នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល ណែនាំដល់ពលរដ្ឋឲ្យប្រុងប្រយ័ត្នចំពោះផ្លូវដង្ហើម ជាពិសេសជំងឺផ្ដាសាយបក្សី H5N1 នៅក្នុងអំឡុងពេលអាកាសធាតុត្រជាក់។ ជំងឺផ្ដាសាយបក្សី H5N1 ច្រើនកើតមានពីខែនេះទៅ។
ការណែនាំរបស់នាយកដ្ឋានប្រយុទ្ធនឹងជំងឺឆ្លង គឺបន្ទាប់ពីក្រសួងធនធានទឹក និងឧតុនិយម ប្រកាសឲ្យដឹងអំពីស្ថានភាពអាកាសធាតុនៅតំបន់ភ្នំ និងតំបន់ខ្ពង់រាបភាគខាងជើង និងឦសានកម្ពុជា នឹងចុះត្រជាក់ចាប់ពីថ្ងៃទី២ ដល់ថ្ងៃទី៥ ធ្នូ។
ប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល លោកវេជ្ជបណ្ឌិត លី សូវ៉ាន់ ថ្លែងថា ក្រៅពីជំងឺអេបូឡា (Ebola) និងជំងឺផ្លូវដង្ហើមផ្សេងៗទៀត ជំងឺផ្ដាសាយបក្សីក៏ជាជំងឺដែលត្រូវប្រុងប្រយ័ត្នខ្ពស់ ពីព្រោះវាច្រើនផ្ទុះឡើងក្នុងរដូវនេះ៖ «បញ្ហាសុខភាពរបស់ប្រជាពលរដ្ឋយើងនៅតែប្រឈម ហើយដូចអស់លោកលោកស្រីជ្រាបហើយថា រដូវរងាមកដល់ហើយ ហើយធម្មតាជំងឺនេះតែងតែមានផ្ទុះឡើងរៀងរាល់ខែរងាហ្នឹង ជាពិសេស គឺខែធ្នូ រហូតដល់ខែមេសា ពីព្រោះវាជារយៈពេលដែលរងាផង ស្ងួតផង ហើយប្រជាពលរដ្ឋយើងមានពិធីបុណ្យច្រើន ហើយធ្វើឲ្យមានការចល័តមាន់ទាក៏ច្រើនដែរ។ ដូច្នេះ យើងអាចប្រឈមបញ្ហាសុខភាពទាក់ទងជំងឺផ្ដាសាយបក្សី»។
លោកវេជ្ជបណ្ឌិតមានប្រសាសន៍ថា ការប្រុងប្រយ័ត្ននេះក៏ព្រោះតែក្រសួងកសិកម្ម មិនទាន់ចេញសេចក្តីប្រកាសបញ្ជាក់ណាមួយបញ្ជាក់ថា ប្រទេសកម្ពុជា ជាប្រទេសរួចផុតពីជំងឺផ្ដាសាយបក្សី H5N1 នៅឡើយ។ លោកវេជ្ជបណ្ឌិតឲ្យដឹងដែរថា សព្វថ្ងៃនេះ ក្រសួងសុខាភិបាល បានរៀបចំឲ្យមានប្រព័ន្ធត្រួតពិនិត្យជំងឺឆ្លងថ្មីមួយចំនួន ដូចជា ជំងឺអេបូឡា ជំងឺផ្លូវដង្ហើមមជ្ឈិមបូព៌ា ជំងឺផ្ដាសាយ H7N9 និងជំងឺផ្ដាសាយ H5N1 ជាដើម។ កន្លែងត្រួតពិនិត្យសំខាន់ គឺនៅច្រកទ្វារអន្តរជាតិបួន គឺអាកាសយានដ្ឋានភ្នំពេញ សៀមរាប និងច្រកទ្វារប៉ោយប៉ែត និងបាវិត។
