អ្នកឃ្លាំមើលការអភិវឌ្ឍសង្គម និងសាធារណជន គាំទ្រសកម្មភាពចុះបង្ក្រាបបទល្មើសគ្រឿងញៀនរបស់កម្លាំងសមត្ថកិច្ចជំនាញស្ថាប័នពាក់ព័ន្ធខេត្តព្រះសីហនុ ទទួលបានលទ្ធផលល្អកាលពីឆ្នាំ២០១៦ កន្លងទៅ។
ពួកគេសំណូមពរឲ្យសមត្ថកិច្ចជំនាញ ត្រូវបន្តយុទ្ធនាការចុះបង្ក្រាបបទល្មើសគ្រឿងញៀននេះឲ្យបានជាប្រចាំ និងស្នើឲ្យរដ្ឋាភិបាលជួយផ្តល់កញ្ចប់ថវិកាលើកទឹកចិត្តដល់កងកម្លាំងសមត្ថកិច្ចជំនាញ សម្រាប់បំពេញបេសកកម្មនេះឲ្យបានច្រើនថែមទៀត។
មន្ត្រីសង្គមមួយចំនួននាខេត្តព្រះសីហនុ សរសើរចំពោះសកម្មភាពរបស់កម្លាំងសមត្ថកិច្ចកងរាជអាវុធហត្ថ និងនគរបាល ក្នុងការងារចុះបង្ក្រាបបទល្មើសគ្រឿងញៀន ដែលបានចាប់ឃាត់ខ្លួនជនសង្ស័យ ឬជនល្មើសគ្រឿងញៀនរាប់រយនាក់ បញ្ជូនទៅកាន់តុលាការផ្ដន្ទាទោសកាលពីឆ្នាំ២០១៦។
អ្នកសម្របសម្រួលអង្គការលីកាដូ (LICADHO) ប្រចាំខេត្តព្រះសីហនុ លោក ប៊ួន ណារិទ្ធិ បានកត់សម្គាល់ថា បញ្ហាគ្រឿងញៀននៅតែបន្តធ្វើសកម្មភាពជាបន្តបន្ទាប់នៅមូលដ្ឋានខេត្តទេសចរណ៍ជាប់ឆ្នេរសមុទ្រមួយនេះ ទោះបីកម្លាំងសមត្ថកិច្ចកងរាជអាវុធហត្ថ និងកម្លាំងនគរបាលខេត្តនេះ ចាប់បានជនល្មើសរាប់រយនាក់បែបណាក្តី។
មន្ត្រីឃ្លាំមើលសង្គមរូបនេះ ស្នើដល់រដ្ឋាភិបាលឲ្យទម្លាក់ថវិកាឲ្យបានច្រើនមកដល់កម្លាំងជំនាញនៅតាមមូលដ្ឋាននានា ក្នុងបេសកកម្មចុះបង្ក្រាបបទល្មើសគ្រឿងញៀនកាន់តែមានប្រសិទ្ធភាព និងកម្លាំងសមត្ថកិច្ចមានទឹកចិត្តចុះបំពេញការងាររបស់ខ្លួន៖ « កន្លងមកយើងបានឮការត្អូញត្អែរពីកម្លាំងសមត្ថកិច្ចមួយចំនួនថា ការចុះបង្ក្រាបបទល្មើសគ្រឿងញៀន ពួកគេខ្វះថវិកា និងពេលវេលាក្នុងការចុះបង្ក្រាប។ ពេលខ្លះគាត់និយាយថា បានចំណាយថវិកាផ្ទាល់ខ្លួនក្នុងការបង្ក្រាបបទល្មើសផ្សេងៗ។ ហេតុនេះ ស្នើដល់ក្រសួងការពារជាតិ ក៏ដូចជាក្រសួងមហាផ្ទៃ សូមមេត្តាផ្តល់ការលើកទឹកចិត្ត ឬប្រាក់រង្វាន់ និងប្រាក់សម្រាប់ការចុះប្រតិបត្តិការសម្រាប់បង្ក្រាបគ្រឿងញៀនដល់កម្លាំងសមត្ថកិច្ចយើងនៅថ្នាក់ក្រោមឲ្យបានគ្រប់គ្រាន់ » ។
