មនុស្ស​ទី​៨​ស្លាប់​ដោយ​ជំងឺ​ផ្ដាសាយ​បក្សី

ក្នុង​រយៈ​ពេល​២​ខែ ដើម​ឆ្នាំ​២០១៣ នេះ មាន​មនុស្ស​ទី​៩​ហើយ ដែល​ត្រូវ​រក​ឃើញ​ថា បាន​ឆ្លង​ជំងឺ​ផ្ដាសាយ​បក្សី (H5N1)។ មក​ដល់​ពេល​នេះ ជំងឺ​ផ្ដាសាយ​បក្សី​បាន​សម្លាប់​មនុស្ស​បន្ថែម​ម្នាក់​ទៀត​ដែល​ធ្វើ​អោយ​ចំនួន​អ្នក​ស្លាប់​ដោយ​សារ​ជំងឺ​នេះ​បាន​កើន​ដល់ ៨​នាក់។
ដោយ សុ ជីវី
2013-02-26
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ផ្ដាសាយ​បក្សី​៣០៥
២៤-មីនា-២០១០: សត្វ​មាន់​ដែល​ត្រូវ​បាន​ឈ្មួញ​ដឹក​ពី​ខេត្ត​ស្វាយរៀង នាំ​ចូល​មក​រាជធានី​ភ្នំពេញ
Photo: RFA

បុរស​អាយុ ៣៥​ឆ្នាំ​ម្នាក់ រស់​នៅ​ស្រុក​ស្ទឹងត្រង់ ខេត្ត​កំពង់ចាម ដែល​បាន​ស្លាប់​នៅ​យប់​ថ្ងៃ​ទី២៥ ខែ​កុម្ភៈ គឺ​ជា​មនុស្ស​ទី​៨ នៅ​កម្ពុជា ដែល​បាន​ស្លាប់​ដោយ​ជំងឺ​ផ្ដាសាយ​បក្សី បន្ទាប់​ពី​បុរស​រូប​នោះ​ត្រូវ​បញ្ជូន​អោយ​មក​សម្រាក​ព្យាបាល​នៅ​មន្ទីរពេទ្យ​កាល់ម៉ែត (Calmette) ដោយ​មាន​សភាព​ជំងឺ​ធ្ងន់ធ្ងរ។

ប្រធាន​នាយកដ្ឋាន​ជំងឺ​ឆ្លង​នៃ​ក្រសួង​សុខាភិបាល លោក​វេជ្ជបណ្ឌិត សុខ ទូច មាន​ប្រសាសន៍​នៅ​រសៀល​ថ្ងៃ​អង្គារ ទី២៦ ខែ​កុម្ភៈ ថា បុរស​ឈ្មោះ ធឿន ឌឿន បាន​ស្លាប់​នៅ​ម៉ោង​ជាង ១១​យប់ បន្ទាប់​ពី​សង្ស័យ​ថា​មាន​ផ្ទុក​ជំងឺ​ផ្ដាសាយ​បក្សី​H5N1។ លោក​ថា ពេទ្យ​ជំនាញ​បាន​រក​គ្រប់​វិធី​ព្យាបាល តែ​ពុំ​បាន​ទទួល​ជោគជ័យ​ឡើយ ដោយ​សារ​ជំងឺ​នេះ​បាន​ដល់​ដំណាក់​កាល​ធ្ងន់ធ្ងរ​មុន​ទទួល​ការ​ព្យាបាល៖ «យើង​បាន​បញ្ជូន​មក​សង្គ្រោះ​នៅ​ភ្នំពេញ​ហើយ ប៉ុន្តែ​ដោយ​សារ​សភាព​ជំងឺ​គាត់​ធ្ងន់ធ្ងរ​ពេក ដែល​យើង​មិន​អាច​សង្គ្រោះ​បាន»

ជន​រង​គ្រោះ​ទី​៨ ឈ្មោះ ធឿន ឌឿន មាន​អាយុ ៣៥​ឆ្នាំ រស់​នៅ​ភូមិ​ក្បាលអូរ ឃុំ​មេសរជ្រៃ ស្រុក​ស្ទឹងត្រង់ ខេត្ត​កំពង់ចាម លោក​ត្រូវ​បាន​បញ្ជូន​មក​សង្គ្រោះ​នៅ​មន្ទីរពេទ្យ​កាល់ម៉ែត កាល​ពី​ថ្ងៃ​ទី២១ ខែ​កុម្ភៈ។

ប្រធាន​អង្គការ​សុខភាព​ពិភពលោក​ប្រចាំ​កម្ពុជា លោក ភីតធើ វ៉ាន់ ម៉ារ៉េន (Pieter Van Maaren) បាន​មាន​ប្រសាសន៍​ប្រាប់​អ្នក​សារព័ត៌មាន​ថា ជំងឺ​ផ្ដាសាយ​បក្សី​ជា​ទូទៅ​រក​ឃើញ​ថា បាន​ចម្លង​ពី​សត្វ​បក្សី​មក​មនុស្ស និង​ពុំ​មាន​ការ​ចម្លង​ពី​មនុស្ស​មក​មនុស្ស​ឡើយ៖ «គ្រប់​ករណី​ជំងឺ​ទាំង​អស់ យើង​បាន​ធ្វើ​ការ​វិភាគ និង​ស្រាវជ្រាវ គឺ​មិន​មាន​ការ​ឆ្លង​ពី​មនុស្ស​ទៅ​មនុស្ស​ទេ គឺ​ឆ្លង​ពី​បក្សី​មក​មនុស្ស។ យើង​មិន​បារម្ភ​ពី​ការ​កើន​ឡើង​នូវ​ចំនួន​អ្នក​ជំងឺ​ទេ ប៉ុន្តែ​យើង​បារម្ភ​ពី​ឥរិយាបថ​របស់​ប្រជាជន​កម្ពុជា ចំពោះ​ជំងឺ​នេះ និង​ការ​ឆ្លង​មេរោគ​នេះ​រវាង​មនុស្ស​មក​មនុស្ស»

នៅ​ក្រោយ​ការ​រក​ឃើញ​ជំងឺ​ផ្ដាសាយ​លើ​បុរស ធឿន ឌឿន សមត្ថកិច្ច​មន្ទីរ​កសិកម្ម​ខេត្ត​កំពង់ចាម កាល​ពី​ថ្ងៃ​ទី១៩ ខែ​កុម្ភៈ បាន​កម្ទេច​សត្វ​មាន់ និង​ទា​ជាង ១.១០០​ក្បាល ក្នុង​ស្រុក​ចំនួន​ពីរ ដើម្បី​ទប់​ស្កាត់​ការ​ឆ្លង​រាល​ដាល​ជំងឺ​គ្រុន​ផ្ដាសាយ​បក្សី។

នៅ​ដើម​ឆ្នាំ​២០១៣ នេះ ជំងឺ​ផ្ដាសាយ​បក្សី​កើន​ដល់ ៩​ករណី ដែល​ក្នុង​នោះ​មាន​ក្មេង​អាយុ​ក្រោម ១៥​ឆ្នាំ​ចំនួន ៧​ករណី និង​មាន ៨​ករណី​បណ្ដាល​ឲ្យ​អ្នក​ជំងឺ​បាន​ស្លាប់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល