ជនបរទេសចម្រុះជាតិសាសន៍មួយក្រុមបានចាត់ទុកជំងឺមហារីកក្រពេញប្រូស្តាត ឬសាច់ដុំខ្ជឹបទឹកនោម (Prostate Cancer) គឺជាជំងឺដ៏កាចសាហាវ ដែលកំពុងសម្លាប់មនុស្សប្រមាណ ១.៣០០នាក់ក្នុងមួយថ្ងៃៗ នៅលើពិភពលោក។ ដោយសារភ័យខ្លាចនឹងជំងឺនេះ ជនបរទេសទាំងនោះ រួមគ្នាធ្វើសកម្មភាពផ្សព្វផ្សាយដើម្បីឱ្យប្រជាពលរដ្ឋខ្មែរបានយល់ដឹងពីគ្រោះថ្នាក់នៃជំងឺមហារីកមួយនេះ និងប្រញាប់ប្រញាល់ស្វែងរកការព្យាបាលឱ្យបានឆាប់រហ័ស។
ក្រុមជនបរទេសដែលមកពីប្រទេសផ្សេងៗចំនួន ១៥នាក់ បានរួមគ្នាជិះម៉ូតូធំដង្ហែក្បួននៅតាមដងផ្លូវមួយចំនួនក្នុងទីក្រុងសៀមរាប កាលពីរសៀលថ្ងៃអាទិត្យ ទី២៧ ខែកញ្ញា ដើម្បីផ្សព្វផ្សាយ និងអប់រំប្រជាពលរដ្ឋខ្មែរ ព្រមទាំងអ្នកទេសចរបរទេសផង ឱ្យយល់ដឹងអំពីគ្រោះថ្នាក់នៃជំងឺមហារីកក្រពេញប្រូស្តាត ឬក៏សាច់ដុំខ្ជឹបទឹកនោម ដែលភាសាអង់គ្លេសហៅថា ប្រូស្តាត ខេនស្សឺ (Prostate cancer)។
ជនបរទេសដែលរួមគ្នាជិះម៉ូតូធំដង្ហែក្បួនផ្សព្វផ្សាយឱ្យយល់ដឹងពីគ្រោះថ្នាក់នៃជំងឺមហារីកទាំងនោះ មានមកពីសហរដ្ឋអាមេរិក (Unite State) ប្រទេសអៀរឡង់ (Ireland) ឥណ្ឌា (India) ប្រទេសនូវែលហ្សេឡង់ (New Zealand) ចក្រភពអង់គ្លេស (England) អូស្ត្រាលី (Australia) ម៉ាឡេស៊ី (Malaysia) ប្រទេសស្កុតឡែន (Scotland) រួមនឹងកម្ពុជា ចំនួន ៣នាក់ផង។
បុរសជនជាតិឥណ្ឌាម្នាក់ ដែលជាអ្នកផ្ដួចផ្ដើមរៀបចំក្បួនជិះម៉ូតូធំ ដើម្បីផ្សព្វផ្សាយ និងអប់រំប្រជាពលរដ្ឋឱ្យយល់ដឹងពីគ្រោះថ្នាក់នៃជំងឺមហារីកក្រពេញប្រូស្តាត ឬក៏សាច់ដុំខ្ជឹបទឹកនោមនោះ គឺលោក ឆាលី កុមារ (Charlie Kumar)។ លោកមានប្រសាសន៍ថា រូបលោកនឹងជនបរទេសជាច្រើននាក់ទៀត ទទួលបានការឧបត្ថម្ភពីក្រុមហ៊ុនម៉ូតូ និងម្ចាស់សណ្ឋាគារមួយចំនួននៅខេត្តសៀមរាប ដូចជាសណ្ឋាគារសិន្តាមុន្នី និងសណ្ឋាគារ រ៉ាសហ្វល (Raffle) ព្រមទាំងមូលនិធិខ្លះចេញពីប្រអប់សន្សំ Charlies Box ដើម្បីរៀបចំក្បួនជិះម៉ូតូធំដង្ហែផ្សព្វផ្សាយអំពីគ្រោះថ្នាក់នៃជំងឺមហារីកសាច់ដុំខ្ជឹបទឹកនោមនេះ។