លោកវេជ្ជបណ្ឌិត លី សូវ៉ាន់ មានប្រសាសន៍ថា ដើម្បីបង្ការជំងឺនានាដែលបណ្ដាលមកពីអាកាសធាតុត្រជាក់ នាយកដ្ឋានប្រយុទ្ធនឹងជំងឺឆ្លង នឹងបន្តតាមដានស្ថានភាពជំងឺទាំងនោះ ជាពិសេសជំងឺផ្ដាសាយ H5N1៖ «នៅតែតាមដានបន្ត។ ទាក់ទងនឹងជំងឺផ្ដាសាយបក្សីហ្នឹង យើងមានរាយការណ៍ ហ៊តឡាញ (Hotline) ជាប្រចាំ ហើយនិងយើងមានប្រព័ន្ធតាមដានជំងឺផ្ដាសាយ។ យើងមានប្រព័ន្ធតាមដានឃ្លាំមើលនៅតាមមន្ទីរពេទ្យមួយចំនួន ដើម្បីតាមដាននូវមេរោគហ្នឹង និងប្រព័ន្ធមួយទៀត ហៅថា ប្រព័ន្ធរលាកសួត។ ដូច្នេះមានន័យថា យើងមានប្រព័ន្ធទាំងពីរ ប្រព័ន្ធទាំងអ្នកជំងឺផ្ដាសាយ និងប្រព័ន្ធអ្នកជំងឺដែលផ្ដាសាយ ហើយវិវឌ្ឍទៅរករលាកសួតធ្ងន់ធ្ងរ ក៏យើងមានប្រព័ន្ធហ្នឹងតាមដាន។ បើសិនឃើញមានជំងឺផ្ដាសាយបក្សី ឬស្រដៀងជំងឺផ្ដាសាយបក្សីហ្នឹង យើងត្រូវចាត់វិធានការជាបន្ទាន់»។
ប្រសិនបើមានជំងឺអ្វីចម្លែក ឬចង់បានព័ត៌មានបន្ថែម លោកអ្នកអាចទាក់ទងទៅលេខ ០១២ ៤៨៨ ៩៨១ និង ០៨៩ ៦៦៩ ៥៦៧។
ទន្ទឹមគ្នានេះ ក្រសួងសុខាភិបាល និងអង្គការសុខភាពពិភពលោក (WHO) ចេញសេចក្ដីប្រកាសព័ត៌មានរួមមួយ ស្ដីពីការបង្ការជំងឺផ្លូវដង្ហើមផ្សេងទៀតដែលបណ្ដាលមកពីមេរោគវីរុស (Virus) ដូចជាគ្រុនផ្ដាសាយ ជំងឺរលាកបំពង់ក ដោយមេរោគស្ត្រិបតូកូក (Streptococcus) និងជំងឺរលាកក្រពះពោះវៀន ដោយវីរុស។
ស្ថាប័នទាំងពីរ ណែនាំឲ្យអនុវត្តវិធានការបង្ការសាមញ្ញមួយចំនួន ដូចជា ទៅព្យាបាលនៅមន្ទីរពេទ្យសាធារណៈ បើមានរោគសញ្ញាពិបាកដកដង្ហើម គ្រុនក្ដៅ ក្អក ឈឺក និងឈឺសាច់ដុំ ផ្អាកធ្វើដំណើរពេលមានផ្ដាសាយ ខ្ទប់មាត់នឹងក្រណាត់ ឬគន្លាក់ដៃពេលក្អក ឬកណ្ដាស់ ដោយមិនត្រូវប្រើបាតដៃទេ លាងសម្អាតដៃជាមួយសាប៊ូ និងទឹកឲ្យបានញឹកញាប់ ចៀសវាងការប៉ះភ្នែក មាត់ និងច្រមុះ និងប៉ះអ្នកជំងឺ កុំទទួលទានសត្វឈឺងាប់ និងចម្អិនសាច់ និងស៊ុតឲ្យបានឆ្អិនល្អពេលធ្វើម្ហូប។
ទាក់ទងនឹងអាកាសធាតុត្រជាក់ក្នុងរដូវរងាខាងមុខនេះ ក្រសួងសុខាភិបាល និងអង្គការសុខភាពពិភពលោក ណែនាំឲ្យយកចិត្តទុកដាក់ស្លៀកដណ្ដប់ឲ្យបានកក់ក្ដៅចំពោះកុមារ និងមនុស្សវ័យចំណាស់ ពីព្រោះមនុស្សពីរប្រភេទនេះមានហានិភ័យខ្ពស់ចំពោះអាកាសធាតុត្រជាក់ ដោយសារមានសកម្មភាពរាងកាយ (ធ្វើចលនារាងកាយ) តិច ជាពិសេសអ្នកមានជំងឺទឹកនោមផ្អែម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។