ក្រុមគ្រូពេទ្យបានបង្កើតពាក្យស្លោកថា ផ្ដល់ឈាម គឺសង្គ្រោះជីវិតមនុស្ស ឬថា ជួយសង្គ្រោះជីវិត គឺជាវីរជនបរិច្ចាគឈាម ជាដើម។
ក្រុមគ្រូពេទ្យជំនាញខាងសង្គ្រោះបន្ទាន់បានពោលថា ឈាមមានតម្លៃស្មើជីវិត។ មនុស្សអាចរស់បាន បើគ្មានប្រាក់ចាយ តែមនុស្សនឹងស្លាប់ បើខ្វះឈាមសង្គ្រោះបន្ទាន់ បើទោះជាអ្នកនោះមានបុណ្យស័ក្ដិខ្ពង់ខ្ពស់ មាសប្រាក់ហូរហៀរយ៉ាងណាក៏ដោយ។
នៅបន្ទប់ទទួលភ្ញៀវនៃមជ្ឈមណ្ឌលជាតិផ្ដល់ឈាម ស្ថិតក្នុងបរិវេណមន្ទីរពេទ្យព្រះអង្គឌួង ក្នុងរាជធានីភ្នំពេញ គេឃើញមានមនុស្សអង្គុយរង់ចាំទទួលឈាមយកទៅជួយសង្គ្រោះជីវិតមនុស្សយ៉ាងអន្ទះសា។ ខណៈអ្នកខ្លះទៀតមកទីនេះ ឲ្យគ្រូពេទ្យបូមឈាមយកទៅសង្គ្រោះជីវិតក្រុមគ្រួសារសាច់ញាតិរបស់ខ្លួន ដែលកំពុងត្រូវការឈាមសង្គ្រោះបន្ទាន់នៅតាមមន្ទីរពេទ្យនានា។
ឧទាហរណ៍ អ្នកស្រី កែវ គន្ធា អាយុ ៤២ឆ្នាំ មានម្ដាយឈឺធ្លាក់ឈាមធ្ងន់ធ្ងរ មកសុំឈាមនៅមជ្ឈមណ្ឌលជាតិផ្ដល់ឈាម ដើម្បីសង្គ្រោះជីវិតម្ដាយបន្ទាន់ ដែលកំពុងសម្រាកព្យាបាលនៅមន្ទីរពេទ្យព្រះកេតុមាលា។
ពេលកំពុងអង្គុយរង់ចាំអំណោយឈាមយ៉ាងអន្ទះសា អ្នកស្រីពោលទាំងរំជួលចិត្តថា នៅពេលដែលអ្នកស្រីមានអាសន្នអន់ក្រដូច្នេះ ទើបអ្នកស្រីដឹងថា ការផ្ដល់អំណោយឈាមជួយជីវិតជនរងគ្រោះមានតម្លៃធំធេងប៉ុនណា៖ «ឈាមពិបាករកណាស់ បើក្រៅពីក្រុមគ្រួសារមិនអាចនរណាមានចិត្តធម៌សប្បុរសជូនយើងបានទេ។ ខ្ញុំមិននឹកស្មានថា ម្ដាយខ្ញុំបានរស់ទេ។ មួយៗអស់សង្ឃឹមហើយ ឥឡូវខ្ញុំមានសង្ឃឹមវិញហើយ។ ប៉ុន្តែមិនដឹងថ្ងៃមុខយ៉ាងម៉េចទេ បើក្រុមគ្រួសារហ្នឹងនាំគ្នាផ្ដល់ឈាមចង់គ្រប់គ្នាហើយ»។
ដោយសារមជ្ឈមណ្ឌលមិនមានឈាមគ្រប់គ្រាន់សម្រាប់ផ្ដល់ជូនសាធារណជន អ្នកស្រីបានទទួលឈាមពីរប្លោកប៉ុណ្ណោះក្នុងចំណោម ៥ប្លោក ដែលអ្នកស្រីត្រូវការចាំបាច់។ ដូច្នេះ អ្នកស្រីត្រូវប្រមូលបងប្អូនឲ្យមកផ្ដល់ឈាមបន្ថែម។
