ប្រជាពលរដ្ឋនៅឃុំ២ធ្នូ ស្រុកស្នួល ខេត្តក្រចេះ ជាច្រើននាក់ បានលើកគ្នាទៅមុខសិប្បកម្មស្លអាគុយចាស់ៗមួយកន្លែង នៅក្នុងភូមិរបស់ពួកគាត់ ដើម្បីសុំឱ្យម្ចាស់សិប្បកម្មនោះបញ្ឈប់ដំណើរការបន្តទៀត។ ការតវ៉ានេះ បន្ទាប់ពីប្រជាពលរដ្ឋនៅក្នុងភូមិទទួលរងផលប៉ះពាល់យ៉ាងខ្លាំង ដោយចំហេះជាតិអាស៊ីតចេញពីរោងសិប្បកម្មនោះ។
បន្ទាប់ពីរងផលប៉ះពាល់ដល់ប្រជាពលរដ្ឋនៅក្នុងភូមិ ដែលបណ្ដាលឱ្យមានជំងឺជាហូរហែនោះ ធ្វើឱ្យប្រជាពលរដ្ឋសម្រេចនាំគ្នាទៅឃាត់ដំណើរការស្លអាគុយចាស់ៗជាថ្មីម្តងទៀត ដោយមិនឱ្យសិប្បកម្មនោះបន្តដំណើរការទៀតឡើយ ប្រសិនណាមិនកែច្នៃដើម្បីកុំឱ្យមានផលប៉ះពាល់ដល់ប្រជាពលរដ្ឋនោះទេ។
ប្រជាពលរដ្ឋម្នាក់រស់នៅភូមិឃ្លេ ឃុំ២ធ្នូ ស្រុកស្នួល ខេត្តក្រចេះ លោក ហិន ផល ឱ្យដឹងថា សកម្មភាពធ្វើអាជីវកម្មសិប្បកម្មស្លអាគុយចាស់ៗ ដើម្បីយកជាតិសំណនៅក្នុងភូមិរបស់លោកពីសំណាក់សិប្បកម្មមួយឈ្មោះថា ស្រ៊ុន យូ បានបង្កផលប៉ះពាល់ដល់សុខភាពរបស់ប្រជាពលរដ្ឋជាខ្លាំង។
លោកបន្តថា ចំហេះដែលចេញពីរោងចក្រសិប្បកម្មនោះ អាចធ្វើឱ្យប្រជាពលរដ្ឋទាំងចាស់ទាំងក្មេងនៅទីនោះ មានបញ្ហាផ្លូវដង្ហើម ក្អក ឈឺក្បាលវិលមុខ ជាដើម។ ក្រៅពីមនុស្ស ចំហេះជាតិអាស៊ីតនោះក៏ធ្វើឱ្យរុក្ខជាតិ និងផលដំណាំនៅក្នុងឃុំ ដែលមានចំនួនបីភូមិ រងផលប៉ះពាល់ដែរ៖ «បាទ! ឱ្យផ្អាកដំណើរការបាទ! ព្រោះធ្វើម៉េចក៏នៅតែប៉ះពាល់ដែរ តែដោយមានឃុំគាត់សម្របសម្រួលហើយទៅម្តងទៀតទៅ។ តែខ្ញុំនៅជឿថា ធ្វើមិនកើតទេក្លិនៗនៅតែក្លិនអ៊ីចឹង មិនអាចបាត់ធុំបានទេ។ ធុំក្លិនជាតិអាស៊ីត វាធ្វើឱ្យយើងថប់ហ្មង ហើយម៉ាភ្លេចហ្នឹងធ្វើឱ្យឈឺក្បាលភ្លាម។ បើនៅតែស្របក្លិនហ្នឹង តែបីនាទីហ្នឹង គឺដឹងតែឈឺក្បាលថប់ដង្ហើមហ្មង»។
ប្រភពដដែលបន្ថែមថា កាលពីថ្ងៃទី៣ មិថុនា ប្រជាពលរដ្ឋនៅក្នុងភូមិបានលើកគ្នាទៅមុខសិប្បកម្ម ដើម្បីឱ្យបង្អាក់ដំណើរការស្លអាគុយនោះសិន ហើយនៅថ្ងៃព្រឹកថ្ងៃទី៤ មិថុនា មានការប្រជុំគ្នារវាងតំណាងប្រជាពលរដ្ឋ ខាងម្ចាស់សិប្បកម្មនៅសាលាឃុំ ដើម្បីឱ្យម្ចាស់សិប្បកម្មធ្វើកិច្ចសន្យាផ្អាកដំណើរការ លុះណាមានការកែច្នៃជាមុនសិន ដើម្បីកុំឱ្យប៉ះពាល់ដល់សុខភាព ទើបអនុញ្ញាតឱ្យម្ចាស់សិប្បកម្មនោះអាចដំណើរការឡើងវិញ។ លោកបញ្ជាក់ថា សកម្មភាពស្លអាគុយចាស់ៗដែលភាគច្រើន គឺអ្នកជំនាញមកពីវៀតណាម មកធ្វើនោះ គឺមានជាង ២ឆ្នាំមកហើយ ហើយប្រជាពលរដ្ឋបានជំទាស់ដំណើរការជាច្រើនលើកជាច្រើនសា ប៉ុន្តែកន្លែងសិប្បកម្មនោះនៅតែអាចធ្វើបានដដែល។
ម្ចាស់សិប្បកម្មអាគុយចាស់ៗ ស្រ៊ុន យូ គឺលោក ស្រ៊ុន យូ បញ្ជាក់ថា ការធ្វើនោះពិតជាមានផលប៉ះពាល់ដល់ប្រជាពលរដ្ឋនៅទីនោះខ្លះមែន។ លោកបន្តថា នៅព្រឹកថ្ងៃទី៤ មិថុនា លោកក៏បានធ្វើកិច្ចសន្យានៅសាលាឃុំ២ធ្នូ ថានឹងផ្អាកបណ្ដោះអាសន្នសិន ហើយខាងលោកនឹងធ្វើការកែច្នៃចំហេះដែលចេញពីសិប្បកម្មនោះ មិនឱ្យមានផលប៉ះពាល់ដល់ប្រជាពលរដ្ឋទៀតឡើយ។ ប្រសិនបើការកែច្នៃហើយនៅតែប៉ះពាល់ទៀតនោះ ខាងលោកនឹងបញ្ឈប់ដំណើរការតែម្តង៖ «បើធុំអ្នកជិតខាងផ្អាកសិន អត់ដុតទេ។ បាទ! អ៊ីចឹងធ្វើកិច្ចសន្យាពីព្រឹកហើយ និយាយគ្នាពីព្រឹកនៅឃុំយើងហើយ»។
លោកបញ្ជាក់ថា នៅប្រទេសវៀតណាម គេមិនអនុញ្ញាតឲ្យធ្វើអាជីវកម្មអាគុយចាស់ៗនោះទេ ហើយម្យ៉ាងនៅប្រទេសវៀតណាម គេមិនសូវមានអ្នកប្រើប្រាស់អាគុយដូចនៅកម្ពុជា នោះឡើយ។
អភិបាលស្រុកស្នួល លោក គង់ គឹមនី មានប្រសាសន៍ថា បញ្ហានេះជាជំហានដំបូង អាជ្ញាធរឲ្យសិប្បកម្មស្លអាគុយនោះផ្អាកដំណើរការជាបណ្ដោះអាសន្នសិន ហើយអាជ្ញាធរក៏បានចុះពិនិត្យពីច្បាប់អនុញ្ញាតក្នុងពេលដំណើរការកន្លងមក និងពីបញ្ហាទីតាំងផលិត ឃើញថា សិប្បកម្មស្លអាគុយនោះពិតជាបង្កប៉ះពាល់ដល់ប្រជាពលរដ្ឋយ៉ាងពិតប្រាកដ ពីព្រោះចំហេះនោះមានជាតិវិទ្យុសកម្ម និងសារធាតុគីមីទៀតផង។ លោកបញ្ជាក់ថា នឹងមានការស្រាវជ្រាវពីសំណាក់មន្ត្រីជំនាញជុំវិញបញ្ហានេះបន្តទៀត ហើយអាជ្ញាធរនឹងអាចបញ្ឈប់ដំណើរការតែម្តង ដោយឱ្យម្ចាស់សិប្បកម្មទៅរកកន្លែងណាដែលមិនបង្កផលប៉ះពាល់ដល់មនុស្ស និងបរិស្ថាន ពីព្រោះអាជ្ញាធរមានភារកិច្ចគិតគូរពីសុខភាពរបស់ប្រជាពលរដ្ឋជាធំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។