ប្រជាពលរដ្ឋមួយចំនួននៅខេត្តឧត្តរមានជ័យ ខេត្តព្រះវិហារ និងខេត្តសៀមរាប កំពុងដាក់ពាក្យបណ្ដឹងចោទប្រកាន់គ្រូពេទ្យរដ្ឋ និងគ្លីនិកព្យាបាលឯកជនខ្លះថា មិនមានជំនាញគ្រប់គ្រាន់ ព្រមទាំងមិនយកចិត្តទុកដាក់ព្យាបាលអ្នកជំងឺដោយប្រុងប្រយ័ត្នទេ។
ការធ្វេសប្រហែសទាំងនេះ បណ្ដាលឱ្យអ្នកទៅសម្រាកព្យាបាល និងស្ត្រីសម្រាលកូនខ្លះបានទទួលមរណភាពជាបន្តបន្ទាប់គ្នាចាប់តាំងពីដើមខែមេសា រហូតមកដល់ពេលនេះ។
រយៈពេល ២ខែចុងក្រោយនៃដើមឆ្នាំ២០១៥ នេះ ព័ត៌មានដែលនិយាយអំពីការស្លាប់របស់ប្រជាពលរដ្ឋ ដោយសារទៅសម្រាកព្យាបាលនៅតាមគ្លីនិកឯកជន និងស្ត្រីដែលសម្រាលកូននៅតាមមន្ទីរពេទ្យរបស់រដ្ឋ បានលេចឮជាបន្តបន្ទាប់នៅខេត្តចំនួន ៣ នាភាគឧត្តរនៃប្រទេសកម្ពុជា។ ខេត្តទាំង ៣នោះ មានខេត្តសៀមរាប ខេត្តឧត្តរមានជ័យ និងខេត្តព្រះវិហារ ដែលមានព្រំដែនជាប់គ្នាជាមួយប្រទេសថៃ និងប្រទេសឡាវ។
បច្ចុប្បន្ននេះ ក្រុមគ្រួសារអ្នកស្លាប់ដោយសារគ្លីនិកឯកជនព្យាបាល និងស្ត្រីស្លាប់ដោយសារសម្រាលកូនខ្លះ កំពុងដាក់ពាក្យប្ដឹងទៅតុលាការ ដើម្បីតវ៉ាអំពីកាស្លាប់នៃសមាជិកគ្រួសាររបស់គេ ហើយអ្នកខ្លះទៀត ក៏បានធ្វើការរិះគន់ទៅលើគ្រូពេទ្យថា មិនមានការយកចិត្តទុកដាក់ព្យាបាលច្បាស់លាស់ជាដើម។
បុរសឈ្មោះ អ៊ី វិបុល គឺជាអ្នកភូមិស្ថាពរ នៃសង្កាត់កំពង់ប្រណាក ខេត្តព្រះវិហារ។ លោកអះអាងថា ប្រពន្ធរបស់លោកបានស្លាប់នៅក្នុងមន្ទីរពេទ្យខេត្តព្រះវិហារ កាលពីថ្ងៃទី៧ ខែមេសា កន្លងទៅ នៅពេលដែលសម្រាលកូនទី៥។ បុរសដដែលអះអាងថា មុនពេលសម្រាលកូន គឺសុខភាពប្រពន្ធរបស់គាត់មាំមួនណាស់។ ក៏ប៉ុន្តែប្រពន្ធរបស់គាត់បែរជាស្លាប់ បន្ទាប់ពីគ្រូពេទ្យវះកាត់យកកូនចេញ។
លោក អ៊ី វិបុល យល់ថា គ្រូពេទ្យពិតជាខ្វះជំនាញក្នុងការជួយប្រពន្ធរបស់គាត់នៅពេលសម្រាលកូននោះ ហើយគាត់បានដាក់ពាក្យបណ្ដឹងទៅតុលាការ ក៏ប៉ុន្តែមិនមានអ្នកណាជួយរកយុត្តិធម៌ឱ្យទេ៖ «មនុស្សមិនគួរស្លាប់ទេ ប្រពន្ធរបស់ខ្ញុំហ្នឹងដើរទៅសម្រាលកូននៅមន្ទីរពេទ្យដោយខ្លួនឯង នៅម៉ោង ៣កន្លះល្ងាច ហើយម៉ោង ៧ស្លាប់។ វាអត់សមសោះ។ ចង់និយាយថា ទៅដល់ទី១ គឺគ្រូពេទ្យមិនសូវយកចិត្តទុកដាក់ទេ ទី២ គឺពេទ្យគ្មានជំនាញគ្រប់គ្រាន់ក្នុងការបង្កើតកូន»។
