មន្ត្រីក្រសួងសុខាភិបាល និងអង្គការដៃគូពាក់ព័ន្ធ រួមគ្នាប្ដេជ្ញាលុបបំបាត់ជំងឺគ្រុនចាញ់ ឲ្យបានជាស្ថាពរត្រឹមឆ្នាំ២០២៥។ ការអះអាងនេះ ធ្វើឡើងនៅក្នុងសិក្ខាសាលាផ្សព្វផ្សាយលទ្ធផល នៃការផលិតកម្មវិធីវិទ្យុអប់រំជំងឺគ្រុនចាញ់ របស់គម្រោងប្រយុទ្ធនឹងជំងឺគ្រុនចាញ់ (CAP-Malaria) ឆ្នាំ២០១៣-២០១៤ ក្នុងរាជធានីភ្នំពេញ។
អង្គការសកម្មភាពដើម្បីការអប់រំ និងអភិវឌ្ឍន៍ ហៅកាត់ថា មេឌៀវ័ន (Media One) បើកសិក្ខាសាលាផ្សព្វផ្សាយអំពីលទ្ធផល នៃសកម្មភាពផលិត និងផ្សព្វផ្សាយកម្មវិធីវិទ្យុ ក្រោមប្រធានបទ "ខ្ញុំបារម្ភពីសុខភាព" ដែលចាប់ផ្តើមដំណើរការពីខែកក្កដា ឆ្នាំ២០១៣ ដល់ខែមីនា ឆ្នាំ២០១៤។
លោក កយ បូរី នាយកប្រតិបត្តិអង្គការមេឌៀវ័ន ឲ្យដឹងក្នុងសិក្ខាសាលាព្រឹកថ្ងៃពុធ ទី១១ ខែមិថុនា ថា ការបង្កើតកម្មវិធីវិទ្យុ "ខ្ញុំបារម្ភពីសុខភាព" មានគោលបំណងបង្កើនការយល់ដឹងពីវិធីបង្ការ និងព្យាបាលជំងឺគ្រុនចាញ់ ជូនពលរដ្ឋឲ្យមានប្រសិទ្ធភាពខ្ពស់។ លោកថា កម្មវិធីនេះចាក់ផ្សាយនៅតាមស្ថានីយវិទ្យុបាយ័ន FM 95 Mhz នៅភ្នំពេញ វិទ្យុជាតិចម្ការចេក FM 92.70 Mhz ខេត្តបាត់ដំបង និងវិទ្យុអង្គររដ្ឋា FM 95.5 Mhz នៅសៀមរាប។
លោក កយ បូរី បន្តថា ការផលិតកម្មវិធីវិទ្យុ "ខ្ញុំបារម្ភពីសុខភាព" ជាការរួមចំណែកជាមួយក្រសួងសុខាភិបាល ឬរដ្ឋាភិបាល ឈានទៅសម្រេចឲ្យបានតាមគោលការណ៍ថ្នាក់ជាតិ លុបបំបាត់ជំងឺគ្រុនចាញ់ក្នុងប្រទេសកម្ពុជា នាឆ្នាំ២០២៥។ លោកអះអាងថា តាមរយៈការផលិតកម្មវិធី "ខ្ញុំបារម្ភពីសុខភាព" បានបង្កើនចំណេះដឹងដល់ពលរដ្ឋ ដែលប្រឈមនឹងជំងឺគ្រុនចាញ់ ជាពិសេសពលរដ្ឋចំណាកស្រុកទៅរកការងារធ្វើតាមខេត្តជាប់ព្រំដែនកម្ពុជាថៃ៖ «ជនចំណាកស្រុកកាលពីមុន អត់បានទទួលព័ត៌មានច្រើន ហើយគាត់មិនសូវខ្វល់ខ្វាយទេ ហើយទៅដល់កន្លែងហ្នឹង គាត់ខ្វល់សំខាន់បំផុតគិតតែពីរកលុយ។ ប៉ុន្តែឥឡូវនេះ គាត់ទទួលបានចំណេះដឹងបានច្រើន ព្រោះយើងព្យាយាមរុញព័ត៌មានទៅដល់គាត់បានច្រើន។ យើងព្យាយាមរកវិធីយ៉ាងម៉េច ដើម្បីហៅគាត់មកអប់រំផង និងរុញព័ត៌មានដល់គាត់ផង។ ហើយទីបំផុត យើងរកឃើញថា គាត់អាចផ្លាស់ប្ដូរឥរិយាបថរបស់គាត់បានច្រើន»។
