មន្ត្រីក្រសួងយុត្តិធម៌ខ្មែរបដិសេធដំណឹងផ្សាយដោយវិទ្យុអាស៊ីសេរីភាសាវៀតណាម

ដោយ ម៉ៅ សុធានី

2008-08-27

អនុរដ្ឋលេខាធិការក្រសួងយុត្តិធម៌ប្រទេសកម្ពុជា បានបដិសេធចំពោះសេចក្តីរាយការណ៍របស់វិទ្យុអាស៊ីសេរីជាភាសាវៀតណាម ដែលបានផ្សាយ កាលពីថ្ងៃទី១៦ ខែសីហា កន្លងមកនេះថា លោកជាប្រធានរណសិរ្សរំដោះខ្មែរកម្ពុជាក្រោម ក្នុងសេចក្តីរាយការណ៍មួយទាក់ទងនឹងការដាក់ទោសជនសង្ស័យពាក់ព័ន្ធនឹងការបំផ្ទុះគ្រឿងផ្ទុះ TNT នៅវិមានអនុស្សាវរីយ៍កម្ពុជា-វៀតណាម កាលពីថ្ងៃទី២៧ ខែកញ្ញា ឆ្នាំ២០០៧ កន្លងទៅ។

លោកអនុរដ្ឋលេខាធិការ សឺន រ៉េត សញ្ជាតិអាមេរិកាំងកំណើតខ្មែរ នៅក្នុងរដ្ឋ Main បានចេញលិខិតថា លោកបានលាឈប់ពីរណសិរ្សរំដោះខ្មែរកម្ពុជាក្រោម តាំងពីខែសីហា ឆ្នាំ២០០៤ម្ល៉េះ។

លោក សឺន រ៉េត មានប្រសាសន៍ថា ៖ «ថ្ងៃ១៦ ហ្នឹង វិទ្យុសំឡេងវៀតណាម ថា មានសមាជិកស្អីនៅប្រទេសកម្ពុជា បានធ្វើសកម្មភាពដាក់គ្រាប់ផ្ទុះស្អី នៅកន្លែងរូបមិត្តភាពកម្ពុជា-វៀតណាម នៅម្ដុំវត្តបុទមវតីហ្នឹង ហើយថា យកសមាជិករណសិរ្សអី យកមកពីសហរដ្ឋអាមេរិក ហើយបច្ចុប្បន្ននេះ ប្រធានមានឈ្មោះកំពុងធ្វើការជាសមាជិកនៅក្នុងរដ្ឋាភិបាលសម្ដេច ហ៊ុន សែន អីហ្នឹង ខ្ញុំឃើញថា វាប៉ះពាល់ដល់នយោបាយដល់អី។ អ៊ីចឹងបានខ្ញុំធ្វើលិខិតបញ្ជាក់ទៅថា ខ្ញុំមិនមានពាក់ព័ន្ធអីនឹងសកម្មភាពអីអ៊ីចឹងៗទេ គឺកុំឲ្យរដ្ឋាភិបាលលោកច្រឡំ»។

សូមជម្រាបថា កាលពីថ្ងៃ១៦ សីហា កន្លងមកនេះ វិទ្យុអាស៊ីសេរីភាសាវៀតណាម បានផ្សាយអំពីការសម្រេចរបស់តុលាការកម្ពុជា ដែលបានកាត់ទោសមនុស្ស៣នាក់ ក្នុងចំណោមមនុស្ស៥នាក់ឲ្យជាប់គុកម្នាក់១៥ឆ្នាំ និង២នាក់ទៀត ចំនួន១៧ឆ្នាំ ចំពោះសកម្មភាពធ្វើឲ្យផ្ទុះ នៅវិមានអនុស្សាវរីយ៍កម្ពុជា-វៀតណាម កាលពីថ្ងៃ២៧ ខែកញ្ញា ឆ្នាំ២០០៧នោះ។

សេចក្តីរាយការណ៍ជាភាសាវៀតណាមនោះ បានឲ្យដឹងថា លោកអនុរដ្ឋលេខាធិការ សឺន រ៉េត ដែលជាមេដឹកនាំរណសិរ្សរំដោះខ្មែរកម្ពុជាក្រោម មកពីសហរដ្ឋអាមេរិកពុំឃើញមានទោសពៃរ៍ផងទេ។

ទោះបីយ៉ាងណាក្តី លោក សឺន រ៉េត បានឲ្យដឹងថា លោកពុំមានការយល់ទាស់អ្វី ចំពោះការតស៊ូតាមផ្លូវច្បាប់បែបអហិង្សារបស់ជនរួមជាតិខ្មែរក្រោមឡើយ ៖ «ឲ្យតែបងប្អូនធ្វើតាមច្បាប់អន្តរជាតិអី ខ្ញុំគាំទ្រក្នុងនាមខ្ញុំជាខ្មែរម្នាកដែរយើងទាមទារទៅ សាសន៍ជាតិដទៃទៀត ក៏គេទាមទារសិទ្ធិសេរីភាពជុំវិញពិភពលោកដែរ។ ដូចជាសមាគមនៅប្រទេសកម្ពុជានេះ មានហូរហែអ៊ីចឹងក៏លោកទាមទារសិទ្ធិសេរីភាពអី ហើយដែលរដ្ឋាភិបាល ក៏អនុញ្ញាតឲ្យធ្វើដែរ ខ្ញុំជឿថា មិនប៉ះពាល់ទេ»៕

បោះពុម្ព អ៊ីម៉េល