គណៈកម្មការអង្កេត បោសសម្អាត និងប្រឆាំងអំពើពុករលួយ បានកោះហៅរដ្ឋមន្ត្រីក្រសួងសុខាភិបាល បំភ្លឺទាក់ទងបញ្ហាជាច្រើនដែលបានកើតឡើងនៅក្នុងវិស័យសុខាភិបាល ហើយបង្កឲ្យប្រជាពលរដ្ឋជួបប្រទះ និងរងគ្រោះដោយសារភាពខ្វះចន្លោះក្នុងការគ្រប់គ្រងសេវាមួយនេះ។
ប្រធានគណៈកម្មការដែលមកពីគណបក្សសង្គ្រោះជាតិ អះអាងថា ជំនួបនេះ គឺដើម្បីរក្សានូវវប្បធម៌សន្ទនារវាងគណៈកម្មការ និងរដ្ឋាភិបាល ដោះស្រាយបញ្ហាក្នុងសង្គមជាតិ។
ប្រធានគណៈកម្មការទី១០ នៃរដ្ឋសភា ស្នើឲ្យរដ្ឋមន្ត្រីក្រសួងសុខាភិបាល ត្រួតពិនិត្យ និងគ្រប់គ្រងគ្លីនិកឯកជន ដែលកំពុងរីកដុះដាលជាច្រើនក្នុងប្រទេសកម្ពុជា ហើយខ្វះជំនាញក្នុងការផ្ដល់សេវាព្យាបាលជូនប្រជាពលរដ្ឋ។
លោក ហូរ វ៉ាន់ ប្រធានគណៈកម្មការអង្កេត បោសសម្អាត និងប្រឆាំងអំពើពុករលួយ មកពីគណបក្សសង្គ្រោះជាតិ ថ្លែងនៅមុខមន្ទីររដ្ឋសភា នៅថ្ងៃទី១០ មេសា ក្រោយជំនួបរវាងរដ្ឋមន្ត្រីក្រសួងសុខាភិបាល ថា ក្រសួងគួរពង្រឹង និងចាត់វិធានការគ្រប់គ្រងគ្លីនិកឯកជនដែលពុំមានជំនាញច្បាស់លាស់ ហើយបើកអាជីវកម្មព្យាបាលប្រជាពលរដ្ឋដោយពុំមានវិជ្ជាជីវៈ។ លោក ហូរ វ៉ាន់ ក៏ទាមទារឲ្យក្រសួងពិនិត្យមើលនៅតាមឱសថដ្ឋានជាច្រើន ដែលមានឱសថការីឈរឈ្មោះក្នុងអាជីវកម្មនោះ កំពុងមានភាពមិនប្រក្រតី ហើយចរាចរឱសថក្លែងក្លាយនៅលើទីផ្សារ ដែលត្រូវឲ្យមានច្បាប់ និងមានការត្រួតពិនិត្យចំពោះបញ្ហានេះ៖ «មានស្លាប់មនុស្ស ដោយសារតែគ្មានជំនាញគ្រប់គ្រាន់ក្នុងការព្យាបាល។ បញ្ហាមួយចំនួនដែលរដ្ឋមន្ត្រីបានឆ្លើយ យើងនៅមិនទាន់ទទួលយកបានទេ»។
សមាគមគ្រឹះស្ថានសេវាសុខាភិបាលឯកជនកម្ពុជា ឲ្យដឹងថា បច្ចុប្បន្នគ្លីនិកឯកជនមានប្រមាណ ៤ពាន់កន្លែង ក្នុងនោះមាន ១៥% ដែលបានបើកដំណើរការដោយខុសច្បាប់។
ពាក់ព័ន្ធជំនួបនេះ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ដែលបានចូលទៅឆ្លើយបំភ្លឺមានប្រសាសន៍ប្រាប់អ្នកកាសែតថា ក្រសួងនឹងធ្វើការកែលំអបញ្ហាដែលកើតមានឡើងនៅក្នុងវិស័យសេវាសុខាភិបាល។ លោកថ្លែងថា ក្រសួងនឹងទទួលនូវការផ្ដល់មតិ ដើម្បីលើកកម្ពស់ការផ្ដល់សេវាសុខាភិបាលបន្ថែមទៀត៖ «ជាការជួបជុំមួយដ៏មានសារសំខាន់»។
ក្នុងជំនួបរវាងគណៈកម្មការទី១០ នៃរដ្ឋសភា និងរដ្ឋមន្ត្រីក្រសួងសុខាភិបាល គណៈកម្មការនេះក៏បានលើកឡើងនូវបញ្ហាមួយចំនួនទៀតមានជាអាទិ៍ បញ្ហាអំពើពុករលួយទាក់ទងនឹងការបាត់ថវិកាពីជំនួយមូលនិធិសាកល គ្លូបប៊ល ហ្វាន់ (Global Fun) ដែលផ្ដល់ជូនមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ (ប៉ារ៉ាស៊ីតសាស្ត្រ បាណកសាស្ត្រ) ការគ្រប់គ្រងតម្លៃឱសថដែលពេទ្យរដ្ឋលក់ថ្លៃជាងតម្លៃលក់នៅទីផ្សារ។ គណៈកម្មការនេះ ក៏ស្នើឲ្យបញ្ឈប់ការដោះដូរលក់ទីតាំងអគារពេទ្យរបស់រដ្ឋ កុំឲ្យចាត់វិធានការ និងធ្វើបាប ឬដាក់ពិន័យការងារចំពោះបុគ្គលិករដ្ឋ ឬអ្នកដែលហ៊ានរាយការណ៍ពីបញ្ហាក្នុងក្រសួង បញ្ហាគ្រឿងឧបភោគបរិភោគ ដែលសម្បូរទៅដោយសារធាតុគីមី ហើយដាក់ពិន័យ និងដាក់ទោសទណ្ឌចំពោះជនដែលបានប្រព្រឹត្តដោយប្រើប្រាស់សារធាតុគីមីក្នុងចំណីអាហារ ដើម្បីសុខភាពប្រជាពលរដ្ឋ។
ទាក់ទងទៅដល់ការចំណាយក្នុងវិស័យសុខាភិបាលវិញ។ ចំណាយបានកើនឡើងពីមួយឆ្នាំទៅមួយឆ្នាំ។ រដ្ឋាភិបាលបានចំណាយថវិកាជាតិជាង ១លានដុល្លារក្នុងឆ្នាំ២០០៨។ ក្នុងឆ្នាំ២០១៥ ចំណាយក្នុងវិស័យនេះប្រមាណ ៣០០លានដុល្លារ និងគ្រោងចំណាយប្រមាណ ៥០០លានដុល្លារក្នុងឆ្នាំ២០១៨ ខាងមុខ។ ក្នុងឆ្នាំ២០១៥ នេះ កម្ពុជា ចំណាយប្រាក់ប្រមាណជិត ៦% បើធៀបនឹងផលិតផលក្នុងស្រុកសរុប (GDP)។ តួលេខនេះ នាំឲ្យចំណាយថវិកាក្នុងវិស័យសុខាភិបាលកម្ពុជា ឈរនៅលំដាប់ទី២ ក្នុងតំបន់អាស៊ាន តាមពីក្រោយវៀតណាម ដែលចាយថវិកាជាតិប្រមាណជិត ៧% នៃផលិតផលក្នុងស្រុកសរុប។ មានចម្ងល់ជាច្រើនពីឧបសគ្គក្នុងការដោះស្រាយបញ្ហាក្នុងវិស័យអាទិភាពមួយនេះ នៅពេលដែលថវិកាសម្រាប់ចំណាយមិនខ្វះបែបនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។