ពលរដ្ឋនៅឃុំសាលាវិស័យ ស្រុកប្រាសាទបល្ល័ង្គ ខេត្តកំពង់ធំ បានលើកឡើងពីផលប៉ះពាល់ដោយផ្សែងចេញពីឡធ្យូង នៅក្នុងភូមិជាង ១០កន្លែង បណ្ដាលឲ្យប្រជាពលរដ្ឋនៅក្នុងភូមិ ពិសេសក្មេងៗមានជំងឺ។ យ៉ាងណា អាជ្ញាធរបញ្ជាក់ថា នឹងចាត់វិធានការដល់ម្ចាស់អាជីវកម្មទាំងនោះបន្ថែមទៀត។
ចំហេះផ្សែងចេញពីឡធ្យូងជាង ១០កន្លែង នៅក្នុងភូមិបណ្ដាលឲ្យពលរដ្ឋមួយចំនួនមានជំងឺជាហូរហែ ដូចជាជំងឺក្អក រលាកសួត ជំងឺផ្លូវដង្ហើម ឈឺក្បាល និងផ្ដាសាយ ជាដើម។ ពលរដ្ឋដែលរងផលប៉ះពាល់ បានប្រាប់ទៅអាជ្ញាធរឃុំជារឿយៗ ប៉ុន្តែមិនទាន់ឃើញមានវិធានការចំពោះម្ចាស់អាជីវកម្មទាំងនោះទេ។
ពលរដ្ឋនៅភូមិត្រពាំងថ្មថ្មី ឃុំសាលាវិស័យ សុំមិនបញ្ចេញឈ្មោះឲ្យដឹងថា សកម្មភាពដុតឧសយកធ្យូងនៅក្នុងភូមិ គឺចាប់ផ្ដើមប្រមាណជា ២ឆ្នាំមកហើយ ដោយចេះតែបង្កផលប៉ះពាល់ដល់ពលរដ្ឋស្ទើរពេញមួយភូមិ។ អ្នកស្រីថា កាលពីមុនឡធ្យូង គឺដុតនៅកន្លែងឆ្ងាយពីភូមិ ប៉ុន្តែតាំងពីម្ចាស់អាជីវកម្មទាំងនោះផ្លាស់ប្ដូរមកដុតនៅក្នុងភូមិ បណ្ដាលឲ្យពលរដ្ឋ ពិសេសស្ត្រីពោះធំ និងកូនក្មេងមានជំងឺ៖ «ខ្ញុំបារម្ភកូនក្មេងមនុស្សចាស់អីនេះកើតរបេងសួត របេងអីអស់ទៅណាស់។ បើគេមិនយកចិត្តទុកដាក់»។
អ្នកស្រីបន្ថែមថា គាត់មិនចង់ឲ្យគេបិទដំណើរការអាជីវកម្មរបស់ពួកគេទាំងស្រុងទេ ប៉ុន្តែអ្នកស្រីចង់ឲ្យគេផ្លាស់ប្ដូរទៅធ្វើកន្លែងណាមួយឆ្ងាយពីកន្លែងប្រជាពលរដ្ឋរស់នៅ ដើម្បីជៀសវាងផលប៉ះពាល់ដល់អ្នកភូមិ។
ស្រដៀងគ្នានេះ មេភូមិត្រពាំងថ្មថ្មី អ្នកស្រី ជ័រ ទណ មានប្រសាសន៍ដែរថា ពលរដ្ឋក្នុងភូមិពិតជាមានបញ្ហាច្រើន ដោយសារឡធ្យូងនោះមែន។ អ្នកស្រីថា គាត់បានណែនាំដល់ម្ចាស់អាជីវកម្មទាំងនោះឲ្យធ្វើយ៉ាងណាជៀសវាងផលប៉ះពាល់ដល់ពលរដ្ឋ ប៉ុន្តែពួកគេធ្វើតាមបានតែរយៈពេលខ្លីប៉ុណ្ណោះ។ អ្នកស្រីបន្ថែមថា កន្លងមកគាត់បានប្រាប់អាជ្ញាធរឃុំ ប៉ុន្តែមិនទាន់ឃើញចំណាត់ការណាមួយឲ្យមានប្រសិទ្ធភាពឡើយ៖ «រួចហើយខ្ញុំដើរប្រាប់តាមម្ចាស់ឡៗ ហើយឡើងប្រជុំប្រចាំខែ ខ្ញុំរាយការណ៍ប្រាប់មេឃុំ ប៉ុន្តែគាត់រវល់»។
ទោះយ៉ាងណា វិទ្យុអាស៊ីសេរី នៅមិនអាចទាក់ទងម្ចាស់អាជីវកម្មណាម្នាក់ក្នុងចំណោមពួកគេទាំងនោះបានទេ នៅថ្ងៃទី២៧ កុម្ភៈ។
មេឃុំសាលាវិស័យ លោក អឹម អន មានប្រសាសន៍ថា កន្លងមកខាងលោកបានណែនាំដល់ម្ចាស់អាជីវកម្មទាំងនោះហើយ ប៉ុន្តែពួកគេមិនបានអនុវត្តតាម ដោយសារតែពលរដ្ឋមិនមានមុខរបរសម្រាប់ធ្វើក្រោយពេលសម្រាកពីរបរធ្វើស្រែរបស់ខ្លួន។ តែយ៉ាងណាលោកថា បច្ចុប្បន្នសកម្មភាពឡធ្យូង គឺថយចុះខ្លះហើយ បន្ទាប់ពីឈើដែលពួកគេទទួលយកពីក្រុមហ៊ុនកាន់តែស្បើយ ហើយអាជីវកម្មទាំងនោះនឹងឈានទៅបញ្ឈប់តែម្តង នៅពេលឈើនៅក្នុងក្រុមហ៊ុនអស់៖ «អស់ឧសអស់អីដែរនោះណា៎។ ពីមុនមានអាកាស្យាអី ឥឡូវអស់ហើយ»។
ឈើដែលពលរដ្ឋយកមកធ្វើធ្យូងសម្រាប់លក់ គឺគេយកមកពីខាងក្រុមហ៊ុន គល់ វាសនា ដាំដើមអាកាស្យានៅក្នុងឃុំ ដោយពួកគាត់សុំចែកទិញកម្ទេចកំទីពីក្រុមហ៊ុនសម្រាប់យកមកធ្វើធ្យូងគ្រាន់ជាមុខរបរប្រចាំថ្ងៃរបស់ខ្លួន។
ទោះជាយ៉ាងណា មេភូមិត្រពាំងថ្មថ្មី បញ្ជាក់ថា សកម្មភាពអាជីវកម្មធ្យូង គឺមិនថយចុះទេ មានតែកើនឡើង។
ដោយឡែកប្រធានមណ្ឌលសុខភាពឃុំសាលាវិស័យ លោក លឹម ស្រ៊ុន មានប្រសាសន៍ថា លោកនៅក្បែរកន្លែងអាជីវកម្មធ្យូងនោះដែរ ប៉ុន្តែមិនឃើញថាមានផលប៉ះពាល់ធ្ងន់ធ្ងរណាកើតឡើងលើប្រជាពលរដ្ឋទេ។ លោកបន្ថែមថា ប្រសិនបើមានបញ្ហាដោយសារចំហេះផ្សែងចេញពីឡនោះមែន ពលរដ្ឋគប្បីនៅឲ្យឆ្ងាយពីផ្សែងចេញពីឡ ទើបធ្វើឲ្យពួកគាត់គេចផុតពីផលប៉ះពាល់បាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។