ថ្ងៃ១៤ ខែមិថុនា ត្រូវបានគេចាត់ទុកជាទិវានៃអ្នកបរិច្ចាគឈាមពិភពលោក។ មិនតែប៉ុណ្ណោះ ថ្ងៃ១៤ មិថុនា ឆ្នាំ២០១៦ សម្រាប់កម្ពុជា ក៏បានក្លាយជាព្រឹត្តិការណ៍ប្រវត្តិសាស្ត្រមួយរបស់មជ្ឈមណ្ឌលជាតិផ្ដល់ឈាមនៃក្រសួងសុខាភិបាល ដែលបានសម្ពោធអគារថ្មីរបស់ខ្លួនផងដែរ។
លោកវេជ្ជបណ្ឌិត ហុក គីមចេង ប្រធានមជ្ឈមណ្ឌលជាតិផ្ដល់ឈាមអះអាងថា ទាំងអគារថ្មី និងសម្ភារៈបរិក្ខារនៅពេលនេះ ប្រកបដោយស្តង់ដារអន្តរជាតិ ហើយរាល់ចំណាយទាំងអស់ជាអំណោយពីរដ្ឋាភិបាលអាមេរិក។ ឯកអគ្គរដ្ឋទូតសហរដ្ឋអាមេរិក ប្រចាំនៅកម្ពុជា លោក វីល្លៀម ហៃដ្ដ៍ (William Heidt) បានបញ្ជាក់ថា អគារផ្តល់ឈាមថ្មីនេះ ក៏ជាចំណងអគារប្រវត្តិសាស្ត្រមួយរវាងកម្ពុជា និងសហរដ្ឋអាមេរិក ផងដែរ។
ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា វីល្លៀម ហៃដ្ដ៍ បញ្ជាក់ថា នេះមិនមែនជាអគារផ្ដល់ឈាមទី១ ដែលអាមេរិក ផ្ដល់មកកម្ពុជា នោះទេ។ រដ្ឋាភិបាលអាមេរិក បានផ្ដល់ជំនួយជាអគារផ្ដល់ឈាមខេត្តនៅខេត្តកំពង់ចាម និងខេត្តសៀមរាប សម្ពោធអោយប្រើប្រាស់កាលពីដើមឆ្នាំ២០១៦ កន្លងទៅថ្មីៗនេះ ហើយឆាប់ៗខាងមុខនេះដែរ អគារផ្ដល់ឈាមខេត្តចំនួនពីរទៀត គ្រោងនឹងលេចជារូបរាង គឺខេត្តបាត់ដំបង និងខេត្តតាកែវ៖ «យើងទាំងអស់គ្នាយើងសង្ឃឹមថា នឹងជួយកម្ពុជា ទាំងផ្នែកសាងសង់អគារ និងផ្នែកប្រព័ន្ធបច្ចេកទេសដើម្បីបង្កើតប្រព័ន្ធផ្ដល់ឈាមថ្នាក់ ជាតិមួយ»។
បុរសវ័យជាង ៥០ឆ្នាំ សក់ល្បាយអាចម៍ខ្លា លោកវេជ្ជបណ្ឌិត ហុក គីមចេង ដែលគេស្គាល់ថា ជាប្រធានមជ្ឈមណ្ឌលជាតិផ្ដល់ឈាមនោះ បានអះអាងអោយវិទ្យុអាស៊ីសេរី ដឹងនៅព្រឹកថ្ងៃ១៤ ខែមិថុនា ថា បើទោះជាមានអគារផ្ដល់ឈាម និងសម្ភារៈបរិក្ខារបច្ចេកទេសថ្មី ប្រកបដោយស្តង់ដារយ៉ាងណាក៏ដោយ ប្រសិនបើមិនការចូលរួមពីប្រជាជនក្នុងការបរិច្ចាគឈាមដោយស្ម័គ្រចិត្តទេនោះ ក្ដីសង្ឃឹមថានឹងបានអាចធានានូវការផ្គត់ផ្គង់ឈាមប្រកបដោយនិរន្តរភាពនោះ នឹងក្លាយជាអាសាបង់មិនខាន៖ «ទោះបីជាយ៉ាងណាក៏ដោយ យើងត្រូវការអំណោយឈាមដោយស្ម័គ្រចិត្ត និងមិនគិតកម្រៃពីក្នុងចំណោមប្រជាជនយើង ទើបយើងអាចធានានូវការផ្គត់ផ្គង់ឈាមហ្នឹង មានសុវត្ថិភាពគ្រប់គ្រាន់ គ្រប់ពេលវេលា និងគ្រប់ទីកន្លែង»។
អត្រាអំណោយឈាមក្នុងចំណោមប្រជាជនកម្ពុជា ១.០០០នាក់ គឺមានត្រឹម ៤នាក់ប៉ុណ្ណោះ។ បើតាមអង្គការសុខភាពពិភពលោក គឺត្រូវមានយ៉ាងតិច ១០នាក់ ក្នុងចំណោមមនុស្ស ១.០០០នាក់ គឺស្នើនឹង ១ភាគរយ នៃប្រជាជនកម្ពុជា ទើបអាចធានានូវការផ្គត់ផ្គង់គ្រប់គ្រាន់បានទាំងឈាម និងសមាសភាពឈាម។