របាយការណ៍របស់ការិយាល័យបង្ក្រាបបទល្មើសគ្រឿងញៀននៃស្នងការដ្ឋាននគរបាលខេត្តព្រះសីហនុ ឆ្នាំ២០១៦ បង្ហាញថា ចាប់ពីខែមករា ដល់ខែធ្នូ សមត្ថកិច្ចស្ថាប័ននេះបើកយុទ្ធនាការចុះបង្ក្រាបបទល្មើសនេះបានចំនួន ៨៥ករណីក្នុង ១៥២មុខសញ្ញា និងមានស្ត្រីចំនួន ២៣នាក់បញ្ជូនទៅកាន់តុលាការផ្ដន្ទាទោស។
ករណីជួញដូរ និងចែកចាយគ្រឿងញៀនមានចំនួន ៦៣ករណី ឃាត់ខ្លួនជនសង្ស័យ ១៥២នាក់ មានស្ត្រី ២១នាក់។ ករណីរក្សាទុកសារធាតុញៀន និងការដឹកជញ្ជូនមាន ១៥ករណី ឃាត់ខ្លួនជនសង្ស័យ ២៣នាក់ មានស្ត្រី ១នាក់។ ករណីប្រើប្រាស់គ្រឿងញៀនមានចំនួន ១៧ករណី មានស្ត្រី ១នាក់។
ត្រង់ចំណុចនេះ លោក ប៊ួន ណារិទ្ធិ អ្នកសម្របសម្រួលអង្គការលីកាដូ ប្រចាំខេត្តព្រះសីហនុ បានស្នើដល់ស្ថាប័នតុលាការ ត្រូវផ្ដន្ទាទោសជនប្រព្រឹត្តិបទល្មើសគ្រឿងញៀនឲ្យបានធ្ងន់ធ្ងរ និងមិនត្រូវឲ្យមានការធានាជនល្មើសគ្រឿងញៀន បានរស់នៅក្រៅពន្ធនាគារនោះទេ។
អ្នកឃ្លាំមើលសង្គមរូបនេះ បង្ហាញការព្រួយបារម្ភអំពីសន្តិសុខសុវត្ថិភាពរបស់ក្រុមយុវជន ឬកូនចៅជំនាន់ក្រោយ ដែលអាចរងផលប៉ះពាល់ធ្ងន់ធ្ងរពីការធ្វើចរាចរណ៍គ្រឿងញៀន ដែលបច្ចុប្បន្នបានធ្វើសកម្មភាពពីទីប្រជុំជនរហូតដល់មូលដ្ឋានឃុំ-សង្កាត់នានា បើសមត្ថកិច្ចទប់ស្កាត់មិនមានប្រសិទ្ធភាព៖ « ខ្ញុំគាំទ្រដល់ផែនការយុទ្ធសាស្ត្ររបស់រដ្ឋាភិបាល ដែលសម្ដេចនាយករដ្ឋមន្ត្រីលោករៀបចំឲ្យមានប្រតិបត្តិការបង្ក្រាបគ្រឿងញៀនទូទាំងប្រទេស ដើម្បីប្រមូលជនប្រើប្រាស់គ្រឿងញៀនយកមកបន្សាបគ្រឿងញៀន និងចាប់មេខ្លោងគ្រឿងញៀនយកទៅផ្ដន្ទាទោសទៅតាមច្បាប់។ ដូច្នេះ ខ្ញុំសំណូមពរថា នៅខេត្តព្រះសីហនុ យើង គឺនៅមានអ្នកប្រើប្រាស់គ្រឿងញៀន និងជួញដូរគ្រឿងញៀននៅមានចំនួនច្រើនណាស់។ សូមសំណូមពរដល់កម្លាំងសមត្ថកិច្ច ក៏ដូចជាក្រសួងការពារជាតិ និងស្ថាប័នក្រសួងយុត្តិធម៌ ជាដើម មេត្តាជួយសហការគ្នាដើម្បីបង្ក្រាបបទល្មើសគ្រឿងញៀនបន្តទៅទៀត » ។
ស្នងការរងនគរបាលខេត្តព្រះសីហនុ លោក ស៊ុន សុផាត ថ្លែងថា បទល្មើសគ្រឿងញៀន កម្លាំងជំនាញនគរបាលស្ថាប័ននេះនៅតែបន្តចុះស្រាវជ្រាវរកមេខ្លោងផលិត និងចែកចាយទាំងនៅទីប្រជុំជន និងនៅទីជនបទជារៀងរាល់ថ្ងៃ។
