ជំងឺគ្រុនផ្ដាសាយបក្សីនេះ បានធ្វើឲ្យក្រុមមន្ត្រីស្ថាប័នពាក់ព័ន្ធ កាន់តែមានក្ដីព្រួយបារម្ភ ដោយសារនៅឆ្នាំ២០១៣ នេះ មេរោគH5N1 មានសន្ទុះរាលដាលខ្លាំងជាងឆ្នាំ២០១២។
មន្ត្រីជំនាញក្នុងការប្រយុទ្ធប្រឆាំងនៃការរីករាលដាលនៃមេរោគH5N1 នៅកម្ពុជា កំពុងព្រួយបារម្ភខ្លាចមានការបម្លែងមេរោគនេះឆ្លងពីមនុស្សទៅមនុស្ស ប្រសិនជាខ្វះចន្លោះក្នុងការទប់ស្កាត់មេរោគដែលបង្កឲ្យមានជំងឺគ្រុនផ្ដាសាយបក្សី។
នៅក្នុងកិច្ចប្រជុំសម្របសម្រួលអន្តរក្រសួង ស្ដីពីការវាយតម្លៃ និងវិធានការឆ្លើយតបក្នុងពេលផ្ទុះឡើងជំងឺគ្រុនផ្ដាសាយបក្សី នៅថ្ងៃទី១៤ មីនា អនុប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល លោកវេជ្ជបណ្ឌិត លី សូវ៉ាន់ មានប្រសាសន៍ថា ឱកាសនៃការបម្លែងមេរោគនេះគេឃើញមានសន្ទុះកាន់តែកើនឡើង។ លោកថា ជាបឋម កម្ពុជា ពុំមានវត្តមានមេរោគនេះទេ ប៉ុន្តែមកដល់បច្ចុប្បន្ន មេរោគនេះមាននៅក្នុងសត្វបក្សីដែលវាបានចម្លងពីសត្វបក្សីទៅសត្វបក្សី។ លោក លី សូវ៉ាន់ បញ្ជាក់ថា អន្តរក្រសួងបានដាក់វិធានការយ៉ាងតឹងរ៉ឹង ដើម្បីពង្រឹងប្រព័ន្ធតាមដានបន្តទៀត ជៀសវាងការបម្លែងមេរោគH5N1ដែលអាចវាយលុកខ្លាំងនៅកម្ពុជា។
នៅប្រទេសកម្ពុជា ក្នុងរយៈពេលពីរខែដើមឆ្នាំ២០១៣ នេះ ជំងឺផ្ដាសាយបក្សីH5N1 បានផ្ទុះ និងចម្លងទៅមនុស្សចំនួន ៩នាក់ ក្នុងនោះមនុស្សស្លាប់ចំនួន ៨នាក់។ ហើយគិតតាំងពីឆ្នាំ២០០៥ មក មានមនុស្សឈឺចំនួន ៣០នាក់ និងស្លាប់ចំនួន ២៧នាក់ដោយសារជំងឺនេះ។ យ៉ាងណាក៏ដោយ លោកវេជ្ជបណ្ឌិត លី សូវ៉ាន់ អះអាងថា ក្នុងករណីទាំងនេះពុំមានការរកឃើញណាមួយបញ្ជាក់ថាជាករណីឆ្លងពីមនុស្សទៅមនុស្សនោះទេ។
ចាប់តាំងពីឆ្នាំ២០០៤ មកដល់បច្ចុប្បន្ន ករណីផ្ទុះជំងឺគ្រុនផ្ដាសាយបក្សីមកលើសត្វ មានចំនួន ៣៩កន្លែង ក្នុងនោះមានច្រើនជាងគេ គឺខេត្តកំពង់ចាម តាកែវ និងខេត្តកណ្ដាល បន្ទាប់មកមានខេត្តកំពត សៀមរាប បន្ទាយមានជ័យ កំពង់ស្ពឺ ព្រៃវែង បាត់ដំបង និងរាជធានីភ្នំពេញ។
ប្រធាននាយកដ្ឋានផលិតកម្ម និងបសុព្យាបាលនៃក្រសួងកសិកម្ម រុក្ខាប្រមាញ់ និងនេសាទ លោកបណ្ឌិត ស៊ន សាន បានថ្លែងថា សត្វបក្សីចំនួន ៦០% ត្រូវបានរកឃើញថា កំពុងចរាចរនៅក្នុងទីផ្សារ ដែលនេះគឺជាចលនាបក្សីឆ្លងកាត់ខុសច្បាប់ បង្កឲ្យមានការសាយភាយមេរោគH5N1នេះ។ លោកថា ការផ្ទុះខ្លាំងមេរោគនេះ ក្នុងខែមករា និងខែកុម្ភៈ ជារដូវបុណ្យចូលឆ្នាំចិន ដែលសត្វបក្សីកំពុងមានតម្រូវការខ្ពស់នៅលើទីផ្សារ។
លោកវេជ្ជបណ្ឌិត លី សូវ៉ាន់ បង្ហាញថា ជាវិធានការនោះ គឺដើម្បីទប់ស្កាត់ការរីករាលដាលនៃមេរោគនេះ គឺរៀបចំប្រព័ន្ធតាមដាននៅក្នុងគ្រឹះស្ថានសុខាភិបាលសាធារណៈ តាមដានក្នុងសហគមន៍ តាមរយៈលេខទូរស័ព្ទពិសេស និងប្រព័ន្ធឃ្លាំមើលពីរទៀតនៅតាមមន្ទីរពេទ្យមួយចំនួន ដែលមានជំងឺផ្ដាសាយ និងជំងឺរលាកសួត។ ក្រៅពីនោះ មានមន្ទីរពិសោធន៍ដែលមានប្រសិទ្ធភាពខ្ពស់ និងអាចផ្ដល់លទ្ធផលតិចជាង ២៤ម៉ោង។ ហើយក៏មានមន្ទីរពេទ្យចំនួន ៦កន្លែង នៅពេលរកឃើញបឋមពីករណីគ្រុនផ្ដាសាយបក្សីមានបន្ទប់ព្យាបាល ជាពិសេសសម្រាប់ដាក់អ្នកជំងឺឲ្យនៅដោយឡែក និងតាមដានសុខភាពពលរដ្ឋជាអាជីវករ និងនៅកន្លែងសត្វឃាតជាដើម។
ក្រុមការងារអន្តរក្រសួង បានផ្ដាំផ្ញើថា វិធីបង្ការជំងឺនេះ គឺមានលក្ខណៈងាយបំផុត ដោយគ្រាន់អនុវត្តអនាម័យជាមូលដ្ឋាន នៅពេលធ្វើសត្វឃាតនោះ ដោយពាក់ស្រោមដៃ ពាក់ម៉ាស់ លាងដៃនឹងសាប៊ូជាការស្រេច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។