បេឡាជាតិរបបសន្តិសុខសង្គម ហៅកាត់ថា ប.ស.ស បានឲ្យដឹងថា ចាប់ពីថ្ងៃទី១ ខែឧសភា ខាងមុខនេះ កម្មករកម្មការិនីជាង ១០ម៉ឺននាក់ អាចប្រើប្រាស់សេវារបបសន្តិសុខសង្គមផ្នែកថែទាំសុខភាព។ បេឡាជាតិរបបសន្តិសុខសង្គម ចាត់ទុកថា ការអនុវត្តដំណើរការគម្រោងធានារ៉ាប់រងផ្នែកសុខភាពនេះ នឹងរួមចំណែកកាត់បន្ថយភាពក្រីក្រជូនកម្មករនៅកម្ពុជា។
បេឡាជាតិរបបសន្តិសុខសង្គម អះអាងថា កម្មករ កម្មការិនីជាង ១០ម៉ឺននាក់ ដែលកំពុងបម្រើការក្នុងរោងចក្រ សហគ្រាសចំនួន៦៦ នឹងអាចប្រើសេវាថែទាំសុខភាពរបស់បេឡាជាតិរបបសន្តិសុខសង្គម នៃក្រសួងការងារ នៅដើមខែឧសភា។
នាយករងនៃបេឡាជាតិរបបសន្តិសុខសង្គម លោក ស៊ុំ សោភ័ណ បានប្រាប់វិទ្យុអាស៊ីសេរី នៅថ្ងៃទី១៥ ខែមករា ថា ដោយសារទំហំការងារ និងកម្លាំងរបស់ក្រសួងក្នុងការចុះបញ្ជិកាកម្មករ-និយោជិតនៅតាមសហគ្រាសនៅមានកម្រិត ហេតុនេះ របបសន្តិសុខសង្គមផ្នែកថែទាំសុខភាពនេះ ជំហានដំបូង នឹងត្រូវអនុវត្តដំណើរការជូនកម្មករជាង ១០ម៉ឺននាក់នៅក្នុងរាជធានីភ្នំពេញ ខេត្តកណ្ដាល និងខេត្តកំពង់ស្ពឺ៖ «កម្មករជាង ១០ម៉ឺននាក់នេះ ដែលបានចុះបញ្ជិកាជាមួយបេឡាជាតិរបបសន្តិសុខសង្គម អ៊ីចឹងទីតាំងទាំងបីនេះយើងនឹងអនុវត្តមុនគេ»។
លោក ស៊ុំ សោភ័ណ មានប្រសាសន៍ថា កន្លងមក កម្មករ កម្មការិនីមានធានារ៉ាប់រងចំពោះហានិភ័យការងាររួចហើយ។ ដោយឡែកក្នុងឆ្នាំ២០១៦ នេះ កម្មករនឹងមានធានារ៉ាប់រងផ្នែកសុខភាពបន្ថែមទៀត ដោយគ្រាន់តែកម្មករអាចចំណាយប្រាក់ដើម្បីបង់វិភាគទានតិចតួចសម្រាប់សន្សំ តាមរយៈការចុះបញ្ជីជាមួយបេឡាជាតិសន្តិសុខសង្គមប៉ុណ្ណោះ តែទទួលបានមកវិញនូវសេវាសុខភាពពេញលេញ។
ទោះជាយ៉ាងណា លោកមិនទាន់ឲ្យដឹងពីវិភាគទានដែលកម្មករ និងនិយោជក ត្រូវបង់នៅឡើយទេ ខណៈដែលក្រសួងកំពុងធ្វើការសិក្សាលើបញ្ហានេះ៖ «ធានារ៉ាប់រងនេះ បានជួយកាត់បន្ថយការចំណាយផ្សេងៗ ទាក់ទងនឹងការចំណាយលើការថែទាំសុខភាព គឺគាត់អាចធានាបានការព្យាបាលដោយឥតគិតថ្លៃជាច្រើន ដែលពាក់ព័ន្ធនឹងសេវាសុខភាព ហេតុនេះវាផ្ដល់អត្ថប្រយោជន៍ច្រើនមែនទែន»។
ប្រធានសហភាពការងារកម្ពុជា លោក អាត់ ធន់ សាទរចំពោះរបបផ្នែកថែទាំសុខភាពនេះ ព្រោះវានឹងធ្វើឲ្យកម្មករនិយោជិតចំណេញច្រើន។ ប៉ុន្តែលោកក៏ស្នើឲ្យបេឡាជាតិ ត្រូវតែបង្កើនចំនួនកម្មករបញ្ចូលក្នុងរបបនេះបន្ថែមទៀត និងត្រូវពិនិត្យ ហើយតាមដានឲ្យបានម៉ត់ចត់លើសេវាព្យាបាលរបស់មន្ទីរពេទ្យ ដែលបានចុះកិច្ចសន្យាជាមួយបេឡាជាតិរបបសន្តិសុខសង្គម តើអនុវត្តន៍មានប្រសិទ្ធភាពកម្រិតណា៖ «ត្រូវពិនិត្យថា តើមន្ទីរពេទ្យដែលបានចុះកិច្ចសន្យានោះ ពិនិត្យបានដិតដល់អត់មានសម្ភារៈគ្រប់គ្រាន់អត់ តើពេទ្យនោះគាត់មានលក្ខណៈសម្បត្តិគ្រប់គ្រាន់អត់ អ៊ីចឹងត្រូវតែពិនិត្យឲ្យច្បាស់»។
សេចក្ដីប្រកាសស្ដីពីការកំណត់ដំណាក់កាល និងកាលបរិច្ឆេទនៃការអនុវត្តរបបសន្តិសុខសង្គមផ្នែកថែទាំសុខភាព ដែលចេញដោយរដ្ឋមន្ត្រីក្រសួងការងារ លោក អ៊ិត សំហេង កាលពីពេលថ្មីៗនេះបានសម្រេចថា របបសន្តិសុខសង្គមផ្នែកថែទាំសុខភាពអនុវត្តសម្រាប់តែជនទាំងឡាយដែលស្ថិតនៅក្រោមបទប្បញ្ញត្តិនៃច្បាប់ស្ដីពីការងារប៉ុណ្ណោះ ទើបអាចប្រើប្រាស់សេវាថែទាំសុខភាព និងថែទាំវេជ្ជសាស្ត្រ ដែលផ្ដល់ដោយមូលដ្ឋានសុខាភិបាល ដែលមានការទទួលស្គាល់ពីក្រសួងសុខាភិបាល។
នាយករងនៃបេឡាជាតិរបបសន្តិសុខសង្គម លោក ស៊ុំ សោភ័ណ ក៏បញ្ជាក់ថា ជំងឺរាប់រយមុខរបស់កម្មករនឹងត្រូវធានាថា ទទួលបានសេវាព្យាបាលតាមរយៈរបបសន្តិសុខផ្នែកថែទាំសុខភាពមួយនេះ លើកលែងតែជំងឺខ្លះ ដូចជា មហារីក ការកែសម្ផស្ស ការបន្តពូជដោយសិប្បនិមិត្ត និងការបំបាត់សារធាតុគ្រឿងញៀនជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។