរដ្ឋនៅខេត្តកំពង់ចាម តាមវត្តអារាម និងការដើរលេងកម្សាន្តនៅថ្ងៃទីមួយ គឺមានភាពស្ងប់ស្ងាត់ខុសពីឆ្នាំមុនៗ។ ពលរដ្ឋតំបន់ខ្លះថា ដោយសារអ្នកភូមិនាំគ្នាទៅរកស៊ីតំបន់ឆ្ងាយៗ មិនបានត្រឡប់មកចូលរួមពិធីចូលឆ្នាំនៅស្រុកកំណើត និងខ្លះថា ខ្លាចមានបញ្ហាសុវត្ថិភាពផ្ទាល់ខ្លួនជាដើម។
ថ្ងៃទី១ នៃពិធីបុណ្យចូលឆ្នាំប្រពៃណីជាតិខ្មែរនៅខេត្តកំពង់ចាម នៅតាមវត្តខ្លះ និងតាមកន្លែងកម្សាន្តខ្លះឃើញដាក់ទង់ជ័យព្រះពុទ្ធសាសនា និងទង់ចម្រុះពណ៌ផ្សេងទៀត ប៉ុន្តែបែរជាមានលក្ខណៈស្ងប់ស្ងាត់មិនសូវមានមនុស្សដើរលេងច្រើនដូចរាល់ឆ្នាំ។ ពលរដ្ឋខ្លះហាក់មិនចង់ដើរទៅលេងទីណាទេ ដោយពួកគេចង់នៅជួបជុំក្រុមគ្រួសារនៅផ្ទះនៅថ្ងៃចូលឆ្នាំដំបូង។ ចំណែកពលរដ្ឋតំបន់ខ្លះថា ដោយសារឆ្នាំនេះ គេបង្កបង្កើនផលមិនបានលទ្ធផលល្អទើបធ្វើឱ្យពួកគេខកខានរៀបចំបុណ្យចូលឆ្នាំឲ្យបានអធិកអធម។
ពលរដ្ឋនៅឃុំសណ្ដែក ស្រុកបាធាយ លោក ហ៊ុន ហាង មានប្រសាសន៍ថា ជារៀងរាល់ឆ្នាំ ពលរដ្ឋនៅក្នុងភូមិតែងនាំគ្នាមកធ្វើបុណ្យ ដោយយកចង្ហាន់មកវត្ត ឬមកលេងកម្សាន្តច្រើននៅថ្ងៃបុណ្យចូលឆ្នាំខ្មែរថ្ងៃដំបូង។ ក៏ប៉ុន្តែលោកថា ឆ្នាំនេះពលរដ្ឋនៅក្នុងឃុំភាគច្រើនជួបគ្រោះរាំងស្ងួត ដែលជាហេតុធ្វើឱ្យស្រូវរបស់ពួកគាត់ខ្លះខូចខាតទាំងស្រុង។ ស្របពេលស្រូវក៏ខូច បំណុលគេក៏ជំពាក់ ពលរដ្ឋខ្លះ ពិសេសយុវជននាំគ្នាទៅរកការងារធ្វើនៅតំបន់ឆ្ងាយៗ ខ្លះរហូតប្រទេសថៃ ក៏មាន ទើបនាំឱ្យពួកគាត់មិនអាចត្រឡប់មកធ្វើបុណ្យនៅស្រុកកំណើតបាន៖ «មិនបានមកកន្លែងបុណ្យឱ្យបានច្រើនទេ បុណ្យឆ្នាំនេះកម្សត់កម្រណាស់ មិនដូចរាល់ឆ្នាំទេ។ សូម្បីតែធ្លាប់ធ្វើធ្វើនំដាក់ការុង ឥឡូវដាក់តែបេទេ»។
ក្រៅពីបញ្ហានេះ ពលរដ្ឋនៅស្រុកកងមាសវិញ លោក ខេមរា មានប្រសាសន៍ថា នៅព្រឹកថ្ងៃទីមួយភាគច្រើនឃើញពលរដ្ឋនាំគ្នាស្វះស្វែងរកគ្រឿងតង្វាយទេវតា រួមមានបាយសី ផ្កាភ្ញី ផ្លែឈើនៅតាមផ្សារ ដើម្បីត្រៀមរៀបចំទទួលទេវតាឆ្នាំថ្មី។ លោកកត់សម្គាល់ឃើញអ្នកភូមិមិនសូវនាំគ្នាដើរលេងប៉ុន្មានទេនៅថ្ងៃទីមួយ ភាគច្រើនឃើញពួកគាត់នៅផ្ទះជួបជុំជាមួយក្រុមគ្រួសារ។
