មន្ត្រីអង្គការយូនីសេហ្វ លោក ហ្វីលីព សេន (Philip Sen) ថ្លែងថា ក្នុងទិសដៅកាត់បន្ថយតួលេខកុមារស្លាប់ដោយសារជំងឺរាករូសនៅកម្ពុជា ឱ្យបានពាក់កណ្ដាល អង្គការយូនីសេហ្វ រួមនឹងអង្គការដៃគូមួយចំនួនទៀត នឹងចាប់ផ្ដើមយុទ្ធនាការលាងសម្អាតដៃនៅប្រទេសកម្ពុជា នៅថ្ងៃទី២១ តុលា ឆ្នាំ២០១៣ ដើម្បីបញ្ចៀសជំងឺរាករូស និងជំងឺផ្លូវដង្ហើមលើកុមារ។
លោក ហ្វីលីព សេន បញ្ជាក់ទៀតថា ទិវាលាងសម្អាតដៃនេះ គឺជាយុទ្ធនាការលើកកម្ពស់អនាម័យផ្ទាល់ខ្លួនមួយ នៅទូទាំងប្រទេស ក្រោមពាក្យស្លោកថា "ខ្ញុំឆ្លាត ខ្ញុំលាងដៃនឹងសាប៊ូ" ដើម្បីឱ្យប្រជាពលរដ្ឋមានទម្លាប់ធ្វើបែបនេះ ជាពិសេស ផ្ដោតទិសដៅដល់ពលរដ្ឋនៅតាមជនបទ៖ «ការលាងដៃជាមួយសាប៊ូ គឺជាវិធីងាយស្រួលបំផុត និងមានប្រសិទ្ធភាពខ្ពស់ ដែលយើងអាចធ្វើបាន ក្នុងការបង្ការជំងឺរាករូសចំពោះកុមារ។ ជាញឹកញាប់ មនុស្សនៅតាមជនបទដាច់ស្រយាល នៅតែមិនបានយល់ដឹងអំពីសារប្រយោជន៍ពីការលាងដៃនឹងសាប៊ូទេ ហើយក៏ពួកគាត់ខ្លះ មិនមានទឹកស្អាត។ នេះហើយជាគោលបំណងដែលយើងយុទ្ធនាការ»។
លោកបន្តថា យុទ្ធនាការនេះ នឹងធ្វើតាមរយៈកម្មវិធីខ្លីៗ ចាក់ផ្សាយតាមទូរទស្សន៍ វិទ្យុ និងប្រព័ន្ធព័ត៌មានសង្គម ដោយសហការជាមួយដៃគូ ដូចជា អង្គការមិនមែនរដ្ឋាភិបាល ESC-BORDA និង មេឌា វ័ន (Media One) ទីភ្នាក់ងារអភិវឌ្ឍន៍នៃប្រទេសអាល្លឺម៉ង់ (GIZ) អង្គការយូនីសេហ្វ និងរាជរដ្ឋាភិបាលម្ពុជា។
មន្ត្រីនាយកដ្ឋានផ្នែកប្រយុទ្ធនឹងជំងឺឆ្លងនៃក្រសួងសុខាភិបាល លោកវេជ្ជបណ្ឌិត លី សូវ៉ាន់ មានប្រសាសន៍ថា យុទ្ធនាការនេះ ជាសកម្មភាពនៅក្នុងទិវាអនាម័យពិភពលោក ដែលក្រសួងបានប្រារព្ធធ្វើកាលពីខែឧសភា។ លោកមានប្រសាសន៍ណែនាំថា ការលាងដៃជាការចាំបាច់ អាចកាត់បន្ថយជំងឺជាច្រើន ហើយលាងត្រូវលាងដៃឱ្យបានញឹកញាប់ជាមួយសាប៊ូ ឬអាល់កុល ឬចាហួយលាងដៃ ព្រោះដៃប៉ះពាល់គ្រប់វត្ថុទាំងអស់ រួមទាំងផ្នែកផ្សេងនៃរាងកាយយើងផង។
លោក លី សូវ៉ាន់៖ «បច្ចុប្បន្នដោយសារមានការលិចទឹកហ្នឹង ដូច្នេះមានការអណ្ដែតមេរោគតាមទឹក តាមទីសាធារណៈនានាហ្នឹង ការលាងដៃ គឺចាំបាច់ហើយ ហើយការលាងដៃ កាត់បន្ថយជំងឺរាគបានច្រើន ហើយបច្ចុប្បន្ន ក៏មានផ្ទុះនូវភ្នែកក្រហម។ ដូច្នេះ លាងដៃនឹងសាប៊ូឱ្យញឹកញាប់ ជំងឺមិនអាចឆ្លងមកយើងទេ។ ដូច្នេះ ការលាងដៃសាប៊ូ និងទឹកហ្នឹងកាត់បន្ថយមេរោគមកភ្នែករបស់យើង មកខ្លួនយើង។ ជាពិសេស គឺការប្រើប្រាស់សម្ភារៈរួមគ្នា ធ្វើម៉េចអ្នកដែលឈឺនោះនៅដាច់ កុំឱ្យប្រើប្រាស់រួមគ្នាសិន ហើយនៅឆ្ងាយពីគេមួយរយៈ»។
ក្នុងសេចក្ដីប្រកាសរបស់អង្គការយូនីសេហ្វ បានសរសេរថា ជំងឺរាករូស ជាមូលហេតុចម្បងទី២ ដែលធ្វើឱ្យកុមារទូទាំងពិភពលោក ចំនួន ៦សែននាក់ ស្លាប់ជារៀងរាល់ឆ្នាំ។
លោក ហ្វីលីព សេន មានប្រសាសន៍ថា នៅក្នុងយុទ្ធនាការលាងសម្អាតដៃនេះ នឹងចាប់ផ្ដើមពីថ្ងៃទី២១ តុលា រហូតដល់ចុងខែវិច្ឆិកា ឆ្នាំ២០១៣ ដើម្បីឱ្យពលរដ្ឋយល់ដឹងអំពីសារប្រយោជន៍នៃការលាងសម្អាតដៃ ជាពិសេសមុនពេលទទួលទានអាហារ និងក្រោយចេញពីបង្គន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។