អតីតនិស្សិតជនជាតិចាម ប្រមាណ ៥០នាក់ បានរៀបចំកម្មវិធីជួបជុំគ្នាលើកទី៣ នារាជធានីភ្នំពេញ កាលពីថ្ងៃទី១៧ ខែឧសភា ដើម្បីពិភាក្សាគ្នារកវិធីជួយដល់និស្សិតជំនាន់ក្រោយឲ្យមានលទ្ធភាពបន្តការសិក្សានៅថ្នាក់ឧត្ដមសិក្សា។
កម្មវិធីជួបជុំអតីតនិស្សិតនេះ មានការចូលរួមពីរដ្ឋលេខាធិការក្រសួងសង្គមកិច្ច និងអតីតយុទ្ធជន យុវនីតិសម្បទា និងជាប្រធានសមាគមអភិវឌ្ឍន៍ខ្មែរឥស្លាម លោក អះម៉ាត់ យ៉ះយ៉ា។ លោកបានជួយនិស្សិតក្រីក្ររាប់រយនាក់ក្នុងមួយឆ្នាំៗឲ្យបន្តការសិក្សានៅសាកលវិទ្យាល័យន័រតុន។
លោក អះម៉ាត់ យ៉ះយ៉ា មានប្រសាសន៍ថា លោកចង់ឲ្យអតីតនិស្សិតបញ្ចប់ការសិក្សាដែលមានការងារធ្វើហើយនោះ ត្រូវរួមគ្នាបរិច្ចាគវិភាគទានខ្លះជួយដល់និស្សិតក្រីក្រមកពីតាមបណ្ដាខែត្រឲ្យបន្តការសិក្សាដូចដែលលោកបានជួយនិស្សិតក្រីក្រនោះដែរ ព្រោះថា មានតែការអប់រំទេដែលធ្វើឲ្យមានការផ្លាស់ប្ដូរជីវភាពរស់នៅរបស់ប្រជាពលរដ្ឋ។
លោក អះម៉ាត់ យ៉ះយ៉ា៖ «យើងត្រូវមានគំនិតរួបរួមគ្នា។ គ្នាយើងមាន ២០នាក់ ៣០នាក់ ឬ ៥០នាក់ ធ្វើជាស្នូលដើម្បីកសាងធនធានមនុស្ស កសាងសហគមន៍ កសាងប្រទេសជាតិ ដើម្បីក្លាយជាអ្នកធូរធារ ហើយយើងច្បាស់លាស់ខ្លួនយើង កុំភ័យឲ្យសោះ។ យើងមានគ្នាតិចមែន តែយើងមានគុណភាព ដូចពាក្យថា យើងជាជនជាតិភាគតិច តែយើងត្រូវធ្វើឲ្យទៅជាភាគច្រើន ព្រោះថា ពួកយើងមានសញ្ញាប័ត្រខ្ពស់ PHD & Dr»។
លោក អះម៉ាត់ យ៉ះយ៉ា គឺជាស្ថាបនិកដំបូងគេដែលបានផ្ដួចផ្ដើមគំនិតរកជំនួយពីបរទេសជួយដល់និស្សិតក្រីក្រជនជាតិចាមនៅកម្ពុជា គិតចាប់ពីឆ្នាំ១៩៩៩ មក។ បច្ចុប្បន្ននេះនិស្សិតដែលបញ្ចប់ការសិក្សា និងកំពុងសិក្សាមានប្រមាណ ១ពាន់នាក់ ដែលលោក អះម៉ាត់ យ៉ះយ៉ា បានជួយ។
ក្រុមនិស្សិតទាំងនោះបានឯកភាពគ្នាបរិច្ចាគថវិកាប្រចាំឆ្នាំដើម្បីជួយលើកកម្ពស់ការអប់រំដល់និស្សិតជនជាតិចាម នៅកម្ពុជា ហើយនឹងជួយដល់កម្មវិធីមនុស្សធម៌ផ្សេងៗទៀតនៅតាមសហគមន៍មូលដ្ឋានដែលខ្វះខាតចាំបាច់។ ក្រុមអតីតនិស្សិតទាំងនេះបានបោះឆ្នោតអនុម័តឲ្យមានប្រធានដឹកនាំអតីតនិស្សិតបញ្ចប់ការសិក្សាមួយរួប បង្កើតគណៈកម្មការទទួលបន្ទុកខាងអប់រំ គណៈកម្មការសេដ្ឋកិច្ច និងព្រមព្រៀងគ្នារៀបចំកម្មវិធីជួបជុំគ្នាយ៉ាងតិចបាន ១ឆ្នាំពីរដង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។