ក្នុងអំឡុងពេញមួយខែកក្កដា ឆ្នាំ២០១៥ នេះ ចំនួនកុមារមានជំងឺធ្ងន់ៗបានចូលសម្រាកព្យាបាលនៅមន្ទីរពេទ្យគន្ធបុប្ផា ច្រើនជាងខែកក្កដា ឆ្នាំ២០១៤ គឺកើនឡើងដល់ទៅ ៣០%។
បញ្ហានេះជាក្ដីកង្វល់ដល់ស្ថិរភាពមន្ទីរពេទ្យដែលកំពុងត្រូវការជំនួយបន្ថែម ដើម្បីឲ្យមន្ទីរពេទ្យនេះអាចបន្តដំណើរការតទៅមុខទៀត សម្រាប់ការងារមនុស្សធម៌ព្យាបាលជំងឺដោយឥតគិតថ្លៃសម្រាប់កុមារក្រីក្រ។
ប្រធាននិងជាស្ថាបនិកនៃមន្ទីរពេទ្យគន្ធបុប្ផា បានអំពាវនាវដល់សហគមន៍អន្តរជាតិ រួមទាំងរដ្ឋាភិបាលប្រទេសស្វីស និងរដ្ឋាភិបាលកម្ពុជា ជាថ្មីទៀត ឲ្យចាប់អារម្មណ៍នៅបណ្ដាឆ្នាំខាងមុខ ស្របពេលដែលលោកអាចនឹងអស់លទ្ធភាពស្វែងរកលុយសម្រាប់ផ្គត់ផ្គង់មន្ទីរពេទ្យនេះ។
ប្រធាននិងជាស្ថាបនិកនៃមន្ទីរពេទ្យគន្ធបុប្ផា លោកវេជ្ជបណ្ឌិត ប៊េត រីច្ឆនឺរ (Beat Richner) បានសរសេរលើទំព័របណ្ដាញសង្គមផ្លូវការរបស់លោកថា ក្នុងខែកក្កដា ឆ្នាំ២០១៥ មានកុមារឈឺធ្ងន់ៗចំនួនជិត ១៤.០០០នាក់ បានចូលសម្រាកក្នុងមន្ទីរពេទ្យ។ ក្នុងករណីកុមារទាំងនោះ មានកុមារឈឺធ្ងន់ធ្ងរដោយជំងឺគ្រុនឈាមជាង ២.០០០នាក់ ដែលកើនជាងខែកក្កដា ឆ្នាំ២០១៤ ដល់ទៅជាង ១ពាន់នាក់ ស្មើជាង ៣០%។
លោកអំពាវនាវថា នេះជារឿងពិត ដែលលោកព្រួយបារម្ភនៅបណ្ដាឆ្នាំខាងមុខដែលនឹងមកដល់ នៅពេលដែលលោកនឹងពុំអាចរកលុយបាន ៨៥% នៃថវិកាទ្រទ្រង់មន្ទីរពេទ្យតទៅទៀតបាន។
វិទ្យុអាស៊ីសេរី មិនអាចទាក់ទងអ្នកនាំពាក្យក្រសួងសុខាភិបាល លោកវេជ្ជបណ្ឌិត លី សូវ៉ាន់ បានទេនៅថ្ងៃទី៤ ខែសីហា ដោយលោកមិនលើកទូរស័ព្ទ។
ពលរដ្ឋរស់នៅសង្កាត់ទួលសង្កែ អ្នកស្រី តាំង សុធា ដែលមានកូនកំពុងព្យាបាលជំងឺនៅមន្ទីរពេទ្យគន្ធបុប្ផា ថ្លែងថា គាត់អរគុណមន្ទីរពេទ្យនេះដែលបានជួយសង្គ្រោះកូនគាត់ស្របពេលដែលអ្នកស្រីពុំមានលទ្ធភាពគ្រប់គ្រាន់យកកូនទៅព្យាបាលនៅមន្ទីរពេទ្យផ្សេង៖ «បារម្ភថា បើសិនជាថ្ងៃក្រោយទៅអត់ អ្នកជំនួយគេត្រូវបិទពេទ្យគន្ធបុប្ផានេះ ប្រជាជនខ្មែរយើងដែលមានកូនតូចៗធ្វើម៉េចទៅ?»។
