ក្នុងទិសដៅលើកកម្ពស់សុខភាព រដ្ឋាភិបាលកម្ពុជា នឹងដំឡើងពន្ធលើថ្នាំជក់ នៅដើមខែកក្កដា ខាងមុខនេះ។
នៅក្នុងសន្និសីទសារព័ត៌មាន នៅថ្ងៃទី៤ មិថុនា តំណាងអង្គការសុខភាពពិភពលោក វេជ្ជបណ្ឌិត យ៉ិល ដារាវុធ សាទរចំពោះរាជរដ្ឋាភិបាលកម្ពុជា ដែលនឹងអនុវត្តការដំឡើងពន្ធលើថ្នាំជក់ នៅថ្ងៃទី១ ខែកក្កដា ខាងមុខនេះ៖ «គោលការណ៍នៃការដំឡើងពន្ធ គឺឡើងតែអាករពិសេសទេ ព្រោះអាករពិសេស គេឡើងទៅលើផលិតផលដែលធ្វើឱ្យប៉ះពាល់សុខភាព ដូចជា ថ្នាំជក់ និងគ្រឿងស្រវឹង ហើយអាករពិសេសរបស់យើងបច្ចុប្បន្ន ១០% ហើយរាជរដ្ឋាភិបាលយើងចេញអនុក្រឹត្យនឹងដំឡើងពី ១០% ទៅ ១៥% នៅខែ៧ ខាងមុខនេះ។ ខែ៧ ខាងមុខនេះចូលជាធរមានហើយ អនុវត្តហើយ។ អ៊ីចឹងគឺថា អនុក្រឹត្យយើងយើងមានហើយ។ អ៊ីចឹងបើយើងគណនាអាករពិសេសពី ១០% ទៅ ១៥% ហ្នឹង ហើយបើយើងគណនាទាំង VAT ទៅតាមការគណនារបស់ពន្ធដារថា តម្លៃលក់រាយរបស់យើងឡើងពី ២៨ ទៅ ៣០% នៃការលក់រាយ។ ប៉ុន្តែពន្ធយើងមិនទាន់បានប្រមូលទេ គឺដំឡើងនៅខែ៧ ខែក្រោយ។ អ៊ីចឹងមានន័យថា រាជរដ្ឋាភិបាលមានអនុក្រឹត្យដំឡើងពន្ធហើយ»។
លោកវេជ្ជបណ្ឌិត យ៉ិល ដារាវុធ មានប្រសាសន៍ថា មធ្យោបាយមានប្រសិទ្ធភាពក្នុងការកាត់បន្ថយតួលេខស្លាប់របស់អ្នកប្រើប្រាស់ គឺការដំឡើងពន្ធថ្នាំជក់។
តារាងប្រៀបធៀបតម្លៃពន្ធពីថ្នាំជក់ ដែលត្រូវបានបង្ហាញនៅក្នុងសន្និសីទសារព័ត៌មាន នៅថ្ងៃទី៤ មិថុនា បង្ហាញថា ការយកពន្ធលើថ្នាំជក់នៅប្រទេសកម្ពុជា នៅតែមានកម្រិតទាបជាងគេ ក្នុងតំបន់អាស៊ាន គឺត្រឹមកម្រិត ២០%។ តាមអនុសាសន៍របស់ធនាគារពិភពលោក និងអង្គការសុខភាពពិភពលោក តម្រូវថា ការដំឡើងពន្ធថ្នាំជក់គប្បីក្នុងចន្លោះពី ៦៨% ទៅ ៨០%៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។