សារាចរលេខ០២ របស់រដ្ឋាភិបាលកម្ពុជា ក្នុងការទប់ស្កាត់ការឆ្លងរាលដាលជំងឺផ្ដាសាយបក្សី បានណែនាំដល់ស្ថាប័នពាក់ព័ន្ធ រួមមានក្រសួងកសិកម្ម រុក្ខាប្រមាញ់ និងនេសាទ ក្រសួងមហាផ្ទៃ និងក្រសួងសុខាភិបាល អោយមានវិធានការត្រួតពិនិត្យអោយបានដិតដល់ចំពោះរាល់ការចិញ្ចឹម ការចរាចរណ៍ និងសម្លាប់សត្វបក្សីគ្រប់ប្រភេទ។
សារាចរណែនាំចេញថ្ងៃទី១ ខែមីនា ចុះហត្ថលេខាដោយលោកនាយករដ្ឋមន្ត្រី ធ្វើឡើងនៅក្រោយពេលដែលជំងឺផ្ដាសាយបក្សីបានសម្លាប់ពលរដ្ឋ ៨នាក់ ក្នុងរយៈពេល ២ខែ ដើមឆ្នាំ២០១៣ ដោយបានចាត់ទុកថាស្ថិតក្នុងកម្រិតព្រួយបារម្ភ បើទោះជាមានវិធានការទប់ស្កាត់មួយចំនួនត្រូវធ្វើឡើងនាពេលកន្លងទៅក៏ដោយ។
សារាចរនោះ បានលើកឡើងនូវបទបញ្ជាចំនួន ៥ចំណុច រួមមានក្រសួងពាក់ព័ន្ធ ត្រូវស្រាវជ្រាវអោយម៉ត់ចត់ និងជាប្រចាំលើសុខភាពបក្សី ការរក្សាអនាម័យចិញ្ចឹមបក្សី កន្លែងប្រមូលផ្ដុំបក្សី ទីផ្សារបក្សី និងសត្តឃាត ផ្សព្វផ្សាយបន្ថែមពីជំងឺផ្ដាសាយបក្សី និងវិធានការការពារ ចាត់វិធានការបន្ទាន់ទប់ស្កាត់ការធ្វើចរាចរណ៍បក្សី និងផលិតផលពីបក្សីដោយខុសច្បាប់។
អនុប្រធាននាយកដ្ឋានជំងឺឆ្លងនៃក្រសួងសុខាភិបាល លោកវេជ្ជបណ្ឌិត លី សុវណ្ណ មានប្រសាសន៍ថា ភាគីពាក់ព័ន្ធ ជាពិសេសក្រសួងកសិកម្ម និងក្រសួងសុខាភិបាល តែងសហការល្អក្នុងការចាត់វិធានការទប់ស្កាត់ការចម្លងជំងឺ ហើយសកម្មភាពនេះក៏នៅតែបន្ត និងពង្រឹងបន្ថែមទៀត។ លោក លី សុវណ្ណ បន្តថា កន្លងមកអ្នកដែលបានឆ្លងជំងឺនេះ តែងត្រូវបញ្ជូនមកកាន់មន្ទីរពេទ្យយឺតយ៉ាវ ដែលមិនអាចសង្គ្រោះបាន។ លោកថា ការអប់រំផ្សព្វផ្សាយមាន ប៉ុន្តែការអនុវត្តរបស់ប្រជាពលរដ្ឋនៅមិនទាន់អាចផ្លាស់ប្ដូរបាននៅឡើយ ដែលនេះជាភាពប្រឈមនៃក្រុមការងាររបស់លោក។
រោគសញ្ញាជំងឺផ្ដាសាយបក្សី ជាញឹកញយត្រូវពលរដ្ឋទូទៅយល់ច្រឡំថាជាជំងឺផ្ដាសាយធម្មតា ដែលជាហេតុបណ្ដាលអោយមានការបណ្ដែតបណ្ដោយអោយជំងឺនេះធ្លាក់ចូលក្នុងសភាពធ្ងន់ធ្ងរ មុនពេលបញ្ជូនដល់មន្ទីរពេទ្យ។
អ្នកស្រាវជ្រាវឯករាជ្យផ្នែកអភិវឌ្ឍន៍សង្គម លោក កែម ឡី មានប្រសាសន៍ថា ដើម្បីអោយវិធានការការពារទប់ស្កាត់ជំងឺផ្ដាសាយបក្សីមានប្រសិទ្ធភាព ហើយការផ្សព្វផ្សាយពីការថែទាំសុខភាពបឋមអាចចូលទៅដល់ស្រទាប់ប្រជាពលរដ្ឋ រដ្ឋាភិបាលត្រូវបន្ថែមថវិកាវិនិយោគលើវិស័យនេះ ពោលគឺស្របពេលដែលមានវិធានការ ក៏ត្រូវមានថវិកា ដើម្បីអនុវត្តសកម្មភាពថែមទៀត។
ចាប់តាំងពីឆ្នាំ២០០៥ មក មានមនុស្សឆ្លងជំងឺផ្ដាសាយបក្សីចំនួន ៣០នាក់ និងស្លាប់ចំនួន ២៧នាក់។
នៅក្នុងកិច្ចប្រជុំគណៈរដ្ឋមន្ត្រីនៅព្រឹកថ្ងៃសុក្រ ទី១ ខែមីនា លោកនាយករដ្ឋមន្ត្រី ហ៊ុន សែន បានជំរុញអោយអាជ្ញាធរពីគ្រប់ស្ថាប័នពាក់ព័ន្ធ រួមទាំងអាជ្ញាធរមូលដ្ឋាន និងកងកម្លាំងប្រដាប់អាវុធ សហការអនុវត្តសារាចរលេខ០២ របស់រដ្ឋាភិបាលអោយមានប្រសិទ្ធភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។