ប្រធានអាជ្ញាធរជាតិប្រយុទ្ធប្រឆាំងគ្រឿងញៀន គឺលោក កែ គឹមយ៉ាន បានចេញសេចក្ដីណែនាំមួយដល់គ្រប់ស្ថាប័នអាជ្ញាធរ ឱ្យចាត់វិធានការបង្ការបញ្ឈប់ការប្រើប្រាស់ ការធ្វើអាជីវកម្ម និងការនាំចូលផលិតផល ហ្ស៊ីហ្សា និងបារីអេឡិចត្រូនិក។
ក្នុងសេចក្ដីណែនាំរបស់លោក កែ គឹមយ៉ាន នៅថ្ងៃទី២៥ កុម្ភៈ បានសរសេរថា មហាជនទូទៅ រួមទាំងអាជ្ញាធរផង មានប្រតិកម្ម និងព្រួយបារម្ភជាខ្លាំងចំពោះបញ្ហាប្រើប្រាស់ផលិតផល ហ្ស៊ីហ្សា ដែលក្នុងរយៈពេលប៉ុន្មានខែចុងក្រោយនេះ បានរីករាលដាលខ្លាំងទាំងនៅរាជធានីភ្នំពេញ និងតាមបណ្ដាខេត្ត។ ជាពិសេស អាណាព្យាបាលយុវជនយល់ថា ផលិតផល ហ្ស៊ីហ្សា ជាប្រភេទគ្រឿងញៀនថ្មី ដែលពង្វក់អារម្មណ៍យុវជនឱ្យឈ្លក់វង្វេង បោះបង់ចោលការសិក្សា ការងារ និងអាចបង្កបញ្ហាលំបាកធ្ងន់ធ្ងរផ្សេងៗ ដល់សង្គម។
ពលរដ្ឋនៅរាជធានីភ្នំពេញ មួយចំនួនព្រួយបារម្ភថា ការប្រើប្រាស់ផលិតផល ហ្ស៊ីហ្សា អាចធ្វើឱ្យប៉ះពាល់យុវជន ដោយសារតែពួកគាត់ឃើញសិស្សសាលាមួយចំនួន កំពុងពេញនិយមប្រើប្រាស់ ឬជក់ផលិតផលនេះ។
អ្នកភ្នំពេញមួយរូប គឺលោក អឿន វុទ្ធី ថ្លែងថា លោកមិនចង់ឱ្យការធ្វើអាជីវកម្មផលិតផល ហ្ស៊ីហ្សា ស្របច្បាប់ទេ៖ «ខ្ញុំគិតថាមិនគួរឱ្យមានទេអាហ្នឹង ព្រោះយូរៗទៅវាអាចមានអាប្រភេទញៀនដាក់ចូលទៅ ដើម្បីឱ្យភ្ញៀវ ក្មេងៗ អីហ្នឹងវាចូលបណ្ដាលឱ្យវក់។ ដំបូងគេហៅថាស្របច្បាប់ គ្មានជាតិញៀនទេ។ តែយូរៗ ទៅខ្ញុំគិតថាអាច ព្រោះដល់ពេលមានអាជីវកម្មស្របច្បាប់ហើយ វានឹងដាក់ជាតិញៀនហ្នឹង ដើម្បីពង្វក់ខួរក្បាលក្មេង»។
អាជីវករផលិតផល ហ្ស៊ីហ្សា នៅរាជធានីភ្នំពេញ ដែលសុំមិនបញ្ចេញឈ្មោះមួយរូប ឱ្យដឹងថា ផលិតផល ហ្ស៊ីហ្សា ជាប្រភេទដំណាប់ផ្លែឈើ ដែលគេយកមកដុត ហើយជក់បឺតផ្សែងដូចបារី។ ការជក់ ហ្ស៊ីហ្សា មានបំពង់សម្រាប់បឺតផ្សែងដូចជក់កញ្ឆាដែរ។
ក្នុងសេចក្ដីណែនាំរបស់អាជ្ញាធរជាតិប្រយុទ្ធប្រឆាំងគ្រឿងញៀន បន្តថា ទោះបីជាផលិតផលហ្ស៊ីហ្សា មិនមានផ្ទុកសារធាតុញៀន ដែលមានចែងក្នុងច្បាប់ស្ដីពីគ្រឿងញៀនក្ដី ប៉ុន្តែវាមានផ្ទុកសារធាតុនីកូទីន ខ្ពស់ ដែលបង្កឱ្យមានផលប៉ះពាល់សុខភាពធ្ងន់ធ្ងរជាងបារី។
អាជីវករម្នាក់យល់ស្របថា ហ្ស៊ីហ្សា មិនមែនគ្រឿងញៀនទេ គឺដូចជក់បារី។ ក៏ប៉ុន្តែការជក់ ហ្ស៊ីហ្សា ម្ដងអាចនឹងបារីមួយកញ្ចប់។
អ្នកធ្វើអាជីវកម្មបើកបារដែលមានកន្លែងជក់ ហ្ស៊ីហ្សា មួយចំនួន នៅរាជធានីភ្នំពេញ ដែលសុំមិនបញ្ចេញឈ្មោះ ថ្លែងថា ការបិទអាជីវកម្មផលិតផល ហ្ស៊ីហ្សា របស់រដ្ឋាភិបាល នឹងធ្វើប៉ះពាល់ធ្ងន់ធ្ងរដល់អាជីវកម្មពួកគាត់ ដែលត្រូវខាតទុនរាប់ម៉ឺនដុល្លារក្នុងម្នាក់ៗ។ អាជីវករម្នាក់ឱ្យដឹងថា នៅពេលដែលមិនទាន់មានច្បាប់ហាមឃាត់ អាជីវករបាននាំចូលផលិតផលនេះ ដោយបង់ពន្ធទៅគយ។
