អ្នកឯកទេសខាងភ្នែក គឺលោកវេជ្ជបណ្ឌិត កាក់ កក្កដា ថ្លែងឱ្យដឹងថា ការពិនិត្យ ព្យាបាលជំងឺភ្នែក ដោយឥតបង់ថ្លៃរយៈពេល ៥ថ្ងៃនេះ នឹងធ្វើឡើងនៅមន្ទីរបង្អែកស្រុកស្ទោង ខេត្តកំពង់ធំ។
លោកបញ្ជាក់ថា ក្នុងកម្មវិធីពិនិត្យនិងព្យាបាលនេះ មិនមានការកំណត់ចំនួន ឬប្រភេទជំងឺទេ៖ «ជំងឺ គឺនៅពេលដែលយើងពិនិត្យ រាល់អ្នកមានបញ្ហាភ្នែក យើងពិនិត្យទាំងអស់។ ប៉ុន្តែជំងឺភ្នែកដែលយើងត្រូវវះ ជាចម្បង គឺវះកាត់ជំងឺភ្នែកឡើងបាយ និងជំងឺកន្ទុយថ្លែន ពីរគឺចម្បងជាងគេ។ ការកំណត់ គឺមិនកំណត់ចំនួនទេ តែតាមពេលវេលាម៉ោង ដែលយើងបានដាក់ត្រឹមម៉ោង ៥ល្ងាច យើងធ្វើពីព្រឹកដល់ម៉ោង ៥ល្ងាច គឺយើងឈប់ ហើយជំងឺដែលនៅសល់ យើងបន្តធ្វើទៅថ្ងៃស្អែកទៀត រហូតដល់សុក្រ»។
លោកឱ្យដឹងកម្មវិធីផ្ដល់សេវាពិនិត្យ ព្យាបាល និងវះកាត់ជំងឺភ្នែក ដោយឥតបង់ថ្លៃ នៅខេត្តកំពង់ធំ គឺមាន ២លើក ក្នុងមួយឆ្នាំ ដោយមានកិច្ចសហការ និងគាំទ្រសម្ភារៈពីមូលនិធិអន្តរជាតិមួយ ឈ្មោះ ហ្វ្រេដ ហូឡូ (Fred Hollows Foundation)។ កម្មវិធីផ្ដល់សេវាពិនិត្យ ព្យាបាល នឹងចាប់ផ្ដើមពីម៉ោង ៧ ព្រឹកដល់ម៉ោង ៥ ល្ងាច។
ដោយឡែក នៅឯមន្ទីរបង្អែកខេត្តកំពង់ស្ពឺ ក្នុងចន្លោះពីថ្ងៃទី២១ ដល់ ២៥ ខែតុលា នេះ អង្គការមនុស្សធម៌មួយ នៅប្រទេសអូស្ត្រាលី ឈ្មោះថា ខេមបូឌា វីហ្សិន (Cambodian Vision) ក៏នឹងផ្ដល់ការពិនិត្យព្យាបាល និងវះកាត់ជំងឺភ្នែកឡើងបាយដោយឥតបង់ថ្លៃដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។