លោកយល់ថា មូលហេតុនាំឱ្យពលរដ្ឋខ្លះមិនសូវចង់ដើរលេងនៅថ្ងៃទីមួយ ដោយសារតែពួកគេគិតគូរលើបញ្ហាសុវត្ថិភាពរបស់ខ្លួន ពិសេសគឺគ្រោះថ្នាក់ចរាចរណ៍តែម្តង ហើយម្យ៉ាងដោយមានជំនឿថាទេវតាឆ្នាំនេះ សោយលោហិតផង ទើបនាំឱ្យពលរដ្ឋខ្លះមានការប្រុងប្រយ័ត្ន៖ «ហើយនេះជាឱកាសល្អដែលយុវជនមានការប្រុងប្រយ័ត្ន ព្រោះថា មាតាបិតាមានការត្រេកអរ ហើយជូនពរយុវជន យុវនារីទូទៅ ទូទាំងប្រទេស ដោយឡែកនៅស្រុកកងមាសជួបប្រទះតែសេចក្ដីសុខនាឱកាសឆ្នាំថ្មីនេះ ត្រូវការពារសុវត្ថិភាពខ្លួន»។
យ៉ាងណាក៏ដោយលោកបន្តថា កន្លងមកឃើញភាគច្រើនយុវជននាំគ្នាដើរលេងនៅពេលរសៀលនៅតាមវត្តនានា ពិសេស គឺពួកគេច្រើនតែដើរលេងកម្សាន្តនៅថ្ងៃទីពីរ ឬទីបីនៃពិធីបុណ្យចូលឆ្នាំខ្មែរ។
ទោះជាយ៉ាងណា បញ្ហាសន្តិសុខសុវត្ថិភាពនៅតាមផ្លូវ ពិសេសនៅតំបន់គោលដៅ រួមមានទីផ្សារ វត្តអារាម រមណីយដ្ឋានជាដើម អាជ្ញាធរខេត្តកំពង់ចាម បានដាក់កម្លាំងសមត្ថកិច្ចតាមតំបន់ទាំងនោះដើម្បីជួយសម្រួលចរាចរណ៍ និងការពារសន្តិសុខសណ្ដាប់ធ្នាប់ជូនពលរដ្ឋ។
ទាក់ទងការរក្សាសន្តិសុខសុវត្ថិភាពជូនពលរដ្ឋ ស្នងការនគរបាលខេត្តកំពង់ចាម លោក ប៉ែន រ័ត្ន ធ្លាប់មានប្រសាសន៍ថា ខាងកម្លាំងសមត្ថកិច្ចខេត្តកំពង់ចាម ក៏បានត្រៀមនៅតាមតំបន់សំខាន់ៗរួមមានតំបន់កម្សាន្ត វត្តអារាម ទីប្រជុំជន គឺដើម្បីបញ្ចៀសនូវបញ្ហាផ្សេងៗ រួមមាន ចោរកម្ម អំពើហិង្សា ល្បែងស៊ីសង អគ្គិភ័យ និងគ្រោះថ្នាក់ចរាចរណ៍ជាដើម។ បន្ថែមពីនេះ ខាងក្រសួងមហាផ្ទៃ ក៏បានចេញសេចក្ដីអំពាវនាវមួយឱ្យពលរដ្ឋអ្នកប្រើប្រាស់ផ្លូវទាំងអស់គប្បីមានការប្រុងប្រយ័ត្នខ្ពស់ ដោយមិនត្រូវពិសាគ្រឿងស្រវឹងហើយបើកបរ។ អ្នកបើកបរត្រូវគោរពច្បាប់ឱ្យបានខ្ជាប់ខ្ជួន មិនត្រូវបើកបរលើសល្បឿនកំណត់ ត្រូវចេះគោរព និងយោគយល់អធ្យាស្រ័យគ្នាទៅវិញទៅមកជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។