មន្រ្តីសង្គមស៊ីវិលធ្វើការងារផ្នែកចំណីអាហារ និងសុខភាពពលរដ្ឋ អំពាវនាវអោយពលរដ្ឋយកចិត្តទុកដាក់ពិនិត្យគុណភាពទំនិញមុននឹងទិញយកទៅប្រើប្រាស់។
ការលើកឡើងនេះបន្ទាប់ពីអាជ្ញាធរជំនាញពាក់ព័ន្ធបានដុតបំផ្លាញទំនិញខូចគុណភាពជិត ១ពាន់កេស កាលពីថ្ងៃទី៧ ខែកក្កដា។
ប្រធានកម្មវិធីប្រតិបត្តិតាមមូលដ្ឋាននៃមជ្ឈមណ្ឌលសិក្សាអភិវឌ្ឍកសិកម្មកម្ពុជា ហៅថា សេដាក (CEDAC) លោក គាម មករាឌី មានប្រសាសន៍ថា អ្នកប្រើប្រាស់គួរពិនិត្យពិច័យពីប្រភពពីធាតុផ្សំ និងពីកាលកំណត់ប្រើប្រាស់ទំនិញមុនពេលទិញ។ បើទោះជាយ៉ាងណា លោកសង្កេតឃើញថា អ្នកប្រើប្រាស់ភាគច្រើនជួបការលំបាក ដោយសារការណែនាំលើទំនិញទាំងឡាយជាភាសាបរទេស៖ «ដើម្បីស្វែងយល់ពីសុវត្ថិភាពចំណីអាហារ អ្នកបរិភោគតែងតែស្វែងរកប្រភពនៃការផលិត បញ្ជាក់គុណភាពច្បាស់លាស់ ទីតាំងផលិតត្រឹមត្រូវអត់ ចែកចាយដោយនរណា ដើម្បីយើងតាមដានមើល។ ទី២ កាលបរិច្ឆេទនៃផលិតផល។ ក្រមនៃអ្នកប្រើប្រាស់គេបានចែងហើយថា អ្នកបរិភោគ ឬអ្នកប្រើប្រាស់គួរតែមានសិទ្ធិមួយ គឺសិទ្ធិដឹងព័ត៌មានហ្នឹង អ៊ីចឹងត្រូវមានស្លាកសញ្ញាជាភាសាតំបន់...»។
ទំនិញខូចគុណភាព និងហួសកាលកំណត់ដែលត្រូវដុតចោលនោះ រួមមានកាហ្វេ វីណា (Vina Café) ចំនួន ២៤០កេស តែ ខូល ធី (Cool Tea) ចំនួន ៧០កេស កាហ្វេពោត ដេយ៍ ធូ ដេយ៍ (Day to Day) ១៤៨កេស ទឹកត្រីចម្រុះចំនួន ៤០៤កេស មេស្រា ចំនួន ៤០កេស និងសម្ភារៈវេចខ្ចប់មួយចំនួនទៀត។
នាយកដ្ឋានប្រឆាំងបទល្មើសសេដ្ឋកិច្ច ការិយាល័យប្រឆាំងបទល្មើសកម្មសិទ្ធិបញ្ញា សហការជាមួយកម្លាំងកាំកុងត្រូលក្នុងទីក្រុងភ្នំពេញ និងសមត្ថកិច្ចពាក់ព័ន្ធបានដកហូតទំនិញទាំងនោះពីទីតាំងស្តុករបស់ជនជាតិវៀតណាម ម្នាក់កាលពីថ្ងៃទី២២ ខែមិថុនា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។