ក្រសួងសុខាភិបាលកម្ពុជា និងអង្គការសុខភាពពិភពលោក បង្ហាញថា បញ្ហាចំណីអាហារគ្មានសុវត្ថិភាព បណ្ដាលឲ្យមនុស្សទូទាំងពិភពលោកប្រមាណ ២លាននាក់ស្លាប់ជារៀងរាល់ឆ្នាំ។
ការបង្ហាញតួលេខនេះ គឺចំថ្ងៃដែលស្ថាប័នទាំងនេះប្រារព្ធទិវាសុខភាពពិភពលោក នៅថ្ងៃទី៧ ខែមេសា ឆ្នាំ២០១៥។ ចំណីអាហារគ្មានសុវត្ថិភាព ក៏ជាមូលហេតុនាំមុខគេលំដាប់ទី២ ដែលធ្វើឲ្យកុមារអាយុក្រោម ៥ឆ្នាំស្លាប់។
រដ្ឋមន្ត្រីក្រសួងសុខាភិបាល លោកវេជ្ជបណ្ឌិត ម៉ម ប៊ុនហេង មានប្រសាសន៍ថា ក្នុងចំណោមជំងឺរាតត្បាតដែលកើតឡើងនៅប្រទេសកម្ពុជា ស្ទើរតែពាក់កណ្ដាលបង្កឡើងដោយសារបញ្ហាចំណីអាហារ និងទឹកគ្មានសុវត្ថិភាព៖ «ចាប់តាំងពីឆ្នាំ២០១២ ដល់ ២០១៥ ក្នុងចំណោមជំងឺរាតត្បាតសរុប ១៤២លើក ក្នុងនោះជំងឺរាតត្បាតបង្កដោយពុលចំណីអាហារ និងទឹកសរុប ៦៥លើក ដែលស្មើនឹង ៤៦% នៃចំនួនសរុប។ ចំពោះជំងឺរាកដែលចូលព្យាបាលនៅតាមគ្រឹះស្ថានសុខាភិបាលសាធារណៈជារៀងរាល់ឆ្នាំ មានប្រមាណ ៣សែនករណី»។
នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលកម្ពុជា ឲ្យដឹងថា កាលពីឆ្នាំ២០១៤ មានការផ្ទុះជំងឺបណ្ដាលមកពីការពុលចំណីអាហារចំនួន ៤៦៤ករណី ដែលមានមនុស្ស ៨នាក់ស្លាប់។ ថ្មីៗនេះដែរ មានករណីពុលនំប៉័ងសាច់រាប់រយនាក់នៅខេត្តសៀមរាប។ មន្ត្រីក្រសួងសុខាភិបាល បញ្ជាក់នៅថ្ងៃទី៧ មេសា ថា លទ្ធផលនៃការពិសោធរកឃើញថា សាច់នៅក្នុងនំប៉័ងនោះមានមេរោគ តែមិនបាននិយាយឲ្យលម្អិតថា ជាមេរោគឈ្មោះអ្វីនោះទេ។
ដើម្បីកាត់បន្ថយបញ្ហានេះ ទើបក្រសួងសុខាភិបាល និងអង្គការសុខភាពពិភពលោក ដាក់ប្រធានបទសម្រាប់ទិវាសុខភាពពិភពលោកនៅឆ្នាំ២០១៥ ថា "ពីកសិដ្ឋានដល់តុបរិភោគ ធ្វើឲ្យអាហារមានសុវត្ថិភាព"។ ក្នុងន័យនេះ គឺចង់សំដៅដល់ការធ្វើយ៉ាងណាឲ្យមនុស្សគ្រប់រូប យកចិត្តទុកដាក់លើការរៀបចំចម្អិន និងការរក្សាទុកចំណីអាហារឲ្យមានសុវត្ថិភាព គ្មានមេរោគ និងគ្មានជាតិគីមី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។