ក្រុមគ្រួសារស្ត្រីដែលស្លាប់ដោយសារធ្លាក់ឈាមច្រើនក្រោយពេលសម្រាលកូន នៅខេត្តពោធិ៍សាត់ កំពុងពិចារណាប្ដឹងគ្រូពេទ្យឆ្មបវ័យក្មេងម្នាក់ប្រចាំនៅមណ្ឌលសុខភាព ឃុំតាលោ ស្រុកបាកាន។
មន្ត្រីសិទ្ធិមនុស្សថ្លែងគាំទ្រគំនិតរបស់ក្រុមគ្រួសារជនរងគ្រោះនេះ ដើម្បីឲ្យពេទ្យឆ្មបតាមមណ្ឌលនានា បង្កើនការយកចិត្តទុកដាក់ និងគោរពវិជ្ជាជីវៈរបស់ខ្លួន។
ក្រុមគ្រួសារសពស្ត្រីវ័យ ២១ឆ្នាំ ឈ្មោះ ហៀង ចាន់នី នៅភូមិព្រៃរោង ឃុំតាលោ ដែលស្លាប់កាលពីថ្ងៃទី១៣ ខែមីនា ឆ្នាំ២០១៥ ចោទពេទ្យឆ្មបប្រចាំមណ្ឌលសុខភាពតាលោ ថាបានធ្វេសប្រហែស និងបូមយកទារិកាចេញពីផ្ទៃម្ដាយខុសបច្ចេកទេស បណ្ដាលឲ្យម្ដាយស្លាប់មុនបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្តពោធិ៍សាត់។ ក្រុមគ្រួសារសពអះអាងថា ដំណើរការប្ដឹងផ្ដល់អាចចាប់ផ្ដើមនៅក្រោយថ្ងៃបុណ្យខួប ៧ថ្ងៃរួច។
ឪពុកបង្កើតរបស់សព គឺលោក កាក់ គឹមហៀង ថ្លែងនៅថ្ងៃទី១៥ ខែមីនា ថា ពេទ្យឆ្មបនៅមណ្ឌលសុខភាពតាលោ ឈ្មោះ ស៊ុន កញ្ញា បានប្រើបច្ចេកទេសបូម និងបារយកសុកចេញមិនត្រឹមត្រូវ គឺជាហេតុនាំឲ្យធ្លាក់ឈាមមិនឈប់ ហើយយឺតយ៉ាវឲ្យបញ្ជូនទៅសង្គ្រោះនៅមន្ទីរពេទ្យបង្អែក។
លោកថា ក្រោយពីកូនស្រីស្លាប់ទៅ បានបន្សល់ចៅស្រីម្នាក់ ហើយកំពុងពិបាកអ្នកចិញ្ចឹមបីបាច់៖ «កូនគ្រប់ខែហើយប្រើបូម ដល់ពេលបូមបានកូននៅសុក ខ្វារយកសុកដាច់សុកដាច់អីធ្លាក់ឈាម ហើយក៏គេបញ្ជូនទៅមន្ទីរពេទ្យស្រុកនៅម៉ោង ១២ថ្ងៃត្រង់ ដល់មន្ទីរពេទ្យស្រុក ពេទ្យស្រុកសង្កត់ពោះមើលទៅឃើញទន់អស់ គេថា អត់មាននៅសល់ស្បូនទេ។ មន្ទីរពេទ្យស្រុកក៏បញ្ជូនបន្ដទៅខេត្ដ ទៅដល់ខេត្ដបានតែ ១៥នាទីក៏ស្លាប់បាត់ទៅដោយធ្លាក់ឈាមច្រើនពេក»។
វិទ្យុអាស៊ីសេរី មិនអាចទាក់ទងពេទ្យឆ្មបប្រចាំនៅមណ្ឌលសុខភាពតាលោ គឺអ្នកស្រី ស៊ុន កញ្ញា ដើម្បីសុំការអត្ថាធិប្បាយជុំវិញបញ្ហានេះបានទេ នៅថ្ងៃទី១៥ ខែមីនា ដោយទូរស័ព្ទមិនអាចទាក់ទងបាន។ ប៉ុន្តែប្រធានមន្ទីរពេទ្យបង្អែកខេត្តពោធិ៍សាត់ លោក ច័ន្ទ សុខា បញ្ជាក់ថា ការស្លាប់របស់ស្ត្រីឈ្មោះ ហៀង ចាន់នី គឺបណ្ដាលមកពីធ្លាក់ឈាមច្រើនពេក និងយឺតពេលបញ្ជូនមកសង្គ្រោះដោយបញ្ហាផ្លូវលំបាក។
លោក ច័ន្ទ សុខា បង្ហើបថា ក្រុមគ្រូពេទ្យមិនទាន់រកឃើញពីមូលហេតុពិតប្រាកដនៃការធ្លាក់ឈាមនេះនៅឡើយទេ ប៉ុន្តែក្រុមការងារគម្រោងគាំពារមាតា និងទារកនឹងចុះអង្កេតករណីនេះបន្ថែមទៀត៖ «គេមានក្រុមការងារចុះស្រាវជ្រាវបន្តិចទៀតទៅគេចុះហើយប្អូន! ចុះទៅសួរហេតុផលហ្នឹង អ៊ីចឹងបើគាត់ដាក់ពាក្យប្ដឹង អាហ្នឹងជាសិទ្ធិរបស់គាត់ (គ្រួសារជនរងគ្រោះ)»។
មន្ត្រីសម្របសម្រួលសមាគមអាដហុក (Adhoc) ប្រចាំខេត្តពោធិ៍សាត់ លោក ភួង សុធា ដែលចុះអង្កេតករណីនេះថ្លែងថា ជនរងគ្រោះបានទៅពិនិត្យ និងតាមដានសុខភាពនៅមណ្ឌលសុខភាពជាប្រចាំ គឺពុំមានសញ្ញាគ្រោះថ្នាក់ណាមួយដល់ម្ដាយ និងកូនក្នុងផ្ទៃនោះទេ។ លោកគិតថា ការស្លាប់នេះបណ្ដាលមកពីការធ្វេសប្រហែស និងខ្វះបច្ចេកទេសរបស់ពេទ្យឆ្មប។ លោកគាំទ្រការប្ដឹងរកយុត្តិធម៌របស់ក្រុមគ្រួសារជនរងគ្រោះ ហើយនឹងជួយរៀបចំពាក្យបណ្ដឹង និងប្រឹក្សាផ្លូវច្បាប់បន្ថែមទៀត ប្រសិនបើក្រុមគ្រួសារជនរងគ្រោះពឹងខាងលោកឲ្យជួយជ្រោមជ្រែងក្នុងដំណើរការរឿងក្ដីនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។