លោកវេជ្ជបណ្ឌិត សុខ ទូច ប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល មានប្រសាសន៍ប្រាប់វិទ្យុអាស៊ីសេរី តាមទូរស័ព្ទថា ចាប់តាំងពីដើមឆ្នាំ២០១៣ មក នៅកម្ពុជា មានមនុស្សស្លាប់ចំនួន ៨នាក់ ដោយសារជំងឺគ្រុនផ្ដាសាយបក្សីH5N1 និងបានសម្លាប់សត្វមាន់ ជាង ១ម៉ឺន ៣ពាន់ក្បាល ដែលបានឈឺ និងកើតជំងឺនេះ។
លោកបន្តថា អាជ្ញាធរកម្ពុជា កំពុងពិនិត្យតាមដានមេរោគប្រភេទនេះដោយយកចិត្តទុកដាក់ និងរួមសហការយ៉ាងជិតស្និទ្ធជាមួយអាជ្ញាធរវៀតណាម ចិន ព្រមទាំងអង្គការសុខភាពពិភពលោក ដើម្បីចាត់វិធានការរួមគ្នាទប់ស្កាត់។
ប្រភពព័ត៌មានបារាំង អា.អេហ្វ.ប៉េ (AFP) ផ្សាយនៅថ្ងៃអង្គារ ទី៩ ខែមេសា នេះ ដែលបានដកស្រង់សម្ដីមន្ត្រីសុខាភិបាលវៀតណាម បានឲ្យដឹងថា កុមារអាយុ ៤ឆ្នាំម្នាក់ បានស្លាប់កាលពីពេលថ្មីៗនេះ ដោយសារមេរោគគ្រុនផ្ដាសាយបក្សីH5N1។ នេះជាករណីស្លាប់លើកទី១ ហើយ តាំងពីដើមឆ្នាំ២០១២ មក។ ចាប់ពីឆ្នាំ២០០៣ មក មានមនុស្សស្លាប់ ៦២នាក់ ក្នុងនោះ ២នាក់ស្លាប់កាលពីឆ្នាំ២០១២ ដោយសារជំងឺផ្ដាសាយបក្សីH5N1 នៅក្នុងប្រទេសវៀតណាម។
ចំណែកនៅក្នុងប្រទេសចិន វិញ កាលពីពេលថ្មីៗនេះ មានមនុស្សស្លាប់ចំនួន ៧នាក់ ក្នុងចំណោមអ្នកកើត និងឆ្លងចំនួន ២៤នាក់ ដោយសារជំងឺគ្រុនផ្ដាសាយបក្សីប្រភេទH7N9។ អាជ្ញាធរចិន ក៏បានសម្លាប់សត្វមាន់ចំនួនជាង ១១ម៉ឺនក្បាលផងដែរ ដែលបានឆ្លងរាតត្បាតជំងឺមួយនេះ។
អាជ្ញាធរវៀតណាម និងចិន បានរួមសហការគ្នាដើម្បីទប់ស្កាត់ការរាលដាលនៃជំងឺផ្ដាសាយបក្សីនេះ និងបានហាមឃាត់ការធ្វើជំនួញសត្វមាន់ឆ្លងដែននៃប្រទេសទាំងពីរ។
ស្ថិតិអង្គការសុខភាពពិភពលោក បានឲ្យដឹងថា ជំងឺគ្រុនផ្ដាសាយបក្សីបានសម្លាប់មនុស្សជាង ៣៧០នាក់ ក្នុងពិភពលោក ចាប់ពីមានការផ្ទុះនៃមេរោគH5N1 កាលពី ១០ឆ្នាំមុន នៅទ្វីបអាស៊ី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។