លោក ឆាលី កុមារ បញ្ជាក់ទៀតថា ការផ្ដួចផ្ដើមគំនិតដើម្បីជិះម៉ូតូផ្សព្វផ្សាយអំពីជំងឺ Prostate cancer នេះ គឺដោយសារតែមនុស្សជាច្រើននៅមិនទាន់យល់ដឹង និងស្គាល់ពីគ្រោះថ្នាក់ទេ។ លោក ឆាលី កុមារ ឱ្យដឹងថា ជារៀងរាល់ថ្ងៃ មនុស្សនៅជុំវិញពិភពលោកចំនួនប្រមាណ ១.៣០០នាក់ បានស្លាប់ដោយសារតែជំងឺមហារីកក្រពេញប្រូស្តាត ឬក៏សាច់ដុំខ្ជឹបទឹកនោម ហើយមនុស្សប្រុសប្រហែលពី ៩ ទៅ ១០នាក់ បានកើតជំងឺនេះក្នុង១ខែៗ។
លោក ឆាលី សង្កេតឃើញថា នៅប្រទេសកម្ពុជា ក៏ដូចជានៅខេត្តសៀមរាប គឺប្រជាពលរដ្ឋខ្មែរជាច្រើននៅមិនទាន់មានការយល់ដឹងអំពីជំងឺនេះឱ្យបានទូលំទូលាយទេ៖ «យើងចង់ឱ្យប្រជាពលរដ្ឋជាច្រើនបានយល់ដឹងអំពីគ្រោះថ្នាក់នៃជំងឺនេះ យ៉ាងហោចណាស់ក្នុង១សប្ដាហ៍ក៏មានមនុស្សម្នាក់បានឮ និងយល់ដឹងដែរ។ ចាប់អារម្មណ៍ចំពោះគ្រោះថ្នាក់នៃជំងឺមហារីកក្រពេញប្រូស្តាត ឬក៏សាច់ដុំខ្ជឹបទឹកនោមនេះ គឺដោយសារតែលោកឪពុករបស់ខ្ញុំបានស្លាប់ដោយសារជំងឺនេះ ហើយបន្ទាប់មកម្ដាយរបស់ខ្ញុំក៏ស្លាប់ដោយសារតែជំងឺមហារីក»។
ក្រុមអ្នកជិះម៉ូតូធំដង្ហែផ្សព្វផ្សាយអំពីគ្រោះថ្នាក់នៃជំងឺមហារីកនោះ ពេលខ្លះបានចូលទៅតាមសណ្ឋាគារមួយចំនួនដែលគេគ្រោងទុក និងពេលខ្លះគេឈរថ្លែងសារអប់រំដល់មហាជននៅតាមទីសាធារណៈ ព្រមទាំងចែកខិត្តប័ណ្ណស្ដីពីជំងឺមហារីកក្រពេញប្រូស្តាត ទៅឱ្យមហាជនបានស្វែងយល់ផង។
លោក ឆាលី កុមារ ចង់ឱ្យអង្គការក្រៅរដ្ឋាភិបាលជួយផ្ដល់នូវការពិនិត្យសុខភាព ព្រមទាំងផ្ដល់ថ្នាំព្យាបាលដល់ប្រជាពលរដ្ឋកម្ពុជា ដោយឥតគិតថ្លៃ។ លោក ឆាលី ឱ្យដឹងថា សម្រាប់រូបលោក គឺនៅក្រោយពីការជិះម៉ូតូផ្សព្វផ្សាយនេះប្រហែល ២សប្ដាហ៍ លោកមានគម្រោងធ្វើគ្លីនិកបណ្ដោះអាសន្នមួយ ដើម្បីបើកឱ្យប្រជាពលរដ្ឋខេត្តសៀមរាប មកធ្វើតេស្តឈាមរកមេរោគមហារីកក្រពេញប្រូស្តាត ឬក៏សាច់ដុំខ្ជឹបទឹកនោម ហើយនៅពេលដែលរកឃើញប្រជាពលរដ្ឋណាមានជំងឺនេះ ប៉ុន្តែគ្រួសាររបស់គេក្រីក្រ គឺលោកនឹងស្វែងរកមូលនិធិមកជួយព្យាបាល។
លោក អ៊ុន សាវ៉ាន់ គឺជាយុវជនខ្មែរម្នាក់ ដែលចូលរួមជួយសម្របសម្រួលដល់ក្រុមអ្នកជិះម៉ូតូផ្សព្វផ្សាយអំពីជំងឺមហារីកនោះ មានប្រសាសន៍ថា លោកធ្លាប់ធ្វើការងារសង្គមជាច្រើនឆ្នាំមកហើយ ក៏ប៉ុន្តែ នេះជាលើកដំបូងដែលលោកបានចូលរួមក្នុងសកម្មភាពសុខភាព។
លោក សាវ៉ាន់ ចាត់ទុកថា ការផ្សព្វផ្សាយឱ្យយល់ដឹងអំពីជំងឺមហារីកក្រពេញប្រូស្តាត ឬក៏សាច់ដុំខ្ជឹបទឹកនោម គឺជារឿងសំខាន់ណាស់សម្រាប់ជួយដល់អាយុជីវិតរបស់ពលរដ្ឋកម្ពុជា៖ «សម្រាប់ខ្ញុំវិញគិតថា គួរតែមានការផ្សព្វផ្សាយបន្ថែមពាក់ព័ន្ធនឹងជំងឺហ្នឹង ជាពិសេសគឺបុរសតែម្ដង មិនតែទីក្រុងទេ ជាពិសេសគឺតំបន់ជនបទដែរ»។
មន្ត្រីផ្នែកសុខភាពឱ្យដឹងថា ពេលបច្ចុប្បន្ន គឺប្រជាពលរដ្ឋកម្ពុជា ជាច្រើនកំពុងកើតជំងឺមហារីកក្រពេញប្រូស្តាត ឬក៏សាច់ដុំខ្ជឹបទឹកនោមនេះ ជាពិសេសគឺមនុស្សប្រុសដែលមានវ័យចំណាស់។
គេហទំព័រជាភាសាអង់គ្លេសមួយឈ្មោះ វលដ៍ ហ៊ែល្វ រ៉េងឃីង (World Health Ranking) ឱ្យដឹងថា បច្ចុប្បន្ន ក្នុងចំណោមប្រជាពលរដ្ឋកម្ពុជា ចំនួនជាង ១៥លាននាក់នោះ គឺមាន ២,៦៤% មានកើតជំងឺមហារីកប្រូស្តាត។
ប្រធានមន្ទីរសុខាភិបាលខេត្តសៀមរាប លោកវេជ្ជបណ្ឌិត ក្រូស សារ៉ាត់ មានប្រសាសន៍ថា ជំងឺមហារីកក្រពេញប្រូស្តាត ឬក៏សាច់ដុំខ្ជឹបទឹកនោម គឺជាប្រភេទនៃជំងឺមិនឆ្លងនៅក្នុងចំណោមជំងឺមួយចំនួនទៀត ដូចជាជំងឺទឹកនោមផ្អែម ជំងឺលើសឈាម និងជំងឺផ្លូវចិត្តជាដើម។ ក្រសួងសុខាភិបាលកំពុងព្រួយបារម្ភជាខ្លាំងទៅលើសុខភាពសាធារណៈជុំវិញជំងឺទាំងឡាយនេះ៖ «ជួនកាលវាហើមក្រពេញប្រូស្តាតហ្នឹង វានោមអត់ចេញទេ ហើយជួនកាលទាល់តែមានមេតាស្តារអីហើយ បានយើងដឹង។ មិនមែនព្រួយបារម្ភតែរឿងមហារីកប្រូស្តាតនោះទេ គឺព្រួយបារម្ភរឿងមហារីកទាំងអស់ហ្នឹង»។
លោកវេជ្ជបណ្ឌិត ក្រូស សារ៉ាត់ ពន្យល់ថា ជំងឺមហារីកក្រពេញប្រូស្តាត ឬក៏សាច់ដុំខ្ជឹបទឹកនោម គឺអាចព្យាបាលជាសះស្បើយទៅតាមបច្ចេកទេសរបស់គ្រូពេទ្យ ប្រសិនបើអ្នកជំងឺមកព្យាបាលទាន់ពេលវេលា។ ដូច្នេះប្រជាពលរដ្ឋខ្មែរគួរតែចាប់អារម្មណ៍ពីគ្រោះថ្នាក់នៃជំងឺនេះ ហើយគួរទៅធ្វើតេស្តឈាមរកមេរោគមហារីកដើម្បីឱ្យទទួលបានព័ត៌មាន និងព្យាបាលបានឆាប់រហ័សនិងទាន់ពេល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។