មន្ត្រីសុខាភិបាលខេត្តមណ្ឌលគិរី អះអាងថា គ្រូពេទ្យ រួមទាំងថ្នាំពេទ្យ នឹងត្រូវបានបញ្ជូនទៅដល់ភូមិស្រែជ្រៃ ឃុំណងឃីលឹក ស្រុកកោះញែក នៅថ្ងៃច័ន្ទ ទី៧ ខែតុលា ដើម្បីព្យាបាលអ្នកភូមិដែលកំពុងមានជំងឺឆ្លងពេញភូមិ។
ប្រធានមន្ទីរសុខាភិបាលខេត្តមណ្ឌលគិរី លោក ប៊ុន សូរ មានប្រសាសន៍បញ្ជាក់ថា គ្រូពេទ្យថ្នាក់ស្រុក និងខេត្ត ចំនួន ៧នាក់ផ្សេងទៀត បានបញ្ជូនទៅកាន់កន្លែងកើតជំងឺនោះហើយ។ លោកបន្តថា ក្រុមមន្ត្រីសុខាភិបាលមិនទាន់វាយតម្លៃជាក់លាក់ពីជំងឺ ដែលឆ្លងរាតត្បាតអ្នកភូមិនោះបានទេ ក៏ប៉ុន្តែ ជំហានដំបូងបានសន្និដ្ឋានថា អាចជាជំងឺគ្រុនផ្តាសសាយធំ។
លោក ប៊ុន សូរ៖ «ខ្ញុំបានបញ្ជូនក្រុមឆ្លើយតបបន្ទាន់ទៅបន្ថែមទៀតហើយ។ ម្សិលមិញ ខ្ញុំបានបញ្ជូនក្រុមឆ្លើយតបបន្ទាន់ចំនួន ៧នាក់ ប៉ុន្តែទៅវាអត់ដល់ វាភ្លៀងណា ទើរនៅភ្នំបាយឆៅ។ ឥឡូវខ្ញុំបញ្ជូនទៅទៀតជាង ១០នាក់ ប៉ុន្តែអត់ទៅតាមឡានខាងមន្ទីរខ្ញុំទេ ព្រោះឡានមន្ទីរវាទាប ខ្ញុំជួលតាក់ស៊ីចេញទៅបាត់ហើយ ហើយរុញទៅតាំងពីព្រឹកនោះ។ ខ្ញុំប្រមូលថ្នាំពីស្រុកកោះញែក អស់ហើយ ឥឡូវនេះខ្ញុំដឹកថ្នាំពីខេត្តទៅទៀតហើយ»។
កាលពីថ្ងៃអាទិត្យ កន្លងទៅ បន្ទាប់ពីមានសេចក្តីរាយការណ៍ថា អ្នកភូមិជាង ៥០០នាក់ មានជំងឺគ្រុនក្តៅ ហៀរសំបោរ ក្អកឆ្លងពីមនុស្សម្នាក់ទៅម្នាក់ ក្នុងចំណោមគ្រួសារប្រជាពលរដ្ឋជាង ១០០គ្រួសារ នៅភូមិស្រែជ្រៃ មក មន្ត្រីសុខាភិបាលស្រុកបានបញ្ជូនគ្រូពេទ្យបន្ទាន់ ពីរនាក់ ទៅកាន់ទីកើតហេតុ ហើយចាប់ផ្ដើមព្យាបាលអ្នកភូមិនៅប៉ុស្តិ៍សុខភាពបានជាង ១០០នាក់ហើយ នៅព្រឹកថ្ងៃច័ន្ទ បានបញ្ជូន បីនាក់បន្ថែមទៀត។
ប្រធានមណ្ឌលសុខភាពស្រុកកោះញែក លោក ស សារ៉ាំ មានប្រសាសន៍បញ្ជាក់ថា ដោយសារស្ថានភាពជំងឺប្រជាពលរដ្ឋមានចំនួនច្រើន ហើយខ្លះមានសភាពធ្ងន់ធ្ងរ និងខ្វះខាតថ្នាំព្យាបាល ទើបលោករាយការណ៍ទៅមន្ត្រីសុខាភិបាលខេត្ត ស្នើសុំគ្រូពេទ្យ និងថ្នាំព្យាបាលបន្ថែម។ លោកបន្តថា ផ្លូវធ្វើដំណើរជួបបញ្ហាលំបាកខ្លាំង រថយន្តត្រូវជាប់ផុងច្រើនកន្លែង ហើយរហូតមកទល់រសៀលម៉ោង ៣ នេះ ក្រុមគ្រូពេទ្យសង្គ្រោះបន្ថែមមិនទាន់ធ្វើដំណើរទៅដល់ភូមិនៅឡើយ៖ «កម្លាំងក្នុងស្រុកទៅដល់ហើយ មានគ្រូពេទ្យ មានគិលានុបដ្ឋាក។ ៥នាក់បានទៅដល់ហ្នឹង នៅតែខ្ញុំទាំងអស់គ្នាហ្នឹង ជួលឡានឈ្នួល ឥឡូវជាប់ឥឡូវកំពុងគាស់ដីវាលិចជួយទាញ»។
ប្រធានភូមិស្រែជ្រៃ លោក ឯម សារឿន មានប្រសាសន៍បញ្ជាក់ថា នេះគឺជាលើកទីមួយហើយ ដែលអ្នកភូមិរងការរាតត្បាតដោយសារជំងឺនេះ។ លោកបន្តថា អ្នកភូមិប្រមាណ ១៥% បានធូរស្រាលខ្លះ បន្ទាប់ពីគ្រូពេទ្យមណ្ឌលសុខភាពស្រុកបានព្យាបាលកាលពីថ្ងៃអាទិត្យ៖ «អ្នកខ្លះដាក់ទៅនៅដដែលៗ ខាងវេជ្ជបញ្ជាហ្នឹង គាត់កំពុងវិនិច្ឆ័យមេរោគហ្នឹងទៀត។ នៅភាគច្រើន អ្នកខ្លះមិនទាន់បានមកម្សិលមិញថា ខ្វះខាតថ្នាំក៏គាត់បកទៅវិញ ថ្ងៃនេះក៏ខ្ញុំផ្តល់ព័ត៌មានឲ្យមកវិញ។ បាទ! ប្រើថ្នាំគ្រាប់ខ្លះថ្នាំចាក់ខ្លះ ប៉ុន្តែខ្ញុំមិនដឹងថ្នាំអ្វី»។
របាយការណ៍របស់មន្ត្រីសុខាភិបាលស្រុក ឲ្យដឹងថា គ្រូពេទ្យស្រុកចំនួន ៥នាក់ កំពុងព្យាបាលប្រជាពលរដ្ឋមានជំងឺរាតត្បាតនៅថ្ងៃច័ន្ទ នេះ។ ចំណែកតួលេខបណ្ដោះអាសន្នរហូតមកទល់នឹងរសៀលថ្ងៃដដែលនេះ អ្នកភូមិប្រមាណជាង ៣៤០នាក់ បានទទួលការព្យាបាលជំងឺឆ្លងរាតត្បាតនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។