លោកស្នើដល់ប្រជាពលរដ្ឋនៅតាមមូលដ្ឋាននានា ត្រូវសហការផ្តល់ព័ត៌មានមកកម្លាំងសមត្ថកិច្ចឲ្យបានឆាប់ បើសង្ស័យទីតាំងណាមួយ ឬស្គាល់អត្តសញ្ញាណរបស់ជនល្មើសលួចផលិត ឬជួញដូរគ្រឿងញៀន ធ្វើសកម្មភាពនៅតាមមូលដ្ឋានរបស់ខ្លួន ដើម្បីឈានដល់សមត្ថកិច្ចចុះស្រាវជ្រាវ និងបង្ក្រាបឲ្យមានប្រសិទ្ធភាព។
លោក ស៊ុន សុផាត ដែលជាប្រធានការិយាល័យកណ្ដាលប្រឆាំងបទល្មើសផងនោះ បានរំឭកទៅដល់ក្រុមយុវជន ត្រូវងាកឲ្យឆ្ងាយពីគ្រឿងញៀនដើម្បីលើកស្ទួយអនាគតនៅតាមក្រុមគ្រួសារនីមួយៗ មានសុភមង្គលរុងរឿង និងរួមចំណែកឲ្យផែនការអភិវឌ្ឍន៍ប្រទេសជាតិជាមួយរដ្ឋាភិបាល ឲ្យកាន់តែរីកចម្រើនថែមទៀត៖ « សូមផ្ដាំផ្ញើទៅប្រជាពលរដ្ឋនៅខេត្តព្រះសីហនុ និងទូទាំងប្រទេសកម្ពុជា ទាំងមូល សូមចូលរួមសហការជាមួយកម្លាំងសមត្ថកិច្ចក្នុងការងារបង្ក្រាបបទល្មើសគ្រឿងញៀន ចូលរួមចំណែកអភិវឌ្ឍប្រទេសឲ្យបានរីកចម្រើនជាមួយរដ្ឋាភិបាល ធ្វើយ៉ាងណាបង្ក្រាបគ្រឿងញៀនពីកម្ពុជា ឲ្យអស់។ សូម្បីតែការចែកចាយ ការផលិត ការជួញដូរ និងការប្រើប្រាស់គ្រឿងញៀនជាដើមឲ្យបានជាស្ថាពរនៅកម្ពុជា នាថ្ងៃខាងមុខ » ។
អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ អ្នកស្រី ជៀប សុធារី ចង់ឃើញកម្លាំងនគរបាល និងកម្លាំងស្ថាប័នជំនាញពាក់ព័ន្ធដទៃទៀត រួមសហការគ្នាចុះបង្ក្រាបបទល្មើសគ្រឿងញៀន និងល្បែងស៊ីសងគ្រប់ប្រភេទ ដែលធ្វើសកម្មភាពយូរឆ្នាំនៅមូលដ្ឋាននេះឲ្យបានខ្លាំងក្លាថែមទៀតនាថ្ងៃខាងមុខ។
អ្នកស្រីកត់សម្គាល់ថា បទល្មើសទាំងនេះ ជនប្រព្រឹត្តិល្មើសហាក់មិនញញើតកម្លាំងសមត្ថកិច្ចមូលដ្ឋាននោះទេ ហើយក៏ធ្លាប់មានលេចឮព័ត៌មានមកថា មានបុគ្គលជាសមត្ថកិច្ចនៅតាមស្ថាប័នជំនាញខ្លះ មានជាប់ពាក់ព័ន្ធ ឬនៅពីក្រោយបទល្មើសទាំងនេះថែមទៀត៖ « ខ្ញុំតែងតែបានទទួលព័ត៌មានមិនផ្លូវការមកថា នៅទីកន្លែងណាក៏ដោយ ការជួញដូរគ្រឿងញៀននេះ តែងតែមានអ្នកនៅពីក្រោយជាមនុស្សដែលមានសិទ្ធិអំណាច មានឋានៈធំៗ ដែលយើងពិបាកក្នុងការស្វែងរកចាប់ខ្លួនជនល្មើស។ ដូច្នេះខ្ញុំគិតថា ការធ្វើចរាចរណ៍ ឬការជួញដូរគ្រឿងញៀននេះ បើមិនមានការគាំទ្រ ឬមិនមានការជួយធ្វើជាខ្នងបង្អែកពីអ្នកមានអំណាច ពីមន្ត្រីធំៗទេ គឺការធ្វើចរាចរណ៍គ្រឿងញៀនមិនអាចមានសកម្មភាពនៅកម្ពុជា បានទេ » ។