មជ្ឈមណ្ឌលជាតិផ្ដល់ឈាម មានតួនាទីផ្ដល់ឈាមទៅតាមមន្ទីរពេទ្យនានា។ ក៏ប៉ុន្តែ ក្រុមគ្រូពេទ្យឲ្យដឹងថា រដូវកាលនេះ មិនសូវមានអ្នកស្ម័គ្រចិត្តផ្ដល់ឈាមទេ ដោយយុវជន និងសិស្សានុសិស្សដែលជាប្រភពអ្នកផ្គត់ផ្គង់ឈាមដល់ធនាគារឈាមច្រើនជាងគេនោះ បានវិស្សមកាល។
ប្រធានមជ្ឈមណ្ឌលជាតិផ្ដល់ឈាម លោកវេជ្ជបណ្ឌិត ហុក គឹមចេង បានត្អូញត្អែរថា រដូវវស្សាឆ្នាំនេះ មន្ទីរពេទ្យទាំងអស់ ទាំងនៅភ្នំពេញ កំពុងខ្វះឈាម ហើយបានអំពាវនាវដល់សប្បុរសជនទាំងអស់មេត្តាមកផ្ដល់ឈាម៖ «ខ្ញុំឆ្លៀតឱកាសដ៏មានតម្លៃនេះ គឺសុំអំពាវនាវដល់ប្រជាជនយើងទាំងអស់ អញ្ជើញមកធ្វើការបរិច្ចាគឈាមនៅមជ្ឈមណ្ឌលជាតិផ្ដល់ឈាម ដែលមានទីតាំងនៅក្នុងមន្ទីរពេទ្យព្រះអង្គឌួង និងបងប្អូនប្រជាជនយើងទាំងអស់ ដែលនៅតាមទីរួមខេត្តផ្សេងៗ អាចចូលរួមបរិច្ចាគឈាមនៅមណ្ឌលផ្ដល់ឈាមនៅក្នុងមន្ទីរពេទ្យនៅគ្រប់ខេត្តក្រុងទាំងអស់ លើកលែងតែខេត្តកណ្ដាល។ ហើយការផ្ដល់ឈាមនៅពេលនេះ នៅក្នុងរដូវកាលនេះ គឺរដូវកាលមានវិស្សមកាលនេះ ចាំបាច់ គឺដោយសារស្ដុកឈាមនៅមជ្ឈមណ្ឌលជាតិផ្ដល់ឈាម ក៏ដូចនៅតាមខេត្តហ្នឹង គឺមានការថយចុះ។ ដូច្នេះ ការផ្ដល់ឈាមនៅពេលនេះ គឺពិតជាអាចជួយដល់ជនរងគ្រោះ»។
លោកវេជ្ជបណ្ឌិតបន្តថា អ្នកជំងឺដែលត្រូវការឈាម មានដូចជា អ្នករងរបួសដោយគ្រោះថ្នាក់ចរាចរណ៍ កុមារកើតជំងឺគ្រុនឈាម អ្នកជំងឺក្អកធ្លាក់ឈាម និងជំងឺផ្សេងទៀត ដែលត្រូវការលាងឈាមជាញឹកញាប់ ហើយត្រូវការប្ដូរឈាមថ្មីជាដើម។
របាយការណ៍របស់មជ្ឈមណ្ឌលជាតិផ្ដល់ឈាមបង្ហាញថា បច្ចុប្បន្នមជ្ឈមណ្ឌលជាតិត្រូវការអំណោយឈាមប្រហែល ២.៥០០ផ្លោក ដើម្បីបំពេញតម្រូវការប្រចាំខែ។ ហើយគិតមកដល់ខែកក្កដា ឆ្នាំ២០១៣ មជ្ឈមណ្ឌលជាតិផ្ដល់ឈាម បានទទួលអំណោយឈាមពីសប្បុរសជនស្ម័គ្រចិត្តប្រហែល ៤៣% ប៉ុណ្ណោះ។ ក្រៅពីនេះ អំណោយឈាមបានមកពីក្រុមគ្រួសារជនរងគ្រោះផ្ទាល់ ដែលផ្ដល់ឲ្យតែក្រុមគ្រួសារសាច់ញាតិរបស់ខ្លួន។
