រដ្ឋាភិបាល និងសង្គមស៊ីវិលដែលធ្វើការពាក់ព័ន្ធនឹងគម្រោងអភិវឌ្ឍន៍បសុសត្វនៅកម្ពុជា ឲ្យដឹងថា ការប្រកបរបរចិញ្ចឹមសត្វរបស់កសិករចេះតែជួបបញ្ហាប្រឈមផ្សេងៗ ជាហេតុធ្វើឲ្យប៉ះពាល់ដល់ជីវភាពរស់នៅរបស់ពលរដ្ឋ។ ទន្ទឹមគ្នានេះ រដ្ឋាភិបាល និងសង្គមស៊ីវិល នឹងសហការគ្នាបណ្តុះបណ្តាលភ្នាក់ងារសុខភាពសត្វភូមិជាង ២.០០០នាក់នៅឆ្នាំ២០១៦ នេះ ដើម្បីជំរុញដល់ការអភិវឌ្ឍវិស័យបសុសត្វនៅកម្ពុជា ឲ្យកាន់តែប្រសើរឡើង។
មន្ត្រីក្រសួងកសិកម្ម និងសង្គមស៊ីវិល អះអាងថា កត្តាសេដ្ឋកិច្ចសំខាន់ទីពីរបន្ទាប់ពីផលដំណាំសម្រាប់ប្រជាជនកម្ពុជា នោះគឺការចិញ្ចឹមសត្វដែលប្រជាជនប្រមាណ ៩០% នៃកសិករប្រកបរបរនេះ។
ការលើកឡើងរបស់មន្ត្រីក្រសួងកសិកម្ម និងសង្គមស៊ីវិលនៅពេលនេះ ធ្វើឡើងនៅក្នុងពិធីសម្ពោធគម្រោងអភិវឌ្ឍន៍បសុសត្វ ដើម្បីធ្វើឲ្យជីវភាពរស់នៅរបស់កសិករប្រសើរឡើង ដែលបានរៀបចំឡើងនៅថ្ងៃទី២៤ ខែសីហា។
ថ្លែងក្នុងពិធីសម្ពោធ អនុប្រធាននាយកដ្ឋានផលិតកម្ម និងបសុព្យាបាលនៃក្រសួងកសិកម្ម រុក្ខាប្រមាញ់ និងនេសាទ អ្នកស្រី អ៊ុក សាវិន មានប្រសាសន៍ថា ដោយមើលឃើញថាតម្រូវការសាច់សត្វនៅប្រទេសកម្ពុជា មានកាន់តែច្រើន ប៉ុន្តែវិស័យបសុសត្វនៅតែជួបឧបសគ្គនៅឡើយនោះ ទើបរដ្ឋាភិបាលមានគោលដៅបង្កើនចំនួនភ្នាក់ងារសត្វភូមិបន្ថែមទៀត។ អ្នកស្រីបញ្ជាក់ថា តាមរយៈការផ្តល់វគ្គបណ្តុះបណ្តាលដល់ភ្នាក់ងារសត្វភូមិជាង ២.០០០នាក់ នឹងជួយជំរុញឲ្យគ្រួសារកសិករកាន់តែយល់ដឹងពីបច្ចេកទេសផលិតពីភ្នាក់ងារពេទ្យសត្វភូមិ ដើម្បីពង្រឹងផ្នែកផលិតកម្មកាន់តែមានគុណភាពខ្ពស់៖ « សម្រាប់នាយកដ្ឋានបសុព្យាបាល ពិសេសក្រសួងកសិកម្ម យើងមិនព្រងើយកន្តើយដើម្បីដោះស្រាយលើវិស័យកសិកម្មតាមរយៈពេទ្យទាំងនេះ ឲ្យដឹងពីរបៀបព្យាបាល ផលិតកម្ម ការជ្រើសរើសពូជ ដើម្បីជំរុញឲ្យគ្រួសារកសិករទទួលបានតម្លៃទីផ្សារកាន់តែប្រសើរជាងមុនលើការផ្គត់ផ្គង់សាច់សត្វ » ។
សម្រាប់គម្រោងអភិវឌ្ឍន៍បសុសត្វនៅកម្ពុជា ដែលនឹងត្រូវផ្តល់វគ្គបណ្តុះបណ្តាលដល់ភ្នាក់ងារសត្វភូមិជាង ២.០០០នាក់នៅឆ្នាំ២០១៦ នេះ ទទួលបានជំនួយពីសហភាពអឺរ៉ុប ហើយត្រូវអនុវត្តក្នុងខេត្តចំនួន៦ ក្នុងនោះមានខេត្តពោធិ៍សាត់ ព្រៃវែង តាកែវ ស្វាយរៀង កំពង់ឆ្នាំង និងខេត្តកំពង់ស្ពឺ។ គម្រោងនេះមានរយៈពេល ២ឆ្នាំ ចាប់ផ្ដើមពីថ្ងៃទី១ ខែកក្កដា ឆ្នាំ២០១៦ តទៅ។ អង្គការ ភីផល អ៊ីន នីត (People in Need) និងអង្គការអ្នកក្សេត្រសាស្ត្រ និងពេទ្យសត្វគ្មានព្រំដែនជាអ្នកទទួលអនុវត្តសកម្មភាពដោយផ្ទាល់លើការបណ្តុះបណ្តាលភ្នាក់ងារពេទ្យសត្វនេះ។