អ្នកស្រី សុធារី ស្នើដល់ស្ថាប័នកងរាជអាវុធហត្ថ និងកម្លាំងនគរបាលនៅទូទាំងខេត្តព្រះសីហនុ ឲ្យត្រួតពិនិត្យកម្លាំងជំនាញរបស់ខ្លួន តាមរយៈការធ្វើតេស្ដរកសារធាតុញៀនទៅលើកងកម្លាំងម្នាក់ៗ ដើម្បីឲ្យប្រាកដថា កម្លាំងសមត្ថកិច្ចទាំងនោះមិនជាប់ពាក់ព័ន្ធបទល្មើសគ្រឿងញៀន ទើបយុទ្ធនាការបង្ក្រាបបទល្មើសនេះមានប្រសិទ្ធភាពបានយូរអង្វែង។
អ្នកសម្របសម្រួលសមាគមអាដហុក អ្នកស្រី សុធារី គាំទ្រការប្រកាសផ្តល់រង្វាន់លើកទឹកចិត្ត ឬការដំឡើងឋានៈរបស់ថ្នាក់ដឹកនាំថ្នាក់ជាតិ ពិសេសរដ្ឋាភិបាល ទៅដល់កម្លាំងជំនាញស្ថាប័នពាក់ព័ន្ធទាំងឡាយណាដែលមានស្នាដៃ ក្នុងការងារចុះបង្ក្រាបបទល្មើសផ្សេងៗ មានបទល្មើសគ្រឿងញៀនជាដើម ទទួលបានលទ្ធផល ឬមានស្នាដៃល្អ៖ « សារធាតុសម្រាប់ផលិតគ្រឿងញៀននេះ មិនមែនកើតមាននៅស្រុកខ្មែរទេ។ ស្រុកខ្មែរយើងមិនមានសារធាតុដើមសម្រាប់ផលិតគ្រឿងញៀននេះទេ គឺភាគច្រើនបានឆ្លងកាត់ ឬនាំចូលពីក្រៅប្រទេស។ អ៊ីចឹងចង់សួរថា ការឆ្លងកាត់សារធាតុដើមសម្រាប់ផលិតគ្រឿងញៀនពីក្រៅប្រទេសហ្នឹង តើឆ្លងកាត់ដោយរបៀបណា ? ព្រោះកម្លាំងសមត្ថកិច្ចយើងបានដាក់ពង្រាយគ្រប់ច្រកល្ហកទាំងអស់ ប៉ុន្តែហេតុអ្វីបានជាសារធាតុហ្នឹងអាចមានការនាំចូល ឬហូរចូលមកកម្ពុជា បាន។ អ៊ីចឹងខ្ញុំចង់និយាយថា សុំឲ្យមានការរឹតបន្តឹង ឬស៊ើបអង្កេតឲ្យបានស៊ីជម្រៅជាងរាល់ថ្ងៃហ្នឹងទៀត ដើម្បីរកឲ្យឃើញនូវមេខ្លោងធំៗទាំងអស់ហ្នឹងយកមកផ្ដន្ទាទោស » ។
យ៉ាងនេះក្តី អ្នកឃ្លាំមើលការអភិវឌ្ឍសង្គម និងសាធារណជន បានកត់ស្គាល់ថា កាលពីឆ្នាំ២០១៦ កន្លងទៅ សមត្ថកិច្ចនគរបាល និងកងរាជអាវុធហត្ថខេត្តព្រះសីហនុ បានសហការបង្ក្រាបបទល្មើសគ្រឿងញៀន និងបទល្មើសព្រហ្មទណ្ឌផ្សេងៗទទួលបានលទ្ធផលវិជ្ជមានជាច្រើនករណី និងបានចាប់បញ្ជូនជនប្រព្រឹត្តិល្មើសទៅកាន់តុលាការផ្ដន្ទាទោសរាប់រយករណី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។