ឆ្លើយតបទៅនឹងតម្រូវការនៃការផ្គត់ផ្គង់ឈាមក្នុងការជួយសង្គ្រោះអ្នកជំងឺជារៀងរាល់ថ្ងៃ កូនប្រុសរបស់នាយករដ្ឋមន្ត្រី គឺលោក ហ៊ុន ម៉ានី ដែលបច្ចុប្បន្នជាប្រធានសហភាពសហព័ន្ធយុវជនកម្ពុជា ហៅកាត់ថា ស.ស.យ.ក បានអោយវិទ្យុអាស៊ីសេរី ដឹងថា ស.ស.យ.ក របស់លោកកន្លងមកបានចូលរួមសហការបង្កើតស្នាដៃក្នុងយុទ្ធនាការផ្ដល់ឈាម ១.០០០លីត្រ ដល់មជ្ឈមណ្ឌលជាតិផ្ដល់ឈាម។
ទោះជាយ៉ាងណា ក្រោយយុទ្ធនាការផ្ដល់ឈាម ១.០០០លីត្រ រួចនៅចុងឆ្នាំ២០១៤ ស.ស.យ.ក មិនទាន់មានជាគម្រោងថ្មីអោយជាក់លាក់នៅឡើយដើម្បីលើកទឹកចិត្តមហាជនអោយស្ម័គ្រចិត្តផ្ដល់ឈាម៖ «ទៅថ្ងៃអនាគត ពេលនេះមិនទាន់អាចនិយាយបាន ប៉ុន្តែឆ្លងតាមបទពិសោធន៍យុទ្ធនាការ ១.០០០លីត្រ គឺសហភាពសហព័ន្ធយុវជនកម្ពុជា ពិភាក្សាជាមួយដៃគូដទៃទៀតនឹងបង្កើតជាអ្វីមួយដែលនឹងប្រកាសនៅពេល ក្រោយ»។
តាមទិន្នន័យរបស់មជ្ឈមណ្ឌលជាតិផ្ដល់ឈាមក្នុងឆ្នាំ២០១៥ អំណោយឈាមដែលទទួលបាននៅទូទាំងប្រទេសមានចំនួន ៥.៤៧៩ស្បោង ហើយឈាម និងសមាសភាពឈាមបានប្រើប្រាស់មានចំនួន ៥០.៨៨១ស្បោង។
មជ្ឈមណ្ឌលជាតិផ្ដល់ឈាមនៅរាជធានីភ្នំពេញ បែងចែកឈាមប្រមាណជាង ៦១% នៃចំនួនឈាមផ្គត់ផ្គង់ទាំងអស់នៅទូទាំងប្រទេស ដោយសារត្រូវផ្គត់ផ្គង់ដល់គ្រប់មន្ទីរពេទ្យថ្នាក់ជាតិធំៗ និងមន្ទីរពេទ្យឯកជនទាំងអស់។
ជាសប្បុរសជនស្ម័គ្រចិត្តបរិច្ចាគឈាមមួយរូប លោក អ៊ុំ វណ្ណៈ បានអោយដឹងថា លោកចូលរួមបរិច្ចាគឈាម ព្រោះលោកជឿជាក់ថា មានអ្នកជំងឺជាច្រើនដែលកំពុងតែត្រូវការឈាម ដើម្បីរស់ ហើយការបរិច្ចាគឈាម វាពិតជាមានតម្លៃលើសពីការផ្ដល់អំណោយផ្សេងៗ៖ «ខ្ញុំបរិច្ចាគឈាម ដោយសារតែខ្ញុំចង់ជួយមនុស្សទូទៅនៅក្នុងស្រុកខ្មែរយើងហ្នឹង ហើយដោយសារតែខ្ញុំបានដឹងថា ពីរឿងនៃការបរិច្ចាគឈាមហ្នឹង គឺវាមានប្រយោជន៍ជាងការដែលយើងយកលុយបរិច្ចាគក្នុងកម្មវិធី មនុស្សធម៌ទៀត ព្រោះថា យើងមិនចាំបាច់បង់ជាទឹកប្រាក់ទេ គ្រាន់តែបរិច្ចាគអ្វីដែលចេញពីខ្លួនយើងផ្ទាល់»។
អគារមជ្ឈមណ្ឌលជាតិផ្ដល់ឈាមបានប្ដូរទីតាំងពីនៅមន្ទីរពេទ្យព្រះអង្គឌួង មកអគារថ្មី ដែលស្ថិតបរិវេណនៃមន្ទីរពេទ្យមិត្តភាពខ្មែរ-សូវៀត នេះ ដែលមានកម្ពស់ ២ជាន់ សម្រាប់ធានានូវដំណើរការរបស់មជ្ឈមណ្ឌលជាតិផ្ដល់ឈាម ដែលក្នុងនោះមានបន្ទប់រង់ចាំ ១បន្ទប់ ពិនិត្យសុខភាពចំនួន ៥បន្ទប់ សម្រាប់ទទួលអំណោយឈាម១ ដែលមានកន្លែងទទួលអំណោយឈាមចំនួន ១៥កន្លែងមន្ទីរពិសោធន៍ចំនួន ២ធំៗ មានកន្លែងថែរក្សាទុកឈាម និងសមាសភាពឈាមបានរាប់ពាន់ស្បោង កន្លែងផលិតផលិតផលឈាមឃ្លាំងទុកសម្ភារៈសំខាន់ៗ និងបំពាក់បរិក្ខារពេទ្យមួយចំនួនដែលជាម៉ាស៊ីនស្វ័យប្រវត្តិទំនើបចំនួន ៣គ្រឿង សម្រាប់បម្រើដល់ការធ្វើស្តេតរកមេរោគឆ្លង និងការស្រាវជ្រាវរកគ្រប់ប្រព័ន្ធក្រុមឈាម។ អគារនេះចំណាយថវិកាជាង ១,៨លានដុល្លារអាមេរិក និងរយៈពេលជាង ១ឆ្នាំកន្លះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។