ជាងនេះទៀត ទាំងរដ្ឋាភិបាល និងសង្គមស៊ីវិលដែលទទួលអនុវត្តសកម្មភាពលើគម្រោងនេះរំពឹងថា កសិករចិញ្ចឹមសត្វប្រមាណជាង ៥ម៉ឺនគ្រួសារ នឹងទទួលបានការគាំទ្រពីគម្រោងនេះ។
ទន្ទឹមគ្នានេះ ប្រធានសម្របសម្រួលអង្គការអ្នកក្សេត្រសាស្ត្រ លោក មិន សូភ័ន និងពេទ្យសត្វគ្មានព្រំដែនមានប្រសាសន៍ដែរថា បច្ចុប្បន្នចំនួនអ្នកចិញ្ចឹមសត្វនៅតាមជនបទ ពិសេសកសិករតូចតាចមានការថយចុះ តែលោកថា ប្រសិនបើមានការចិញ្ចឹមមែន វាបែរជានៅមិនទាន់ត្រូវតាមលក្ខណៈបច្ចេកទេសទៅវិញ។ លោកថា បញ្ហានេះធ្វើឲ្យកសិករមិនអាចប្រកួតប្រជែងនឹងការនាំចូលសត្វពីក្រៅប្រទេសបាន។ លោកបញ្ជាក់ថា ជំហានដំបូងនៃគម្រោងនេះ អង្គការលោកនឹងធ្វើការបណ្តុះបណ្តាលភ្នាក់ងារសុខភាពសត្វភូមិដែលមានស្រាប់ចំនួនជិត ២.០០០នាក់ (១.៩០០នាក់) ហើយបន្ទាប់មក នឹងធ្វើការបណ្តុះបណ្តាលភ្នាក់ងារសុខភាពសត្វភូមិចំនួន ២០០នាក់បន្ថែមទៀត។ លោករំពឹងថា តាមរយៈគម្រោងនេះ មិនត្រឹមតែជួយលើកកម្ពស់ផ្នែកបសុព្យាបាលប៉ុណ្ណោះទេ គម្រោងនេះនឹងជួយស្វែងរកទីផ្សារជូនកសិករដែលជាអ្នកចិញ្ចឹមសត្វផងដែរ៖ « គឺយើងរៀបចំឲ្យមានបណ្ដាញភ្នាក់ងារអភិវឌ្ឍន៍សត្វភូមិ ដើម្បីផ្លាស់ប្ដូរក្នុងការចែកចាយព័ត៌មានទាក់ទិននឹងបសុសត្វ។ ក្រៅពីនេះ គម្រោងនេះនឹងមានសកម្មភាពដែលពាក់ព័ន្ធនឹងការគាំទ្រភ្នាក់ងារសុខភាពសត្វភូមិឲ្យអាចរកប្រាក់ចំណូលបានកាន់តែច្រើន ដែលអាចឈរជើងក្នុងការជួយផ្តល់សេវាកម្មបសុព្យាបាលនៅជនបទក្នុងរយៈពេលវែង និងសកម្មភាពចងក្រងជាសមាគមកាន់តែងាយស្រួល » ។
តំណាងសហភាពអឺរ៉ុប ដែលបានផ្តល់មូលនិធិជិត ៧លានដុល្លារលើគម្រោងអភិវឌ្ឍន៍បសុសត្វនៅកម្ពុជា ដែលបានចូលរួមកម្មវិធីនេះដែរនោះ បានផ្តល់អនុសាសន៍ជូនរដ្ឋាភិបាល ពិសេសក្រសួងកសិកម្ម រុក្ខាប្រមាញ់ ត្រូវតែធ្វើការសហការឲ្យបានកាន់តែប្រសើរជាងមុនជាមួយក្រុមអ្នកផលិត ពិសេសកសិករ ក្រុមអ្នកផ្តល់សេវា អាជ្ញាធរមូលដ្ឋាន សង្គមស៊ីវិល និងផ្នែកទីផ្សារ ធ្វើយ៉ាងណាឲ្យមានការចូលរួមបានខ្លាំងក្លាពីវិស័យឯកជនឲ្យកាន់តែទូលាយជាងមុន ដើម្បីធានាដល់ការផ្គត់ផ្គង់តម្រូវការសាច់សត្វនៅកម្ពុជា៕
វីដេអូ៖ រដ្ឋាភិបាលគ្រោងបណ្តុះបណ្តាលពេទ្យសត្វជាង២ពាន់នាក់ដើម្បីជួយកសិករចិញ្ចឹមសត្វ
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។