ពលរដ្ឋនៅខេត្តកំពង់ឆ្នាំង អះអាងថា បទល្មើសនេសាទនៅតែជាឧបសគ្គធ្ងន់ធ្ងរក្នុងកិច្ចការពារ និងអភិរក្សធនធានជលផលនៅក្នុងបឹងទន្លេសាប ដោយក្រុមឈ្មួញកំពុងតែប្រព្រឹត្តបទល្មើសនេសាទយ៉ាងគគ្រឹកគគ្រេងនៅតាមឃុំមួយចំនួននៃស្រុកកំពង់លែង នៅក្នុងរដូវបិទឆ្នាំ២០១៤ នេះ។ ប៉ុន្តែខាងមន្ត្រីជំនាញជលផលវិញបដិសេធចំពោះការលើកឡើងនេះ ហើយអះអាងផ្ទុយវិញថា សកម្មភាពប្រព្រឹត្តបទល្មើសនេសាទឆ្នាំនេះមានការថយចុះ។
ប្រជាពលរដ្ឋរស់នៅឃុំពោធិ៍ ឲ្យដឹងនៅថ្ងៃទី២០ ខែកក្កដា ថា សកម្មភាពដាក់លបឡុកដែលមានប្រវែងរាប់ពាន់ម៉ែត្រ គឺចាប់ពីចំណុចទន្លេពាមទន្លា នៃឃុំត្រងិល រហូតដល់ចំណុចភ្នំត្រង់ នៃឃុំពោធិ៍ បានកើតមានតាំងពីដើមខែមិថុនា ឆ្នាំ២០១៤ ប៉ុន្តែខាងអាជ្ញាធរមានសមត្ថកិច្ចបានចុះបង្ក្រាបតិចតួចនិងពុំមានប្រសិទ្ធភាពឡើយ។
ប្រជាពលរដ្ឋម្នាក់ លោក ស្រី សាវឿន មានប្រសាសន៍ថា ក្រុមឈ្មួញបានបង្ហើបប្រាប់លោកថា គេមិនខ្វល់នឹងការបង្ក្រាបអ្វីឡើយ និងនៅតែបន្តធ្វើសកម្មភាពល្មើសនេះរហូតដល់រដូវទឹកសម្រកវិញ ដោយគេអះអាងថា បានបង់ប្រាក់រាប់ពាន់ដុល្លារឲ្យទៅមន្ត្រីជំនាញជលផល និងអាជ្ញាធរពាក់ព័ន្ធរួចអស់ហើយ។ លោកថា ចំពោះពលរដ្ឋក្រីក្រដែលមុខរបរនេសាទជាលក្ខណៈគ្រួសារមានការលំបាកយ៉ាងខ្លាំងដោយចងសន្ទូច ឬដាក់មងមិនបានត្រី ពីព្រោះតែបទល្មើសនៅក្នុងមូលដ្ឋានមានច្រើនពេក។
លោក ស្រី សាវឿន៖ «សមត្ថកិច្ចគេចុះមកហ្នឹងម្សិលមួយថ្ងៃគេមកហ្នឹង គេស៊ិសស៊ុះគ្នាគេ គេតេ (ទូរស័ព្ទ) ឲ្យដកខ្លះអីខ្លះអ៊ីចឹង តែដល់ពេលមើលគេទៅផុតទៅស្ងាត់ ឥឡូវចាប់ផ្ដើមដាក់វិញ ព្រោះខ្ញុំឃើញអាអ្នកដាក់ហ្នឹងវាមកអង្គុយលេងផ្ទះខ្ញុំៗ ខ្ញុំចង់ដឹង ខ្ញុំសួរសាកទៅគេនិយាយប្រាប់ខ្ញុំថា គេបង់ឲ្យគ្រប់ជំនាញអស់ហើយ។ សំណូមពរថា រកល្មមៗទៅ ទុកឲ្យប្រជាពលរដ្ឋរកផង ព្រោះប្រជាពលរដ្ឋសឹងដាច់បាយហើយ ដាក់មងអត់ត្រូវទេសព្វថ្ងៃនោះ»។
ឆ្លើយតបបញ្ហានេះនាយខណ្ឌរដ្ឋបាលជលផលខេត្តកំពង់ឆ្នាំង លោក សេង ប៊ុនឈឿន ថ្លែងបញ្ជាក់ថា ករណីប្រព្រឹត្តបទល្មើសក្នុងរដូវបិទនេសាទឆ្នាំនេះ គឺមានការថយចុះដោយលោកបានចុះពិនិត្យមើលផ្ទាល់នៅតាមទន្លេ និងព្រែកសំខាន់ៗមួយចំនួនក្នុងខេត្តឃើញថា ពុំមានបទល្មើសនោះទេ។
