ប្រធានសាលផ្នែកជំងឺភ្នែកនៃមន្ទីរពេទ្យមិត្តភាពខ្មែរ-សូវៀត អ្នកស្រីវេជ្ជបណ្ឌិត ឱ ធីតា មានប្រសាសន៍បញ្ជាក់ថា ការផ្ដល់សេវាពិនិត្យ និងព្យាបាលជំងឺភ្នែកជូនអ្នកជំងឺក្រីក្រដោយឥតគិតថ្លៃនេះ គឺមានរយៈពេល ៤ថ្ងៃ៖ «ក្នុងខែនេះ មន្ទីរពេទ្យមិត្តភាពខ្មែរ-សូវៀត គាត់បានទទួលនូវកម្មវិធីនេះ គឺពិនិត្យព្យាបាល និងវះកាត់ជូនប្រជាពលរដ្ឋក្រីក្រដោយអត់បង់ប្រាក់ ហើយចាប់ផ្ដើមពីថ្ងៃទី៨ ម្សិលមិញ រហូតដល់ថ្ងៃទី១១ តុលា នេះ គឺអ្នកជំងឺដែលគាត់អញ្ជើញមកពិនិត្យភ្នែក គឺមិនតម្រូវឱ្យបង់ប្រាក់ និងពិនិត្យជូន ហើយជូនថ្នាំភ្នែក បើសិនគាត់មានជំងឺអី គឺមានថ្នាំជូន។ ប៉ុន្មានថ្ងៃនេះ ចាប់តាំងមានភ្លៀងធ្លាក់ច្រើនមក មន្ទីរពេទ្យមិត្តភាពខ្មែរ-សូវៀត ទទួលបានអ្នកជំងឺដែលភ្នែកក្រហមច្រើន។ ពេលខ្លះ គាត់ឈឺភ្នែកក្រហមរហូតដល់ទៅ ៥នាក់។ ៣នាក់ ៥នាក់។ មួយផ្ទះគាត់មានប៉ុន្មានឈឺទាំងអស់ គាត់មកទទួលសេវាព្យាបាលទាំងអស់។ ឥឡូវ គាត់បានធូរសះស្បើយហើយ»។
អ្នកស្រីវេជ្ជបណ្ឌិត ឱ ធីតា ថ្លែងថា ជាធម្មតាទិវាសុខភាពភ្នែកពិភពលោក ត្រូវបានគេប្រារព្ធធ្វើតែមួយថ្ងៃទេ គឺនៅថ្ងៃទី១៤ ខែតុលា រៀងរាល់ឆ្នាំ។ នៅឆ្នាំ២០១៣ នេះ មន្ទីរពេទ្យមិត្តភាពខ្មែរ-សូវៀត ពង្រីកដល់ ៤ថ្ងៃ។
អ្នកស្រីវេជ្ជបណ្ឌិតឱ្យដឹងថា អំពាវនាវដល់ជនក្រីក្រដែលមានជំងឺភ្នែកគ្រប់ប្រភេទ ឱ្យរួសរាន់មកទទួលសេវាឥតបង់ថ្លៃផ្ដល់ដោយមន្ទីរពេទ្យ ទាំងការពិនិត្យ ព្យាបាល និងទាំងការវះកាត់ផង។ កម្មវិធីពិនិត្យព្យាបាលឥតបង់ថ្លៃនេះ មិនកំណត់ចំនួនអ្នកជំងឺទេ ដែលចាប់ពីម៉ោង ៧ព្រឹក ដល់ម៉ោង ៤រសៀល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។