ដោយសារមិនសូវមានអ្នកផ្ដល់ឈាមនៅមជ្ឈមណ្ឌលជាតិផ្ដល់ឈាមនៅភ្នំពេញ មជ្ឈមណ្ឌលជាតិផ្ដល់ឈាមបានប្រឹងប្រែងផ្សព្វផ្សាយ និងដើរប្រមូលឈាមចល័តនៅតាមមូលដ្ឋាននានា។ ក្នុងនោះ មជ្ឈមណ្ឌលជាតិផ្ដល់ឈាមបានសហការជាមួយសហភាពសហសម្ព័ន្ធយុវជនខេត្តកណ្ដាល និងព្រះសង្ឃតាមវត្តអារាម នៅខេត្តកណ្ដាល ដើម្បីទទួលឈាមពីក្រុមយុវជន និងព្រះសង្ឃនៅខេត្តនេះជាប្រចាំ។
ជាក់ស្ដែង ដូចជានៅខែកញ្ញា នេះ មានយុវជនខេត្ត និងព្រះសង្ឃនៅវត្តក្រពើហា ក្រុងតាខ្មៅ បានស្ម័គ្រចិត្តផ្ដល់ឈាម។ ទាំងព្រះសង្ឃ ទាំងយុវជនយល់ថា អំណោយឈាមដែលពួកគាត់បានបរិច្ចាគនោះ អាចជួយសង្គ្រោះជីវិតបាន។
យុវជន លី ចេង ដែលបានស្ម័គ្រចិត្តផ្ដល់ឈាមនៅវត្តក្រពើហា ខេត្តកណ្ដាល មានមោទនភាពណាស់នៅពេលខ្លួនបានផ្ដល់ឈាមជួយសង្គ្រោះជីវិតមនុស្ស។
ទោះយ៉ាងណា គេសង្កេតឃើញថា នៅមានអ្នកស្ម័គ្រចិត្តផ្ដល់ឈាមមានតិចនៅឡើយ។ លោកស្រី មីសែល មិលិតធី (Michelle Milete) មន្ត្រីទំនាក់ទំនងសាធារណៈនៃមជ្ឈមណ្ឌលជាតិផ្ដល់ឈាមកម្ពុជា បញ្ជាក់ថា ចំនួនអ្នកផ្ដល់ឈាមនៅកម្ពុជា នៅមានចំនួនតិចបំផុត ដោយសារប្រជាពលរដ្ឋខ្មែរភាគច្រើនយល់ថា ការផ្ដល់ឈាមអាចធ្វើឲ្យប៉ះពាល់ដល់សុខភាពរបស់ពួកគាត់៖ «គេមិនយល់! គេយល់ថាការផ្ដល់ឈាម គឺគ្រោះថ្នាក់ដល់សុខភាពរបស់គេ ប្រហែលអាចធ្វើឲ្យគេឈឺ ឬឆ្លងរោគ តែការពិត នេះមិនពិតទេ។ យើងគ្រាន់តែយកឈាមមួយផ្នែកពីក្នុងខ្លួនតែប៉ុណ្ណោះ ហើយមិនប៉ះពាល់សុខភាពរបស់គេទេ។ ហើយយើងបានពិនិត្យសុខភាពមុនទទួលអំណោយឈាម ធ្វើដូច្នេះ ដើម្បីធានាថាអ្នកផ្ដល់អំណោយឈាម គឺមានសុខភាពល្អគ្រប់គ្រាន់ ដើម្បីផ្ដល់ឈាម»។
មជ្ឈមណ្ឌលជាតិផ្ដល់ឈាម មានផែនការបង្កើនការប្រមូលឈាមស្ដុកទុកក្នុងធនាគារឈាមឲ្យបាន ១០០% ក្នុងឆ្នាំ២០២០។ នៅពេលមជ្ឈមណ្ឌលជាតិផ្ដល់ឈាមបានទទួលអំណោយឈាមពីសប្បុរសជនស្ម័គ្រចិត្តបាន ១០០% ហើយ ពេលនោះក្រុមគ្រួសារសាច់ញាតិរបស់អ្នកជំងឺ សាច់ញាតិរបស់អ្នករងរបួសដែលត្រូវការឈាមសង្គ្រោះបន្ទាន់នោះ នឹងមិនតម្រូវឲ្យមកផ្ដល់ឈាមដល់អ្នកជំងឺ និងអ្នករងរបួសទៀតទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។