មន្ទីរពេទ្យគន្ធបុប្ផា ត្រូវបានប្រជាពលរដ្ឋខ្មែរទទួលស្គាល់ថា ជាមន្ទីរពេទ្យដែលយកចិត្តទុកដាក់លើជីវិតកុមារជាធំ និងព្យាបាលជំងឺមានប្រសិទ្ធភាពដោយមិនយកថ្លៃសេវាព្យាបាល។
ជារៀងរាល់ថ្ងៃប្រជាពលរដ្ឋមកពីគ្រប់ទិសទីយកកូនចៅទៅតម្រៀបជាជួរ ដោយចាប់លេខបានចូលសម្រាកព្យាបាល និងយកថ្នាំពីមន្ទីរពេទ្យនេះ។
ក្រៅពីបង្ហាញចំនួនកើនឡើងនៃអ្នកជំងឺទៅរកសេវាព្យាបាលជំងឺនៅក្នុងមន្ទីរពេទ្យនេះ។ កន្លងទៅលោកវេជ្ជបណ្ឌិត ប៊េត រីច្ឆនឺរ ធ្លាប់សរសេររិះគន់នៅលើបណ្ដាញហ្វេសប៊ុក (Facebook) បុករបស់លោកដោយលើកជាសំណួរថា ហេតុអ្វីបានជាពលរដ្ឋកម្ពុជាខ្លះមានខ្លាំងម្ល៉េះ រហូតដល់ទិញរថយន្ត រ៉លរ៉យ និង ប៊ី.អឹម.ដាប់ប៊ែលយូ (Rolls Royce and BMW) នៅខណៈរូបលោកកំពុងព្យាយាមរកប្រាក់ដោយលំបាក ដើម្បីជួយព្យាបាលអ្នកជំងឺកម្ពុជា នៅក្នុងមន្ទីរពេទ្យ។
របាយការណ៍មន្ទីរពេទ្យគន្ធបុប្ផា បានឲ្យដឹងថា នៅខែកក្កដា ឆ្នាំ២០១៥ មានកុមារឈឺជិត ៧ម៉ឺននាក់ បានពិនិត្យព្យាបាលនៅក្នុងផ្នែកពិគ្រោះជំងឺខាងក្រៅ។ មានការវះកាត់ទូទៅជិត ២ម៉ឺននាក់។
ឆ្នាំ២០១៥ ថវិកាចំណាយមន្ទីរពេទ្យមានចំនួន ៤៣លានដុល្លារអាមេរិក។
មន្ទីរពេទ្យគន្ធបុប្ផា បានដំណើរការតាំងពីឆ្នាំ១៩៩២ មក។ រៀងរាល់ឆ្នាំរដ្ឋាភិបាលកម្ពុជា បានផ្ដល់ជំនួយទឹកប្រាក់ចំនួន ២លានដុល្លារ និងរដ្ឋាភិបាលប្រទេសស្វីស (Switzerland) ចំនួន ៣លានដុល្លារក្រៅពីនោះប្រធានមន្ទីរពេទ្យ គឺលោក ប៊េត រីច្ឆនឺរ ជនជាតិស្វីស ជាអ្នកស្វែងរកថវិកាពីសប្បុរសជន តាមរយៈការប្រគំតន្ត្រីសប្បុរសធម៌ផ្ទាល់ខ្លួនរបស់លោកដើម្បីទ្រទ្រង់នូវការចំណាយសម្រាប់មន្ទីរពេទ្យនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។