នេះជាគ្រួសារទី២ហើយ ដែលបានដាក់ប្ដឹងគ្រូពេទ្យនៅខេត្តព្រះវិហារ។ កាលពីថ្ងៃទី៣ ខែមីនា កន្លងទៅ មន្ត្រីកងរាជអាវុធហត្ថក្រុងព្រះវិហារម្នាក់ ក៏បានដាក់ពាក្យប្ដឹងគ្រូពេទ្យខេត្តនេះដែរ បន្ទាប់ពីប្រពន្ធរបស់គាត់ស្លាប់ក្នុងពេលសម្រាលកូនដូចគ្នា។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តព្រះវិហារ លោក ឡោ ចាន់ រិះគន់ថា មន្ទីរពេទ្យរបស់រដ្ឋនៅខេត្តព្រះវិហារ បច្ចុប្បន្នដូចជាមិនសូវយកចិត្តទុកដាក់ខ្ពស់ក្នុងការព្យាបាល ទើបបណ្ដាលឱ្យប្រជាពលរដ្ឋមានគ្រោះថ្នាក់ជាបន្តបន្ទាប់ដូចនេះ៖ «ពីព្រោះយើងឃើញថា ក្នុងពេលថ្មីៗនេះ អ្នកជំងឺក៏ដូចជាជនរងគ្រោះដែលបានទៅព្យាបាលនៅមន្ទីរពេទ្យនោះ បណ្ដាលឱ្យមានគ្រោះថ្នាក់ដល់អាយុជីវិត ហើយពេលខ្លះច្រើនតែបញ្ជូនទៅពេទ្យផ្សេងទៀត»។
ចំណែកនៅខេត្តសៀមរាបវិញ កាលពីថ្ងៃទី២៣ ខែមេសា កន្លងទៅ បុរសម្នាក់ឈ្មោះ យុន សុធា អាយុ ៣៥ឆ្នាំ ជាអ្នកភូមិក្រួស សង្កាត់ស្វាយដង្គំ ក្រុងសៀមរាប បានស្លាប់ បន្ទាប់ពីគាត់មានអាការៈឈឺក្បាលនិងវិលមុខ ហើយទៅសម្រាកព្យាបាលនៅគ្លីនិកសុខភាពឯកជនមក។
ក្រុមគ្រួសាររបស់បុរសដែលស្លាប់នោះ កំពុងដាក់ពាក្យប្ដឹងទៅតុលាការ ដើម្បីទាមទារឱ្យគ្លីនិកសុខភាពឯកជននោះ ទទួលខុសត្រូវលើការព្យាបាលមនុស្សបណ្ដាលឱ្យស្លាប់នេះ។
បញ្ហាដូចគ្នានេះដែរ នៅខេត្តឧត្តរមានជ័យ គឺស្ត្រីវ័យក្មេងម្នាក់ឈ្មោះ សឿន សំអាង អាយុ ២១ឆ្នាំ នៅភូមិគោកខ្ពស់ ឃុំគោកខ្ពស់ ស្រុកបន្ទាយអំពិល បានស្លាប់កាលពីថ្ងៃទី៧ ខែឧសភា កន្លងទៅ នៅពេលដែលគាត់សម្រាលកូនដំបូងនៅមណ្ឌលសុខភាពឃុំគោកខ្ពស់។
បុរសម្នាក់ឈ្មោះ សែ ណន ជាអ្នកភូមិជាមួយស្ត្រីរងគ្រោះ បានអះអាងថា រូបគាត់ត្រូវមេឃុំគោកខ្ពស់ និងគ្រូពេទ្យនៃមណ្ឌលសុខភាព គំរាមកំហែង បន្ទាប់ពីបានផ្សព្វផ្សាយរិះគន់តាមបណ្ដាញសង្គមហ្វេសប៊ុក (Facebook) អំពីករណីគ្រូពេទ្យមិនយកចិត្តទុកដាក់ព្យាបាលបណ្ដាលស្ត្រីវ័យក្មេងស្លាប់នោះ។
លោក សែ ណន បញ្ជាក់ថា មេឃុំគោកខ្ពស់ និងគ្រូពេទ្យមណ្ឌលសុខភាព បានចោទរូបលោកថា បានបរិហារកេរ្តិ៍ ហើយបានកោះហៅរូបលោកឱ្យចូលខ្លួនទៅឆ្លើយបំភ្លឺនៅសាលាឃុំនៅថ្ងៃទី១១ ខែឧសភា៖ «ខាងឃុំគេហៅខ្ញុំទៅ គេថា ខាងមណ្ឌលសុខភាពគេប្ដឹងខ្ញុំ ថាខ្ញុំធ្វើឱ្យប៉ះពាល់កិត្តិយសមណ្ឌលសុខភាពរបស់គេ។ ខ្ញុំអត់បារម្ភទេ ចាំមើលស្អែកខ្ញុំទៅបំភ្លឺ»។
