ក្នុងសេចក្តីថ្លែងការណ៍រួមរបស់ក្រសួងសុខាភិបាល និងអង្គការសុខភាពពិភពលោក កាលពីថ្ងៃសុក្រ ម្សិលមិញ បានបញ្ជាក់ថា កុមារានោះពិតជាកើតជំងឺផ្ដាសាយបក្សីនេះមែន ហើយថានេះជាករណីលើកទី២៤ ហើយ ក្នុងឆ្នាំ២០១៣ នេះ ដែលក្នុងនោះ គឺមានអ្នកជំងឺ ១២នាក់ បានរស់រានជីវិត និង ១២នាក់ទៀតបានស្លាប់។
សេចក្តីថ្លែងការណ៍ដដែលបន្តថា ក្រុមគ្រូពេទ្យបានចុះស៊ើបអង្កេតនៅក្នុងភូមិដែលកុមារារស់នៅ បានរកឃើញថា មួយខែមុនពេលកុមារានោះធ្លាក់ខ្លួនឈឺ នាងបានប៉ះដោយផ្ទាល់ជាមួយសត្វមាន់ដែលឈឺងាប់ភ្លាមៗប្រមាណជា ៣០ក្បាល ដើម្បីជួយជញ្ជូនយកទៅឲ្យបងប្រុសរៀបចំធ្វើម្ហូបអាហារសត្វមាន់ដែលស្លាប់ទាំងនោះ។
អង្គការសុខភាពពិភពលោក បានគូសបញ្ជាក់ថា ជំងឺគ្រុនផ្ដាសាយបក្សី ជាធម្មតាគឺឆ្លងពីសត្វបក្សីទៅសត្វបក្សី ប៉ុន្តែពេលខ្លះក៏បានឆ្លងទៅមនុស្សផងដែរ ប្រសិនបើប៉ះពាល់ដោយផ្ទាល់ជាមួយសត្វបក្សីដែលឈឺ។ ក្រសួងសុខាភិបាល សូមអំពាវនាវដល់មាតាបិតា និងអាណាព្យាបាល កុំឲ្យកុមារប៉ះពាល់ដោយផ្ទាល់ជាមួយសត្វមាន់ទាដែលឈឺ ឬងាប់ ហើយត្រូវបង្គាប់ឲ្យកុមារលាងដៃនឹងសាប៊ូជាបន្ទាន់ ប្រសិនបើឱប ឬប៉ះសត្វឈឺងាប់ទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។