អាជ្ញាធរជាតិសម្រេចបញ្ឈប់ការប្រើប្រាស់ ការធ្វើអាជីវកម្មផលិតផល ហ្ស៊ីហ្សា និងបារីអេឡិចត្រូនិក ដោយសារពិនិត្យឃើញថា ពលរដ្ឋកម្ពុជាមួយចំនួនកំពុងរំជើបរំជួលចង់សាកល្បង ហើយយុវជនមួយចំនួនកំពុងប្រើប្រាស់។
ទាក់ទងនឹងការបិទអាជីវកម្មលើផលិតផល ហ្ស៊ីហ្សា និងបារីអេឡិចត្រូនិក នេះ លោកមេធាវី សុក សំអឿន ថ្លែងថា ប្រសិនបើមិនភស្តុតាងវិទ្យាសាស្ត្រណាបញ្ជាក់ថា ផលិតផលទាំងនេះជាគ្រឿងញៀនដែលមានច្បាប់ហាមទេ រដ្ឋាភិបាលគួរធ្វើច្បាប់ហាមជាមុនសិន៖ «ព្រោះគ្រឿងញៀន ច្បាប់យើងមានហាមប្រាមរួចហើយ។ ដូច្នេះ ប្រសិនបើអត់មានលិខិតបញ្ជាក់ចំណុចណាមួយ ដែលបញ្ជាក់ថា គ្រឿងហ្នឹងជាគ្រឿងញៀនហាមឃាត់ដោយច្បាប់ទេ បើយើងចង់បន្ថែមលើច្បាប់ទៅទៀត លុះត្រាតែយើងធ្វើច្បាប់មួយថ្មី ទើបយើងអាចបិទបាន។ ខ្ញុំគិតថា អ្នកដែលគេទិញចូលមក បើសិនជាមិនមែនជាគ្រឿងញៀនទេ គេប្រាកដជាទិញមកដោយស្របច្បាប់ នាំចូលមកដោយស្របច្បាប់ហើយ ហើយបើសិនរដ្ឋាភិបាលយើងអនុញ្ញាតឱ្យគេនាំចូល ហើយយើងបែរជាបិទ បើយើងគិតមែនទែន បើនៅប្រទេសគេជឿនលឿន អាហ្នឹងទាល់តែរដ្ឋហ្នឹងសុខចិត្តចំណាយ ព្រោះនាំចូលមកស្របច្បាប់មក ស្រាប់យើងបិទមិនឱ្យគេលក់ អាហ្នឹងទាល់តែសងការខូចខាត អ្វីដែលគេនាំមកសោយស្របច្បាប់ហ្នឹង»។
លោកបន្តថា មិនគួរបិទភ្លាមៗទេ ហើយទុកពេលកំណត់ជាក់លាក់មួយ ឱ្យអាជីវករលក់ផលិតផលនោះអស់សិន៖ «ទុកមួយរយៈ ដើម្បីឱ្យការហ្នឹងផុតទៅ ហើយបន្ទាប់មកយើងទុកឱសានវាទ ដើម្បីកុំឱ្យខាតការនាំចូលរបស់គេ។ ក៏ប៉ុន្តែទន្ទឹមហ្នឹង ទាល់តែមានច្បាប់ហាម ចាប់ពីថ្ងៃហ្នឹងទៅលែងឱ្យមាន ហើយរបស់ដែលមានប្រើហ្នឹង ឱ្យវាចប់សព្វគ្រប់ទៅ។ បើមិនអ៊ីចឹងទេ បើយើងឱ្យបិទដាច់មុខតែម្ដង វាទាល់រដ្ឋហ្នឹងជួយចេញខាត អ្នកដែលគេនាំចូលមកស្របច្បាប់រួចមកហើយ»។
អាជីវករម្នាក់ឱ្យដឹងថា ការបិទនេះនឹងនាំឱ្យអ្នកធ្វើការក្នុងបារ ឬក្លឹប បាត់បង់ការងារពី ៥០០ ទៅ ៦០០នាក់ ពីព្រោះក្នុងមួយកន្លែង មានអ្នកធ្វើការចន្លោះពីជាង ១០ ទៅ ២០នាក់ ហើយនៅរាជធានីភ្នំពេញ មានអាជីវកម្ម ហ្ស៊ីហ្សា នេះយ៉ាងតិចជាង ៣០កន្លែង។
ទោះជាយ៉ាងណាក្ដី អាជ្ញាធរជាតិប្រយុទ្ធប្រឆាំងគ្រឿងញៀន សម្រេចឱ្យបញ្ឈប់លែងឱ្យមានការប្រើប្រាស់ ការធ្វើអាជីវកម្មផលិតផល ហ្ស៊ីហ្សា និងបារីអេឡិចត្រូនិក គ្រប់រូបភាព ហើយដកហូត និងរឹបអូសផលិតផលទាំងនេះមករក្សាទុក។ ទីពីរ បញ្ឈប់និងឃាតទុកនូវការចរាចរ ការជួញដូរផលិតផល ហ្ស៊ីហ្សា និងបារីអេឡិចត្រូនិក នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។