ចំពោះទីតាំងបទល្មើសដែលប្រជាពលរដ្ឋបានរាយការណ៍មកនេះខាងលោកនឹងចាត់កម្លាំងឲ្យចុះទៅពិនិត្យមើលឡើងវិញក្នុងពេលឆាប់ៗ គឺយ៉ាងហោចណាស់ឲ្យបាន ៥ដងទៀត ក្នុងរដូវបិទនេសាទនេះឆ្នាំនេះ៖ «សំខាន់បញ្ហានេះគាត់ត្រូវតែសហការជាមួយខាងខ្ញុំឲ្យមានមន្ត្រីណាវាយ៉ាងម៉េច ហើយខ្ញុំព្យាយាមសហការជាមួយគាត់ជាដរាបករណីហ្នឹង ខ្ញុំអត់ឲ្យមានទេ អំពើទាំងហ្នឹង។ បទល្មើសវានៅមានសេសសល់វាមិនអត់ទេ ប៉ុន្តែបទល្មើសដូចជារបាំងរាំងភ្ជិតធំៗ ដែលយើងកើត ដូចជាឆ្នាំកន្លងទៅដែលមានរបាំងធ្នស់កាត់ព្រែកកាត់អីហ្នឹង គឺយើងមើលដូចជាអត់ឃើញ»។
មន្ត្រីសម្របសម្រួលសហគមន៍នៃអង្គការការពារនិងអភិរក្សធនធានជលផលហៅកាត់ថា ហ្វេក (Fact) អ្នកស្រី នៅ សារឹម យល់ថា ប្រសិទ្ធភាពនៃការបង្ក្រាបបទល្មើសនេសាទគឺអាស្រ័យដោយមានការចូលរួមពីប្រជាពលរដ្ឋ ឬប្រជានេសាទ ក្នុងការដានឲ្យបានច្បាស់លាស់ទៅលើក្រុមឈ្មួញ និងមន្ត្រីជំនាញខិលខូចដែលបានឃុបឃិតគ្នាប្រព្រឹត្តអំពើពុករលួយ ដើម្បីរាយការណ៍ទៅមន្ត្រីជំនាញថ្នាក់លើចាត់ការតាមផ្លូវច្បាប់៖ «សូមឲ្យគាត់ប្រមូលភស្តុតាងហ្នឹងឲ្យបានច្បាស់ ហើយចូលរួមការអនុវត្តច្បាប់ទាំងអស់គ្នាទាក់ទងទៅនឹងអភិបាលកិច្ចល្អនោះណា។ អាហ្នឹងបានធ្វើឲ្យមន្ត្រីមួយចំនួនដែលគាត់ចង់ពុករលួយហ្នឹងវាអត់អាចពុករលួយទៅកើតទេ»។
បច្ចុប្បន្នប្រជាពលរដ្ឋដែលរស់នៅពឹងផ្អែកស្ទើរទាំងស្រុងទៅលើមុខរបរនេសាទត្រីត្អូញត្អែរអំពីផលនេសាទកាន់តែខ្សត់ទៅ បើទោះបីជារដ្ឋាភិបាលខំធ្វើពិធីលែងកូនត្រីជាហូរហែក្នុងរដូវបិទនេសាទម្ដងៗ។ កាលពីថ្ងៃទី១ ខែកក្កដា ឆ្នាំ២០១៤ ក្នុងពិធីលែងកូនត្រីនៅអាងទឹកក្ដុល ស្ថិតនៅឃុំពាម ស្រុកសាមគ្គីមានជ័យ ខេត្តកំពង់ឆ្នាំង លោកនាយករដ្ឋមន្ត្រី ហ៊ុន សែន បានក្រើនរំលឹកដល់មន្ត្រីក្រោមឱវាទរបស់ខ្លួនឲ្យយកចិត្តទុកដាក់ទប់ស្កាត់បទល្មើសនេសាទ និងអំពាវនាវដល់ប្រជាពលរដ្ឋឲ្យបញ្ឈប់ការប្រើឧបករណ៍នេសាទខុសច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។