លោកវេជ្ជបណ្ឌិត ឃាង សូយទី ប្រធានគម្រោងប្រយុទ្ធជំងឺគ្រុនចាញ់ (Cap-Malaria) ដែលផ្តល់មូលនិធិដល់អង្គការមេឌៀវ័ន ផលិតកម្មវិធីអប់រំជំងឺគ្រុនចាញ់។ លោកឲ្យដឹងថា តាមការស្រាវជ្រាវតាមមន្ទីរពេទ្យបង្អែកគោលដៅខេត្តជាប់ព្រំដែនកម្ពុជាថៃ ៦ខែដើមឆ្នាំ២០១៤ មិនមានអ្នកជំងឺគ្រុនចាញ់ច្រើនទៀតទេ។ លោកថា តាមរយៈការផលិតកម្មវិធីអប់រំពីវិធីបង្ការទប់ស្កាត់ជំងឺគ្រុនចាញ់តាមវិទ្យុ នាំឲ្យពលរដ្ឋយល់ដឹងពីវិធីទប់ស្កាត់បានខ្ពស់។
ចំណែកលោកវេជ្ជបណ្ឌិត គឹម សំអុន តំណាងមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ នៃក្រសួងសុខាភិបាល ដែលចូលរួមបើកសិក្ខាសាលា ក៏ទទួលស្គាល់ថា ជំងឺគ្រុនចាញ់បានថយចុះនៅសល់ត្រឹម ៣០ភាគរយទេ បើប្រៀបធៀប ៦ខែដើមឆ្នាំ២០១៤ ទៅ ៦ខែដើមឆ្នាំ២០១៣។ លោកមានជំនឿថា ផែនការយុទ្ធសាស្ត្រជាតិលុបបំបាត់ជំងឺគ្រុនចាញ់ឆ្នាំ២០១១-២០២៥ របស់ប្រមុខរដ្ឋាភិបាល នឹងទទួលជោគជ័យ៖ «ទី១ បងប្អូនត្រូវស្វែងយល់តើការរស់នៅរបស់បងប្អូនហ្នឹង ជាទីតាំងដែលរងគ្រោះដោយជំងឺគ្រុនចាញ់ដែរទេ។ ទី២ សំខាន់ គឺបងប្អូនត្រូវស្វែងរកអ្នកស្ម័គ្រចិត្តព្យាបាលជំងឺគ្រុនចាញ់ នៅតាមភូមិ អ្នកស្ម័គ្រចិត្តព្យាបាលជំងឺគ្រុនចាញ់ចល័ត និងអ្នកស្ម័គ្រចិត្តនៅតាមជង្រុក ឬការដ្ឋាន ដែលបងប្អូនកំពុងរស់នៅ ព្រោះមជ្ឈមណ្ឌលជាតិបានបង្កើតអ្នកព្យាបាលជំងឺគ្រុនចាញ់នៅតាមចម្ការ ឬនៅតាមកសិដ្ឋាន ដែលបងប្អូនប្រកបអាជីវកម្មនៅតាមទីកន្លែងទាំងអស់នោះ»។
ក្រសួងសុខាភិបាល បង្ហាញថា ចំនួនមនុស្សស្លាប់ដោយជំងឺគ្រុនចាញ់ឆ្នាំ២០០០ មានចំនួនជាង ៦០០នាក់ (៦០៨)។ ១០ឆ្នាំក្រោយមក គឺឆ្នាំ២០១០ មានអ្នកស្លាប់ជាង ១៥០នាក់ (១៥១)។ ចំណែកឆ្នាំ២០១១ ស្លាប់ចំនួន ៩៣នាក់ ឆ្នាំ២០១២ មាន ៤៦នាក់ និងឆ្នាំ២០១៣ ស្លាប់ ១២នាក់។ ដោយឡែក ៣ខែដើមឆ្នាំ២០១៤ គ្មានអ្នកជំងឺគ្រុនចាញ់ណាម្នាក់ស្លាប់ទេ ប៉ុន្តែឆ្នាំ២០១៣ មានមនុស្សស្លាប់ចំនួន ៣នាក់ ក្នុងរយៈពេលដូចគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។