ពេលបច្ចុប្បន្ន មជ្ឈដ្ឋានប្រជាពលរដ្ឋ និងអង្គការក្រៅរដ្ឋាភិបាលខ្លះ ពុំមានជំនឿទៅលើមន្ទីរពេទ្យរបស់រដ្ឋ និងគ្រូពេទ្យខ្លះ ថាមានសមត្ថភាពគ្រប់គ្រាន់ និងព្យាបាលប្រជាពលរដ្ឋដោយយកចិត្តទុកដាក់ ប្រកបដោយក្រមសីលធម៌ទេ។ ការមិនជឿជាក់លើគ្រូពេទ្យក្នុងស្រុកនេះ កំពុងធ្វើឱ្យប្រជាពលរដ្ឋខ្មែរដែលមានជំងឺ តែងនាំគ្នាចាកចេញពីប្រទេសទៅព្យាបាលនៅស្រុកថៃ ឬក៏ទៅប្រទេសវៀតណាម ជាដើម។
ទោះយ៉ាងណា មន្ត្រីក្រសួងសុខាភិបាល នៅតែអះអាងថា គ្មានគ្រូពេទ្យរដ្ឋណាម្នាក់ហ៊ានមិនយកចិត្តទុកដាក់ក្នុងការព្យាបាលប្រជាពលរដ្ឋដែលមានជំងឺដូចការរិះគន់នោះទេ។
រដ្ឋលេខាធិការក្រសួងសុខាភិបាល និងជាប្រធានសមាគមគ្រូពេទ្យកម្ពុជា លោក តែ គុយសៀង មានប្រសាសន៍ថា ការរិះគន់របស់មហាជនលើគ្រូពេទ្យរដ្ឋថា មិនយកចិត្តទុកដាក់ចំពោះការព្យាបាលនោះ គឺមិនត្រឹមត្រូវទេ។ លោកបញ្ជាក់ថា បើទោះបីជាប្រទេសអភិវឌ្ឍន៍ដែលមានសម្ភារៈទំនើបៗសម្រាប់ព្យាបាលក៏ដោយ ក៏នៅតែមានមនុស្សស្លាប់ដដែល។
លោកតែ គុយ សៀង មានប្រសាសន៍ទៀតថា ចំពោះស្ត្រីស្លាប់នៅពេលសម្រាលកូនវិញ គឺកាលពីឆ្នាំ២០១០ មានអត្រាខ្ពស់ ដោយ ៤៦០ លើ ១០ម៉ឺនកំណើត។ ក៏ប៉ុន្តែរយៈពេល ៥ឆ្នាំមកនេះ រដ្ឋាភិបាលបានប្រឹងប្រែងយ៉ាងខ្លាំងដើម្បីកាត់បន្ថយចំនួនមាតាដែលស្លាប់នៅពេលសម្រាកកូនឱ្យចុះមកនៅ ១៦០ លើ ១០ម៉ឺនកំណើត។
ទោះយ៉ាងណាមន្ត្រីក្រសួងសុខាភិបាលរូបនេះសន្យាថា នឹងស្រាវជ្រាវទៅលើករណីស្លាប់របស់ស្ត្រីក្នុងពេលសម្រាលកូននៅខេត្តព្រះវិហារ និងខេត្តឧត្តរមានជ័យ ប្រសិនបើមានបណ្ដឹងធ្លាក់មកដល់ដៃរបស់លោក៖ «ខ្ញុំមិនដឹងថា ចំណុចណាខ្លះដែលប្រជាពលរដ្ឋប្ដឹងទេ ប៉ុន្តែបើសិនជាប្ដឹងយើងមានការស៊ើបអង្កេតហើយ»។
មន្ត្រីក្រសួងសុខាភិបាលពន្យល់ថា ការស្លាប់របស់ម្ដាយនៅពេលសម្រាលកូន ពេលខ្លះមិនអាចបន្ទោសគ្រូពេទ្យបានទាំងអស់ទេ ដូចជាករណីដែលបញ្ជូនអ្នកជំងឺមកមន្ទីរពេទ្យយឺតពេល និងស្ត្រីជាម្ដាយមានអាការៈខុសធម្មតា ដែលក្រុមគ្រួសារមិនធ្លាប់ដឹង ដូចកើតជំងឺឈាមមិនកក ហើយហូរឈាមមិនឈប់ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។