អនុប្រធានមន្ទីរសុខាភិបាល និងជាប្រធានស្រុកប្រតិបត្តិនៃមន្ទីរសុខាភិបាលខេត្តរតនគិរី លោកវេជ្ជបណ្ឌិត ថា ប៊ុនថាក់ នៅថ្ងៃពុធ ទី១២ ខែមិថុនា មានប្រសាសន៍បញ្ជាក់ថា ជំងឺគ្រុនឈីក បណ្ដាលមកពីមូលខ្លាខាំ ប៉ុន្តែមិនបណ្ដាលឲ្យអ្នកជំងឺស្លាប់ដូចជំងឺគ្រុនឈាមនោះឡើយ។ ចំណែកវិធានការទប់ស្កាត់ជំងឺនេះ គឺប្រជាពលរដ្ឋត្រូវលុបបំបាត់ជម្រកមូសខ្លា ឬដាក់ថ្នាំអាបែត (Abet) សម្លាប់ដង្កូវទឹកនៅក្នុងអាង ឬពាងស្តុកទឹក។
លោកបន្តថា ប្រជាពលរដ្ឋកើតមានជំងឺគ្រុនឈីក ត្រូវអញ្ជើញទៅកាន់ប៉ុស្តិ៍សុខភាពមណ្ឌលសុខភាព ឬមន្ទីរពេទ្យ ដើម្បីទទួលសេវាព្យាបាល ឬបំពេញជាតិទឹកក្នុងខ្លួន តាមរយៈបរិភោគទឹក ឬទឹកអូរ៉ាលីត ឲ្យបានច្រើន ឬបញ្ចូលស៊ីរ៉ូម៖ «ប្រជាជនយើងមានការបារម្ភ វាដូចជាចម្លែក ជួនកាលវាចេញកន្ទួលក្រហមៗឈឺឆ្អឹងឈឺឆ្អែង ជួនកាលគាត់ដើរអត់ចង់រួច ហើយងងុយតែដេក កុំឲ្យច្រឡំថាគ្រុនឈាម មូសខ្លាខាំហ្នឹងវាមិនបណ្ដាលឲ្យទៅជាសុក ដូចគ្រុនឈាមទេ ដូចជាផ្ដាសាយដែរ តែផ្ដាសាយវាហៀរសំបោរ តែវាអត់ហៀរទេ ស្ងួតតែម្តងទន់ជើងឈឺសន្លាក់ស្ងួតតាមមាត់តាមបំពង់ក»។
មន្ត្រីមន្ទីរសុខាភិបាលគ្រោងចុះដាក់ថ្នាំអាបែត តាមពាង អាង ឬថ្លុកនៅលំនៅឋានប្រជាពលរដ្ឋនៅខេត្តរតនគិរី នាពេលខាងមុននេះ ដើម្បីសម្លាប់មូសខ្លា ប៉ុន្តែមន្ត្រីសុខាភិបាលអំពាវនាវឲ្យប្រជាពលរដ្ឋចូលរួមធ្វើអនាម័យលុបបំបាត់ទីមានទឹកដក់ទឹកថ្លុក និងសម្អាតព្រៃក្បែរផ្ទះជាជម្រកមូលខ្លា និងជាពិសេសគ្រប់ក្រុមគ្រួសារ ត្រូវស្លៀកសម្លៀកបំពាក់ការពារកុំឲ្យមូសខ្លាខាំបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។